ಕಾರ್ಗೊ ಕಂಟೈನರ್‌ ಟ್ರ್ಯಾಕಿಂಗ್‌ ವ್ಯವಸ್ಥೆಗೆ ಚಾಲನೆ

ಮಂಗಳೂರು : ಕಾರ್ಗೊ ಮೂಲಕ ಕಳುಹಿಸಿದ ಕಂಟೈನರ್‌ಗಳನ್ನು ಇನ್ನು ಸುಲಭವಾಗಿ ಕಂಡುಹಿಡಿಯಬಹುದು. ಅದು ಯಾವ ಸ್ಥಳದಲ್ಲಿದೆ ಮತ್ತು ಯಾವ ವಾಹನದಲ್ಲಿ ಸಾಗಾಟ ಮಾಡಲಾಗುತ್ತಿದೆ ಎಂಬುದನ್ನು ಪತ್ತೆಹಚ್ಚುವ ಹೊಸ ವ್ಯವಸ್ಥೆಗೆ ನವಮಂಗಳೂರು ಬಂದರಿನಲ್ಲಿ ಬುಧವಾರ ಚಾಲನೆ ನೀಡಲಾಗಿದೆ.

ಡಿಎಂಐಸಿಡಿಸಿ ಲೊಜಿಸ್ಟಿಕ್‌ ಡಾಟಾ ಸರ್ವಿಸಸ್‌ ಲಿ.(ಡಿಎಲ್‌ಡಿಎಸ್‌) ಮತ್ತು ಎನ್‌ಎಂಪಿಟಿ ಜಂಟಿಯಾಗಿ ಆರಂಭಿಸಿರುವ ವ್ಯವಸ್ಥೆಗೆ ಡಿಎಲ್‌ಡಿಎಸ್‌ನ ಮುಖ್ಯ ನಿರ್ವಹಣಾ ಅಧಿಕಾರಿ ಸುರಜಿತ್‌ ಸರ್ಕಾರ್‌ ಚಾಲನೆ ನೀಡಿದರು.

2016ರಲ್ಲಿ ಮುಂಬಯಿ ಜೆಎನ್‌ಪಿಟಿಯಲ್ಲಿ ಪ್ರಾಯೋಗಿಕ ನೆಲೆಯಲ್ಲಿ ಕಂಟೈನರ್‌ ಟ್ರ್ಯಾಕಿಂಗ್‌ ಸೌಲಭ್ಯ ಆರಂಭಿಸಿದ್ದು, 2017ರಲ್ಲಿ ಮುಂದ್ರ ಬಂದರ್‌ಗೆ ವಿಸ್ತರಿಸಲಾಯಿತು.

ಕಳೆದ ತಿಂಗಳು ಚೆನ್ನೈ, ವಿಶಾಖಪಟ್ಟಣನಲ್ಲಿ ಆರಂಭಿಸಿದ್ದು, ನಾಳೆ ಟುಟಿಕೊರಿನ್‌, ಕಟ್ಟುಪಳ್ಳಿನಲ್ಲಿ ಬಂದರಿನಲ್ಲಿ ಚಾಲನೆ ನೀಡಲಾಗುವುದು. ಡಿಸೆಂಬರ್‌ ಅಂತ್ಯಕ್ಕೆ ದಕ್ಷಿಣದ ಎಲ್ಲ ಹಾಗೂ ಮುಂದೆ ಹಲ್ದಿಯಾ ಬಂದರಿನಲ್ಲಿ ಆರಂಭಿಸಿ, ಸಮಗ್ರ ಸಂಪರ್ಕ ಕಲ್ಪಿಸಲಾಗುವುದು ಎಂದು ಸರ್ಕಾರ್‌ ಹೇಳಿದರು.

ಡಿಎಲ್‌ಡಿಸಿಯು ಕೇಂದ್ರ ಸರಕಾರದ ರಾಷ್ಟ್ರೀಯ ಕೈಗಾರಿಕಾ ಕಾರಿಡಾರ್‌ ಅಭಿವೃದ್ಧಿ ಮತ್ತು ಅನುಷ್ಠಾನ ಟ್ರಸ್ಟ್‌ (ಎನ್‌ಐಸಿಡಿಐಟಿ) ಹಾಗೂ ಜಪಾನ್‌ನ ಪ್ರಮುಖ ಐಟಿ ಕಂಪನಿ ಎನ್‌ಇಸಿ ಕಾರ್ಪೊರೇಶನ್‌ನ ಜಂಟಿ ಯೋಜನೆಯಾಗಿದ್ದು, 50:50 ಪಾಲು ಬಂಡವಾಳ ಹೊಂದಿವೆ. ಕಂಟೈನರ್‌ಗಳ ಮೇಲೆ ನಿಗಾ ಇಡಲು ಆಧುನಿಕ ತಂತ್ರಜ್ಞಾನ ಬಳಸಲಾಗುತ್ತಿದೆ. ಕಂಟೈನರ್‌ ಮೇಲೆ ಇಡುವ ಪುಟ್ಟ ಸಾಧನ ಮತ್ತು ಕೈಯಂತ್ರದ ಮೂಲಕ ಕಂಟೈನರ್‌ ಎಲ್ಲಿದೆ ಎಂಬುದನ್ನು ವೆಬ್‌ಸೈಟ್‌ನಲ್ಲಿ ನಿಂತಲ್ಲಿಂದಲೇ ಗಮನಿಸುವ ತಂತ್ರಜ್ಞಾನ ಅಳವಡಿಸಲಾಗಿದೆ ಎಂದರು.

ಡಿಎಲ್‌ಡಿಎಸ್‌ ಎಂಡಿ ಮತ್ತು ಸಿಇಒ ಅಲ್ಕೇಶ್‌ ಕುಮಾರ್‌ ಶರ್ಮಾ, ಎನ್‌ಎಂಪಿಟಿ ಕಾರ್ಯದರ್ಶಿ ಲೆಫ್ಟಿನೆಂಟ್‌ ಕರ್ನಲ್‌ ಬಿಜು ವಾರಿಯರ್‌, ಮುಖ್ಯ ವಿಚಕ್ಷಣ ಅಧಿಕಾರಿ ಶ್ರೀಕೃಷ್ಣ ಕಸ್ತೂರಿ, ಟ್ರಾಪಿಕ್‌ ಮ್ಯಾನೇಜರ್‌ ವೈ.ಆರ್‌.ಬೆಳಗಲ್‌, ಹಣಕಾಸು ಅಧಿಕಾರಿ ಸಿ.ರಮಣಿ, ಚೀಫ್‌ ಎಂಜಿನಿಯರ್‌ ಎಚ್‌.ಎನ್‌.ಅಶ್ವತ್ಥ್‌, ಚೀಫ್‌ ಮೆಕ್ಯಾನಿಕಲ್‌ ಎಂಜಿನಿಯರ್‌ ಸತೀಶ್‌ ಹೊನ್ನಕಟ್ಟೆ, ಉಪಸಂರಕ್ಷಣಾಧಿಕಾರಿ ಎಸ್‌.ಆರ್‌. ಪಟ್ಟಾನಾಯಕ್‌ ಉಪಸ್ಥಿತರಿದ್ದರು.