ಇದು ವಿಜಯೋತ್ಸವ ಆಚರಿಸುವ ಸಮಯವಲ್ಲ: ಡಾ.ರವೀಂದ್ರ

ಮಂಡ್ಯ: ತಮಿಳುನಾಡಿಗೆ ನೀರು ಬಿಡುವಂತೆ ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರದ ಆದೇಶ ಬಂದಿದೆ. ರೈತರು ಸಂಕಷ್ಟದಲ್ಲಿದ್ದಾರೆ. ಹೀಗಾಗಿ ಇದು ಇದು ವಿಜಯೋತ್ಸವ ಆಚರಿಸುವ ಸಂದರ್ಭವಲ್ಲ. ಬದಲಿಗೆ ಜಿಲ್ಲೆಯ ಜನರ ಕಷ್ಟಗಳಿಗೆ ಸ್ಪಂದಿಸಬೇಕಾಗಿದೆ ಎಂದು ಅಖಿಲ ಭಾರತ ವೈದ್ಯಕೀಯ ಸಂಘದ ರಾಜ್ಯ ಘಟಕದ ಮಾಜಿ ಅಧ್ಯಕ್ಷ, ಕಾಂಗ್ರೆಸ್‌ ಮುಖಂಡ ಡಾ.ಎಚ್‌.ಎನ್‌.ರವೀಂದ್ರ ಹೇಳಿದರು.

ನಗರದ ಸಿಲ್ವರ್‌ಜ್ಯೂಬಿಲಿ ಪಾರ್ಕಿನಲ್ಲಿ ಬುಧವಾರ ನಡೆದ ಅಂಬರೀಶ್‌ ಅವರ 67ನೇ ಜಯಂತ್ಯುತ್ಸವ ಮತ್ತು ಕೃತಜ್ಞತಾ ಸಮಾವೇಶದಲ್ಲಿ ಮಾತನಾಡಿದ ಅವರು, ''ಕಾವೇರಿ ನದಿ ನೀರು ನಿರ್ವಹಣಾ ಮಂಡಳಿ ಕೇಂದ್ರ ಮತ್ತು ರಾಜ್ಯ ಸರಕಾರದ ಅಧೀನದಲ್ಲಿಲ್ಲ. ಅದು ಸುಪ್ರೀಂ ಕೋರ್ಟ್‌ನ ಅಧೀನದಲ್ಲಿದೆ. ಸರ್ವ ಪಕ್ಷಗಳ ಜತೆಗೂಡಿ ಕಾವೇರಿ ನೀರನ್ನು ಉಳಿಸಿಕೊಳ್ಳೋಣ. ಅಮ್ಮನ ಸಾರಥಿಯಾಗಿ ನಾವು ಇರುತ್ತೇವೆ,''ಎಂದರು.

''ಅಂಬರೀಷ್‌ ಮತ್ತು ಸುಮಲತಾ ಅವರನ್ನು ಟೀಕಿಸಿದವರಿಗೆ ಜನರೇ ಉತ್ತರ ಕೊಟ್ಟಿದ್ದಾರೆ. ಕೆಣಕಿ, ಕೆಣಕಿ ಹೊಡೆಸಿಕೊಂಡು ಬಿಟ್ರು. ಡಕೋಟಾ ಎಕ್ಸ್ಸ್‌ಪ್ರೆಸ್‌ನ್ನು ಏಕೆ ಮರೆತರೋ ಗೊತ್ತಿಲ್ಲ,'' ಎಂದು ಟೀಕಿಸಿದ ಅವರು, ''ಗಣಿಗಾರಿಕೆಯಿಂದಾಗಿ ಕೆಆರ್‌ಎಸ್‌ ಅಣೆಕಟ್ಟೆ ಬಿರುಕು ಬಿಟ್ಟಿದೆ. ಇದಕ್ಕೆ ಕಾರಣರಾದವರು ಜೈಲಿಗೆ ಹೋಗಲೇಬೇಕು. ಇಲ್ಲದಿದ್ದರೆ ಮತ್ತೆ ಮಂಡ್ಯ ಜಿಲ್ಲೆಯಲ್ಲಿ ಹುರುಳಿ ಬಿತ್ತಬೇಕಾಗುತ್ತದೆ. ಮೊದಲು ಜನರು ಅಂಧಾಭಿಮಾನವನ್ನು ಬಿಡಬೇಕು,'' ಎಂದು ಮಾರ್ಮಿಕವಾಗಿ ನುಡಿದರು.