- ಮುಹಮ್ಮದ್‌ ಆರಿಫ್‌ ಮಂಗಳೂರು
ಸೌದಿ ಅರೇಬಿಯಾದ ಈ ನಿರ್ಬಂಧದ ದುರ್ಲಾಭವನ್ನು ಕೆಲವು ಟ್ರಾವೆಲಿಂಗ್‌ ಏಜೆನ್ಸಿಗಳು ಪಡೆಯುತ್ತಿದ್ದರು. ಒಟ್ಟು ಪ್ಯಾಕೇಜ್‌ ಮೊತ್ತವನ್ನು 1.5 ಲಕ್ಷ ರೂ.ನಿಂದ 2 ಲಕ್ಷ ರೂ. ತನಕ ಫಿಕ್ಸ್‌ ಮಾಡಿದ್ದರು. ವಿಮಾನ ಟಿಕೆಟ್‌ ವೆಚ್ಚ 10 - 20 ಸಾವಿರ ರೂ.ನಿಂದ 2 ಲಕ್ಷ ರೂ. ತನಕ ತೆರುವ ಜತೆಗೆ, ಪ್ರಯಾಣ ತ್ರಾಸದಾಯಕವಾಗಿತ್ತು.
ಪ್ರಯಾಣಿಕರು ಎರಡು ಡೋಸ್‌ ವ್ಯಾಕ್ಸಿನ್‌ ಪಡೆದಿರಬೇಕು. ವಿಮಾನದಲ್ಲಿ ಪ್ರಯಾಣ ಮಾಡುವುದಕ್ಕಿಂತ 72 ಗಂಟೆಯೊಳಗೆ 500 ರೂ. ಪಾವತಿಸಿ, ಕೋವಿಡ್ ಟೆಸ್ಟ್‌ ಮಾಡಿ, ನೆಗೆಟಿವ್‌ ಸರ್ಟಿಫಿಕೆಟ್‌ ಹೊಂದಿರಬೇಕು. ವಿಮಾನ ನಿಲ್ದಾಣಕ್ಕೆ 5 ಗಂಟೆ ಮೊದಲು ಬಂದು ಮತ್ತೆ 3 ಸಾವಿರ ರೂ. ನೀಡಿ ತಪಾಸಣೆ ಮಾಡಿಕೊಳ್ಳಬೇಕು. ಬೇರೆ ರಾಷ್ಟ್ರಕ್ಕೆ ಹೋಗಿ, ಅಲ್ಲಿಂದ 14 ದಿನಗಳ ಕ್ವಾರಂಟೈನ್‌ ಮುಗಿಸಿ, ಸೌದಿಗೆ ತೆರಳುವಾಗ ಪ್ರಯಾಣ ಸಾಕು ಸಾಕಾಗುತ್ತಿತ್ತು.
ಡಿ. 1ರಿಂದ ಬೇರೆ ರಾಷ್ಟ್ರಗಳಿಗೆ ಹೋಗಿ ಬರುವ ಪ್ರಮೇಯವಿಲ್ಲ. ಎರಡು ಲಸಿಕೆ ಪಡೆದುಕೊಂಡ ಭಾರತೀಯರು ನೇರವಾಗಿ ಸೌದಿ ಅರೇಬಿಯಾಕ್ಕೆ ತೆರಳಬಹುದು. ಸೌದಿ ಅರೇಬಿಯಾದಲ್ಲಿ 14 ದಿನಗಳ ಹೋಂ ಕ್ವಾರಂಟೈನ್‌ ಮುಗಿಸಿದರೆ ಸಾಕು. ಹೋಂ ಕ್ವಾರಂಟೈನ್‌ನಿಂದ ಬೇರೆ ಕಡೆಗೆ ಅಥವಾ ಕರ್ತವ್ಯಕ್ಕೆ ಹಾಜರಾಗಬಹುದು. ಈ ಹಿನ್ನೆಲೆಯಲ್ಲಿ ಸೌದಿಗೆ ಹಾಗೂ ಉಮ್ರಾ ಯಾತ್ರೆ ಕೈಗೊಳ್ಳಲು ಟಿಕೆಟ್‌ ಬುಕ್ಕಿಂಗ್‌ಗೆ ವಿಚಾರಣೆ ಆರಂಭಗೊಂಡಿದೆ ಎನ್ನುತ್ತಾರೆ ಟ್ರಾವೆಲಿಂಗ್‌ ಏಜೆಂಟ್‌ ಝಾಕಿರ್‌.
ಈಗಾಗಲೇ ಟಿಕೆಟ್‌ ಬುಕ್ಕಿಂಗ್‌ ಮಾಡಿದವರು ಹೆಚ್ಚು ಮೊತ್ತವೂ ಪಾವತಿಸಿದ್ದಾರೆ. ಬೇರೆ ದೇಶದಲ್ಲಿ ಕ್ವಾರಂಟೈನ್‌ ಮುಗಿಸಿ ಹೋಗಬೇಕು. ಸೌದಿ ಅರೇಬಿಯಾದಲ್ಲಿ ಉದ್ಯೋಗದಲ್ಲಿದ್ದು, ಅಲ್ಲೇ ಎರಡು ಡೋಸ್‌ ವ್ಯಾಕ್ಸಿನ್‌ ಪಡೆದು, ರಜೆಯಲ್ಲಿ ಊರಿಗೆ ಬಂದವರಿದ್ದರೆ, ಅವರಿಗೆ ಕ್ವಾರಂಟೈನ್‌ ನಿಯಮ ಅನ್ವಯಿಸುವುದಿಲ್ಲ ಎನ್ನುತ್ತಾರೆ ಕುಂದಾಪುರ ಕಂಡ್ಲೂರಿನ ಮುನಾಫ್‌.
ತಾನು ಸೌದಿ ಅರೇಬಿಯಾದಲ್ಲೇ ಎರಡು ಡೋಸ್‌ ವ್ಯಾಕ್ಸಿನ್‌ ಪಡೆದು, ಒಂದು ತಿಂಗಳ ರಜೆಯಲ್ಲಿ ಊರಿಗೆ ಬಂದಿದ್ದೆ. ಹಿಂದಿರುಗುವಾಗ 72 ಗಂಟೆಯೊಳಗಿನ ಆರ್‌ಟಿಪಿಸಿಆರ್‌ ನೆಗೆಟಿವ್‌ ರಿಪೋರ್ಟ್‌ ಮತ್ತು ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಮತ್ತೆ ಟೆಸ್ಟ್‌ ಮಾಡಿಸಬೇಕು. ಅಲ್ಲಿಂದ ದುಬೈಗೆ ತೆರಳಿ, ವಿಮಾನ ನಿಲ್ದಾಣದಲ್ಲೇ 8 ಗಂಟೆ ಉಳಿದು, ನಂತರ ಸೌದಿಗೆ ಹೋಗುತ್ತೇನೆ. ಅಲ್ಲಿ ಯಾವುದೇ ಕ್ವಾರಂಟೈನ್‌ ಇಲ್ಲ ಎಂದು ವಿವರಿಸುತ್ತಾರೆ ಸೌದಿಯಲ್ಲಿ ಉದ್ಯೋಗದಲ್ಲಿರುವ ಕಂಡ್ಲೂರಿನ ಮುನಾಫ್‌.