ಕಿರುಕುಳ ತಾಳಲಾರದೆ ಆತ್ಮಹತ್ಯೆ: 7 ಮಂದಿಗೆ ಜೈಲು

ಮಂಡ್ಯ: ವ್ಯಕ್ತಿಯೊಬ್ಬರಿಗೆ ಕಿರುಕುಳ ನೀಡಿ ಆತ್ಮಹತ್ಯೆ ಮಾಡಿಕೊಳ್ಳಲು ಕಾರಣರಾದ ಏಳು ಮಂದಿಗೆ ಎರಡು ವರ್ಷ ಜೈಲು ಶಿಕ್ಷೆ ಹಾಗೂ ತಲಾ 25 ಸಾವಿರ ರೂ. ದಂಡ ವಿಧಿಸಿ ಮಂಡ್ಯದ ನಾಲ್ಕನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ತೀರ್ಪು ನೀಡಿದೆ.

ಮದ್ದೂರು ತಾಲೂಕು ಕೊಪ್ಪ ಗ್ರಾಮದ ಗಂಗಾರಾಜು, ಪುಟ್ಟಸ್ವಾಮಿ, ನರೇಂದ್ರ, ಶಿವನಂಜಯ್ಯ, ಲತಾ, ನರಸಮ್ಮ, ರಾಮನಗರ ಜಿಲ್ಲೆ ಮಾತಾ ಗ್ರಾಮದ ನಾಗೇಶ್‌ ಶಿಕ್ಷೆಗೊಳಗಾದವರು. ಪ್ರಾಣ ಬೆದರಿಕೆ ಸೇರಿದಂತೆ ಆರೋಪಿಗಳ ಕಿರುಕುಳ ತಾಳಲಾರದೆ ಹೊಸವಾಗಿ ಗ್ರಾಮದ ನರಸಿಂಹನಾಯ್ಕ 2015ರ ಏ.9ರಂದು ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾಗಿದ್ದರು.

ಈ ಬಗ್ಗೆ ಪ್ರಕರಣ ದಾಖಲಿಸಿದ್ದ ಕೊಪ್ಪ ಪೊಲೀಸರು, ನ್ಯಾಯಾಲಯಕ್ಕೆ ದೋಷಾರೋಪಣೆ ಪಟ್ಟಿ ಸಲ್ಲಿಸಿದ್ದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಧೀಶರು ಆರೋಪಿಗಳ ಮೇಲಿನ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಈ ಶಿಕ್ಷೆ ಮತ್ತು ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ. ಸರಕಾರದ ಪರವಾಗಿ ವಕೀಲ ಎಚ್‌.ಇ. ಚಿನ್ನಪ್ಪ ವಕಾಲತ್ತು ವಹಿಸಿದ್ದರು.