ಚಾಂಷುಗರ್ಸ್‌ಗೆ ಬೀಗ ಜಡಿದು ಪ್ರತಿಭಟನೆ

ಭಾರತೀನಗರ: ಕಬ್ಬಿನ ಬಾಕಿ ಹಣ ವಿತರಿಸುವಂತೆ ಆಗ್ರಹಿಸಿ ರೈತರು ಚಾಮುಂಡೇಶ್ವರಿ ಸಕ್ಕರೆ ಕಾರ್ಖಾನೆಗೆ ಬೀಗ ಜಡಿದು ಪ್ರತಿಭಟಿಸಿದರು.

ಕಾರ್ಖಾನೆ ಮುಂಭಾಗ ಜಮಾಯಿಸಿದ ರೈತರು ಕಾರ್ಖಾನೆ ಆಡಳಿತ ಮಂಡಳಿ ವಿರುದ್ಧ ಘೋಷಣೆ ಕೂಗಿ ಆಕ್ರೋಶ ವ್ಯಕ್ತಪಡಿಸಿದರು.

ಕಾರ್ಖಾನೆಗೆ ಕಬ್ಬನ್ನು ಸರಬರಾಜು ಮಾಡಿ 6 ತಿಂಗಳು ಕಳೆದರೂ ಆಡಳಿತ ಮಂಡಳಿ ಹಣ ನೀಡದೆ ಅಲೆಯುವಂತೆ ಮಾಡಿದೆ. ಬಾಕಿ ಪಾವತಿಸುವಂತೆ ಕೋರಿ ಕಾರ್ಖಾನೆಗೆ ಬಂದ ಸಮಯದಲ್ಲಿ ಅಧಿಕಾರಿಗಳು ಕಚೇರಿಯಲ್ಲಿ ಇರದೇ ತಲೆಮರೆಸಿಕೊಂಡು ಓಡಾಡುತ್ತಿದ್ದಾರೆ. ಇದರಿಂದ ನಾವು ಯಾರನ್ನು ಹಣ ಕೇಳುವುದು ಎಂದು ತೋಚದಂತಾಗಿದೆ ಎಂದು ಕಿಡಿಕಾರಿದರು.

ಈ ಭಾಗದ ಶಾಸಕರು, ಸಚಿವರೂ ಆದ ಡಿ.ಸಿ.ತಮ್ಮಣ್ಣ, ಜಿಲ್ಲಾ ಉಸ್ತುವಾರಿ ಸಚಿವರು, ಜಿಲ್ಲಾಡಳಿತ ಹಾಗೂ ತಾಲೂಕು ಆಡಳಿತ ಇದುವರೆಗೂ ಕಬ್ಬಿ ಹಣ ಪಾವತಿಗೆ ಯಾವುದೇ ಕ್ರಮ ವಹಿಸದೇ ಮೌ ನ ವಹಿಸಿದೆ ಎಂದು ಪ್ರತಿಭಟನಾನಿರತರು ಅಸಮಾಧಾನ ವ್ಯಕ್ತಪಡಿಸಿದರು. ಕಬ್ಬಿನ ಹಣ ಬಾರದಿರುವುದರಿಂದ ಮನೆಯಲ್ಲಿರುವ ಚಿನ್ನಾಭರಣಗಳನ್ನು ಬ್ಯಾಂಕ್‌ನಲ್ಲಿ ಗಿರವಿ ಇಡುವ ಸ್ಥಿತಿ ತಲುಪಿದ್ದೇವೆ. ಮಕ್ಕಳ ವಿದ್ಯಾಭ್ಯಾಸಕ್ಕೆ ಹಣ ಕಟ್ಟಲು, ಜೀವನ ನಡೆಸಲು ಕಷ್ಟ ಸಾಧ್ಯವಾಗಿದೆ ಎಂದು ರೈತರು ಅಳಲು ತೋಡಿಕೊಂಡರು.

ಈ ಪರಿಸ್ಥಿತಿ ಇದೇ ರೀತಿ ಮುಂದುವರಿದತೆ ರೈತರು ಆತ್ಮಹತ್ಯೆಗೆ ಶರಣಾಗಬೇಕಾಗುತ್ತದೆ. ಇದಕ್ಕೆಲ್ಲಾ ಸಂಬಂಧಿಸಿದ ಕಾರ್ಖಾನೆ ಮಾಲೀಕರು, ಆಡಳಿತ ಮಂಡಳಿ ಅಧಿಕಾರಿಗಳು, ಸಚಿವರೇ ಹೊಣೆಗಾರರಾಗಬೇಕಾಗುತ್ತದೆ. ಕಾರ್ಖಾನೆಯವರು ಬಂದು ರೈತರಿಗೆ ಕಬ್ಬಿ ಹಣ ನೀಡುವವರೆಗೂ ಅನಿರ್ಧಿಷ್ಟಾವಧಿ ಧರಣಿ ನಡೆಸಲಾಗುತ್ತದೆ ಎಂದು ಪ್ರತಿಭಟನಾನಿರತರು ಎಚ್ಚರಿಕೆ ನೀಡಿದರು.

ಮುಖಂಡರಾದ ತಳಗವಾದಿ ಆನಂದ್‌, ಮುಟ್ಟನಹಳ್ಳಿ ಸುರೇಶ್‌, ಡಿ.ಎ.ಕೆರೆ ಶಿವಲಿಂಗು, ಕರಡಕೆರೆ ಹನುಮೇಗೌಡ, ಸತೀಶ್‌, ವೀರೇಂದ್ರ, ಜವರಾಯಿ, ಗೆಂಡೆ, ಗೌಡಯ್ಯನದೊಡ್ಡಿ ಸತೀಶ್‌, ದೇವರಹಳ್ಳಿ ಸಂತೋಷ್‌ ಇತರರು ಇದ್ದರು.