ಮಂಗಳೂರು ಏರ್‌ಪೋರ್ಟ್‌ನಲ್ಲಿ 7 ಕೋಟಿ ಮೌಲ್ಯದ ಚಿನ್ನ ವಶ

ಮಂಗಳೂರು: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಅಕ್ರಮ ಚಿನ್ನ ಕಳ್ಳಸಾಗಾಟಕ್ಕೆ ಸಂಬಂಧಿಸಿದಂತೆ ಈ ವರ್ಷ ಜೂನ್‌ ಅಂತ್ಯದ ವರೆಗೆ ಒಟ್ಟು 7.06 ಕೋಟಿ ರೂ. ಮೌಲ್ಯದ 22.97 ಕೆಜಿ ಚಿನ್ನವನ್ನು ವಶಡಿಸಿಕೊಳ್ಳಲಾಗಿದೆ ಎಂದು ಕಸ್ಟಮ್ಸ್‌ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಮುಟ್ಟುಗೋಲು ಹಾಕಿದ ಒಟ್ಟು 22.97 ಕೆಜಿ ಚಿನ್ನದಲ್ಲಿ 12.59 ಕೆಜಿ ಚಿನ್ನವನ್ನು ಕಳ್ಳಸಾಗಾಟ ಮಾಡುವ ವ್ಯಕ್ತಿಗಳಿಂದಲೇ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ. ದೇಶದೊಳಗೆ ಸಂಚರಿಸುವ ವಿಮಾನಗಳಲ್ಲಿ ವಿದೇಶದ ಚಿನ್ನ ಸಾಗಾಟ ಮಾಡಿರುವ ಐದು ಪ್ರಕರಣಗಳು ಇದೇ ಅವಧಿಯಲ್ಲಿ ನಡೆದಿದ್ದು, ಇದರಲ್ಲಿ 1.98 ಕೋಟಿ ರೂ. ವೆಚ್ಚದ ಚಿನ್ನ ವಶಪಡಿಸಿಕೊಳ್ಳಲಾಗಿದೆ.

ಚಿನ್ನ ಹೊರತುಪಡಿಸಿ, 69.24 ಲಕ್ಷದಷ್ಟು ವಿದೇಶಿ ಕರೆನ್ಸಿ ನೋಟುಗಳನ್ನೂ ಕೂಡಾ ವಶಕ್ಕೆ ಪಡೆಯಲಾಗಿದೆ. 10 ಪ್ರಕರಣಗಳು ವಿಮಾನ ಪ್ರಯಾಣಿಕರ ಮೇಲೆ ದಾಖಲಾಗಿವೆ. ಮೂವರು ಆರೋಪಿಗಳನ್ನು ಬಂಧಿಸಲಾಗಿದೆ. ಈ ಅಕ್ರಮಗಳಲ್ಲಿ ಕೇರಳ ಮತ್ತು ಭಟ್ಕಳದ ಪ್ರಯಾಣಿಕರೇ ಹೆಚ್ಚಾಗಿ ಇರುವುದು ಕಂಡುಬಂದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಚಪ್ಪಲಿ, ಬಕಲ್ಸ್‌, ಚಾಕೋಲೇಟ್‌ ರಾರ‍ಯಪರ್ಸ್‌, ಟೂಥ್‌ ಪೇಸ್ಟ್‌, ಗಮ್‌ ಕವರ್‌ಗಳಲ್ಲಿ, ವಯರ್‌, ಬುರ್ಕಾ ಜಿಪ್‌, ಬ್ಯಾಗ್‌ ಜಿಪ್‌, ಬೆಳ್ಳಿಯ ಬಣ್ಣ ಲೇಪಿಸಿ, ಮೊಬೈಲ್‌ ಚಾರ್ಜರ್‌, ಸಲಾಡ್‌ ತಯಾರಿಕೆ ಯಂತ್ರದ ಒಳಗಡೆ ಇಟ್ಟು ಅಕ್ರಮ ಸಾಗಾಟ ಮಾಡುತ್ತಿರುವುದನ್ನು ಪತ್ತೆ ಮಾಡಿದ್ದಾರೆ. ಇದುವರೆಗೆ ಒಟ್ಟು 40 ಪ್ರಕರಣ ದಾಖಲಿಸಲಾಗಿದೆ.

ವಿಮಾನದ ಮೂಲಕ ಚಿನ್ನವನ್ನು ವಿವಿಧ ವಿಧಾನಗಳಲ್ಲಿ ಸಾಗಾಟ ಮಾಡಿದ್ದರೂ, ಅಧಿಕಾರಿಗಳು ಅವುಗಳನ್ನು ಪತ್ತೆ ಮಾಡಿ ವಶಪಡಿಸಿಕೊಳ್ಳುವಲ್ಲಿ ಸಫಲರಾಗಿದ್ದಾರೆ. ಅದಕ್ಕಾಗಿ ಸೂಕ್ತ ವಿಶೇಷ ಸಲಕರಣೆಗಳನ್ನೂ ಹೊಂದಲಾಗಿದೆ ಎಂದು ಕಸ್ಟಮ್ಸ್‌ ಇಲಾಖೆ ಪ್ರಕಟಣೆ ತಿಳಿಸಿದೆ.