ವಂಡರ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌ ಬರೆದ 5 ವರ್ಷದ ಕುಡ್ಲದ ಪೋರ

ವಿಜಯ ಕೋಟ್ಯಾನ್‌ ಮಂಗಳೂರು

ಆತ 5 ವರ್ಷದ ಪೋರ. ಮಾತು ನಿರರ್ಗಳ. ವಿಶ್ವದ ಯಾವುದೇ ರಾಷ್ಟ್ರದ ಧ್ವಜ ತೋರಿಸಿದರೂ ಕ್ಷಣ ಮಾತ್ರದಲ್ಲಿ ಗುರುತಿಸುವಷ್ಟು ಚಾಣಕ್ಯ. ಈ ರೀತಿಯ ವಿಭಿನ್ನ ಸಾಧನೆಗಳಿಂದ ಮಿಂಚಿದ ಈ ಪುಟ್ಟ ಬಾಲಕ ಈಗ 36 ನಿಮಿಷಗಳ ಕಾಲ ತುಳುವಿನಲ್ಲೇ ಪೊಲಿ, ಪಾಡ್ದನ, ನುಡಿಕಟ್ಟು, ಪಾರಿ ಹೇಳುವ ಮೂಲಕ ವಂಡರ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌ನಲ್ಲಿ ದಾಖಲೆ ಬರೆದಿದ್ದಾನೆ.

ದೇರೆಬೈಲ್‌ ಕೊಂಚಾಡಿ ಮಹೇಶ್‌ ದೇವಾಡಿಗ ಮತ್ತು ಕಿರಣ ದೇವಾಡಿಗ ಅವರ ಪುತ್ರ ತಕ್ಷಿಲ್‌ ಎಂ. ದೇವಾಡಿಗ ಈ ಸಾಧನೆ ಮಾಡಿದಾತ. 2 ವರ್ಷದವನಿರುವಾಗ ನಿರರ್ಗಳವಾಗಿ ತುಳು ಮಾತನಾಡಿ ಕರಾವಳಿ ಲಿಟ್ಲ್‌ ಸ್ಟಾರ್‌ ಪ್ರಶಸ್ತಿ ಪಡೆದುಕೊಂಡಿದ್ದ. ಈತನ ಸಾಧನೆ ನೋಡಿದ ಪೋಷಕರು, ಜಾನಪದ ವಿದ್ವಾಂಸ ದಯಾನಂದ್‌ ಕತ್ತಲ್‌ಸಾರ್‌ ಅವರ ಮೂಲಕ ತುಳು ಭಾಷೆಯ ಬಗ್ಗೆ ಮತ್ತಷ್ಟು ಕಲಿಸಲು ಪ್ರೋತ್ಸಾಹಿಸಿದರು. ಅದರಂತೆ ತುಳು ಪದ ಬಳಕೆ ಅರಿತುಕೊಂಡ ತಕ್ಷಿಲ್‌, ಪಾಡ್ದನ, ಬಲೀಂದ್ರ ಪೊಲಿ, ದೈವದ ಪಾರಿ, ಪಾಡ್ದನ ಕಲಿತುಕೊಳ್ಳುತ್ತಾನೆ. ದಯಾನಂದ್‌ ಕತ್ತಲ್‌ಸಾರ್‌ ಹೇಳಿಕೊಟ್ಟ ಶಬ್ದಗಳನ್ನು ತಾಯಿಯ ಮೂಲಕ ಕರಗತಮಾಡಿಕೊಂಡಿದ್ದ. ಬಾಲಕನ ಸಾಧನೆ ಗಮನಿಸಿದ ಪೋಷಕರು ಈ ತುಳು ಗೊಂಚಲುಗಳನ್ನು ಸೇರಿಸಿ 36 ನಿಮಿಷಗಳ ನಾನ್‌ಸ್ಟಾಪ್‌ ವೀಡಿಯೋ ಮಾಡಿ 'ವಂಡರ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌'ಗೆ ಕಳುಹಿಸಿಕೊಟ್ಟಿದ್ದರು.


5 ವರ್ಷದ ಬಾಲಕನ ತುಳು ಭಾಷಾ ಪ್ರೌಢಿಮೆ, ಮಾತಿನ ಶೈಲಿ ನೋಡಿದ ತೀರ್ಪುಗಾರರು 'ವಂಡರ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌'ಗೆ ಈತನ ಹೆಸರನ್ನು ಸೇರ್ಪಡೆಗೊಳಿಸಿದ್ದು, ಬಾಲಕನ ಪ್ರತಿಭೆಗೆ ಸಂದ ಮತ್ತೊಂದು ಅತ್ಯುನ್ನತ ಗೌರವಾಗಿದೆ. ಈತನ ಸಾಧನೆ ಸಾಮಾಜಿಕ ಜಾಲತಾಣದಲ್ಲೂ ವೈರಲ್‌ ಆಗುತ್ತಿದೆ.

ಬಾಲ್ಯದಿಂದಲೇ ಸಾಧನೆ: ದೇರೆಬೈಲ್‌ನ ವೃಂದಾವನ್‌ ಪ್ಲೇ ಎಂಡ್‌ ನರ್ಸರಿಯಲ್ಲಿ ಎಲ್‌ಕೆಜಿ ಓದುತ್ತಿರುವ ಈ ಬಾಲಕ 4 ತಿಂಗಳ ಮಗುವಿರುವಾಗ ಕದ್ರಿ, ಕಾವೂರಿನಲ್ಲಿ ನಡೆದ ಕೃಷ್ಣವೇಷ ಸ್ಪರ್ಧೆಯಲ್ಲಿ ಮೊದಲ ಬಹುಮಾನ ಗಳಿಸಿದ್ದ. ನಾನಾ ಕಡೆ 400ಕ್ಕೂ ಅಧಿಕ ವೇದಿಕೆಯಲ್ಲಿ ಕಾರ್ಯಕ್ರಮ ನೀಡಿದ್ದಾನೆ. ಇದೀಗ ತಕ್ಷಿಲ್‌, ಸುಧಾಕರ ದೇವಾಡಿಗ ಎಂಬವರಿಂದ ಸ್ಯಾಕ್ಸೋಫೋನ್‌, ಪ್ರವೀಣ್‌ ಕಾಮತ್‌ ಅವರಿಂದ ಚೆಸ್‌ ತರಬೇತಿ ಪಡೆಯುತ್ತಿದ್ದು, ರಾಷ್ಟ್ರಮಟ್ಟದಲ್ಲಿ ಮಿಂಚುತ್ತಿದ್ದಾನೆ. ಕಟೀಲು ಮಕ್ಕಳ ಮೇಳದ ರಾಜೇಶ್‌ ಆಚಾರ್ಯ ಅವರ ಮಾರ್ಗದರ್ಶನದಲ್ಲಿ 2 ವರ್ಷದಿಂದ ಯಕ್ಷನಾಟ್ಯ ತರಬೇತಿಯನ್ನೂ ಕಲಿಯುತ್ತಿದ್ದಾನೆ.

ಏನಿದು ವಂಡರ್‌ ಬುಕ್‌ ಆಫ್‌ ರೆಕಾರ್ಡ್‌ ?

ವಂಡರ್‌ ಬುಕ್‌ ಆಫ್‌ ರೆಕಾರ್ಡ್‌ ಸಂಘಟನೆ 2010ರಲ್ಲಿ ಮಹಾರಾಷ್ಟ್ರದಲ್ಲಿ ಪ್ರಾರಂಭವಾಗಿದೆ. ಇದು ಮುಂಬೈ ಆಧಾರಿತವಾಗಿದ್ದು, ನೀಲಂ ಎನ್ನುವವರು ಮುಖ್ಯಸ್ಥರಾಗಿದ್ದಾರೆ. ಡಬ್ಲ್ಯುಬಿಆರ್‌ ಅಂತಾರಾಷ್ಟ್ರೀಯ ದಾಖಲೆಗಳ ಹಕ್ಕನ್ನು ಹೊಂದಿದ್ದು, ಅದ್ಭುತ ಪ್ರತಿಭೆಗಳನ್ನು ಪ್ರಸ್ತುತಪಡಿಸುವ ವೇದಿಕೆಯಾಗಿದೆ.