ಮಲ್ಲಿಕಾ ಘಂಟಿಯವರಿಂದ ಧಾರ್ಮಿಕ ಭಾವನೆಗೆ ಧಕ್ಕೆ : ಅಯ್ಯಪ್ಪ ಭಕ್ತರಿಂದ ದೂರು

ಮೂಡುಬಿದಿರೆ: ಇಲ್ಲಿ ನಡೆದ ಆಳ್ವಾಸ್‌ ನುಡಿಸಿರಿಯ ಅಧ್ಯಕ್ಷ ತೆ ವಹಿಸಿದ್ದ ಮಲ್ಲಿಕಾ ಘಂಟಿ, ಶಬರಿಮಲೆಯಲ್ಲಿ ಎಲ್ಲಾ ವಯೋಮಾನದ ಹೆಣ್ಣು ಮಕ್ಕಳಿಗೆ ಪ್ರವೇಶ ನೀಡದಿರುವುದು ಸರಿಯಲ್ಲ ಎಂದು ಸಮರ್ಥನೆ ಮಾಡಿ ಭಕ್ತರು ಮತ್ತು ದೇವಳದ ಧಾರ್ಮಿಕ ನಿಲುವುಗಳಿಗೆ ಅಪಚಾರ ಮಾಡಿದ್ದು ಅದನ್ನು ಖಂಡಿಸಿ ಅಯ್ಯಪ್ಪ ಭಕ್ತ ವೃಂದ ಆಳ್ವಾಸ್‌ ಶಿಕ್ಷ ಣ ಪ್ರತಿಷ್ಠಾನದ ಅಧ್ಯಕ್ಷ ಡಾ.ಎಂ. ಮೋಹನ ಆಳ್ವರಿಗೆ ಖಂಡನಾ ಪತ್ರ ನೀಡಿದೆ.

ಮಹಿಳೆಯರ ಋುತುಚಕ್ರದ ಸಮಯ ಮಹಿಳೆಯರು ದೇವಸ್ಥಾನ ಪ್ರವೇಶಿಸುವುದಿಲ್ಲ. ಮನೆಯ ದೇವರ ಕೋಣೆಯನ್ನೂ ಪ್ರವೇಶಿಸುವುದಿಲ್ಲ. ಸಾಹಿತ್ಯದ ವೇದಿಕೆಯಲ್ಲಿ ಧಾರ್ಮಿಕತೆಯನ್ನು ಎಳೆದು ತಂದು ಮಾತನಾಡಿರುವುದು ಧಾರ್ಮಿಕ ಭಾವನೆಗಳಿಗೆ ನೋವುಂಟುಮಾಡಿದ್ದು ಬಿಟ್ಟರೆ ಅಲ್ಲಿ ಸಮಾನತೆ, ಸಾಮಾಜಿಕ ಕಳಕಳಿಯ ನಿಲುವು ಇರಲಿಲ್ಲ ಎಂದು ಪತ್ರದಲ್ಲಿ ತಿಳಿಸಿದ್ದಾರೆ.

ಘಂಟಿಯವರು ಶಬರಿಮಲೆ ಬಗ್ಗೆ ಸ್ಪಷ್ಟತೆ ಇಲ್ಲದೆ ಮಾತನಾಡಿರುವುದು ಮೇಲ್ನೋಟಕ್ಕೆ ಖಚಿತವಾಗಿದೆ. ಅಯ್ಯಪ್ಪ ದೇವರ ಲಕ್ಷಾಂತರ ಮಹಿಳಾ ಭಕ್ತರು ತೀರ್ಪನ್ನು ವಿರೋಧಿಸಿ ಹೋರಾಟ ಮಾಡುತ್ತಿದ್ದಾರೆ. ಬೆರಳೆಣಿಕೆಯ ಮಹಿಳೆಯರು ಪ್ರಚಾರಗಿಟ್ಟಿಸಿಕೊಳ್ಳುವ ನಿಟ್ಟಿನಲ್ಲಿ ವಿರುದ್ಧವಾಗಿ ಮಾತನಾಡುತ್ತಾರೆ. ಒಂದು ಧರ್ಮದ ಧಾರ್ಮಿಕ ಭಾವನೆಗಳನ್ನು ಘಾಸಿಗೊಳಿಸಿ ಆನಂದಿಸುವ ಎಡಪಂಥೀಯರ ನಿಲುವುಗಳನ್ನು ಖಂಡಿಸುವುದಾಗಿ ಅವರು ಪತ್ರದಲ್ಲಿ ತಿಳಿಸಿದ್ದಾರೆ. ಈÜ ಸಂದರ್ಭದಲ್ಲಿ ಸುದರ್ಶನ ಎಂ., ರಾಘು ಗುರುಸ್ವಾಮಿ, ನವೀನ್‌ ಗುರುಸ್ವಾಮಿ, ವಿಶ್ವನಾಥ, ಮುರಳೀಧರ್‌, ಸತೀಶ್‌ ಉಪಸ್ಥಿತರಿದ್ದರು.