ನೂರಡಿಯತ್ತ ಕೆಆರ್‌ಎಸ್‌ ನೀರಿನ ಮಟ್ಟ

ಮಂಡ್ಯ: ಕೆಆರ್‌ಎಸ್‌ ಜಲಾಶಯದ ನೀರಿನ ಮಟ್ಟ ನೂರರ ಗಡಿಯತ್ತ ತಲುಪಿದೆ. ಶನಿವಾರ ಸಂಜೆ ವೇಳೆಗೆ 99.60 ಅಡಿಗೇರಿದ್ದ ಜಲಾಶಯಕ್ಕೆ 28,132 ಕ್ಯೂಸೆಕ್‌ ನೀರು ಹರಿದು ಬರುತ್ತಿದೆ.

ಜಲಾಶಯವು ನೂರಡಿ ತಲುಪಲು ಕೇವಲ 0.40 ಅಡಿಯಷ್ಟೇ ಬಾಕಿಯಿದೆ. ಕಾವೇರಿ ಕಣಿವೆ ಭಾಗದಲ್ಲಿ ಉತ್ತಮ ಮಳೆಯಾಗಿದ್ದರಿಂದ ಈ ವರ್ಷ ಕೆಆರ್‌ಎಸ್‌ ಜಲಾಶಯದ ನೀರಿನ ಮಟ್ಟ ಬಲುಬೇಗ ನೂರರ ಗಡಿಯತ್ತ ಸಾಗಿದೆ. ಇದರೊಂದಿಗೆ ಮೂರು ವರ್ಷಗಳ ಬಳಿಕ ಜಲಾಶಯವು ಭರ್ತಿಯಾಗುವ ಮುನ್ಸೂಚನೆ ನೀಡಿದೆ.

ಕಳೆದೆರಡು ದಿನಗಳಿಂದ ಕೊಡಗಿನಲ್ಲಿ ಮಳೆ ಪ್ರಮಾಣ ಕಡಿಮೆಯಾಗಿರುವ ಹಿನ್ನೆಲೆಯಲ್ಲಿ ಜಲಾಶಯದ ಒಳ ಹರಿವಿನ ಪ್ರಮಾಣವೂ ಕುಸಿದಿದೆ. ಶುಕ್ರವಾರ ಬೆಳಗ್ಗೆ ಕಾವೇರಿ ನದಿ ಮೂಲಕ 29715 ಕ್ಯೂಸೆಕ್‌ ನೀರು ಹರಿದು ಬರುತ್ತಿತ್ತು. ಈ ಪ್ರಮಾಣ ಸಂಜೆ ವೇಳೆಗೆ 27,851 ಕ್ಯೂಸೆಕ್‌ಗೆ ಕ್ಷೀಣಿಸಿತ್ತು. ಜೂ.15ರಂದು 32,555 ಕ್ಯೂಸೆಕ್‌ ಇದ್ದ ಒಳ ಹರಿವಿನ ಪ್ರಮಾಣವು ಶನಿವಾರ ಬೆಳಗ್ಗೆ 31,037 ಕ್ಯೂಸೆಕ್‌ ಇಳಿದಿದೆ. ಸಂಜೆ ವೇಳೆಗೆ 28,132 ಕ್ಯೂಸೆಕ್‌ಗೆ ಕುಸಿದಿದೆ.

ಭಾನುವಾರದ ನಂತರ ಒಳ ಹರಿವು ಇನ್ನಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ. ಮತ್ತೆ ಕೊಡಗು ಮತ್ತು ವೈನಾಡು ಪ್ರದೇಶದಲ್ಲಿ ಉತ್ತಮ ಮಳೆಯಾದರಷ್ಟೇ ಒಳ ಹರಿವಿನ ಪ್ರಮಾಣ ಹೆಚ್ಚಲಿದೆ. ಕಳೆದ ವರ್ಷ ಇದೇ ದಿನದಂದು 1515 ಕ್ಯೂಸೆಕ್‌ ಒಳ ಹರಿವು, 859 ಕ್ಯೂಸೆಕ್‌ ಹೊರ ಹರಿವಿನೊಂದಿಗೆ ಜಲಾಶಯದ ನೀರಿನ ಮಟ್ಟವು 67.78 ಅಡಿ ಇತ್ತು. ಕಳೆದ ವರ್ಷಕ್ಕೂ ಈ ವರ್ಷಕ್ಕೂ 31.82 ಅಡಿ ನೀರು ಹೆಚ್ಚಾಗಿದೆ.