ಆಳ್ವಾಸ್‌ ಪ್ರಗತಿ ಉದ್ಯೋಗ ಮೇಳದಲ್ಲಿ 1,712 ಮಂದಿ ನೇರ ನೇಮಕ

ಮೂಡುಬಿದಿರೆ: ಆಳ್ವಾಸ್‌ ಶಿಕ್ಷ ಣ ಪ್ರತಿಷ್ಠಾನದ ವತಿಯಿಂದ ನಡೆದ ಆಳ್ವಾಸ್‌ ಪ್ರಗತಿ ಉದ್ಯೋಗ ಮೇಳ-2019 ಶನಿವಾರ ಮುಕ್ತಾಯಗೊಂಡಿದ್ದು, 1,712 ಮಂದಿ ನೇರ ನೇಮಕಾತಿ ಹೊಂದಿದ್ದಾರೆ.

ಒಟ್ಟು 8,453 ಉದ್ಯೋಗಾಕಾಂಕ್ಷಿಗಳು ಪಾಲ್ಗೊಂಡಿದ್ದು, 208 ಪ್ರತಿಷ್ಠಿತ ಕಂಪನಿಗಳು ಈ ಉದ್ಯೋಗ ಮೇಳದಲ್ಲಿ ಭಾಗವಹಿಸಿದ್ದವು. 3,697 ಮಂದಿ ಮುಂದಿನ ಹಂತದ ಪ್ರಕ್ರಿಯೆಗೆ ಆಯ್ಕೆಯಾಗಿದ್ದಾರೆ.

ಶನಿವಾರ ನಡೆದ ಸಂದರ್ಶನದಲ್ಲಿ ಕೋಡಿಕಲ್‌ನ ಪ್ರಜ್ವಲ್‌ ಡಿಕುನ್ಹಾ, ದೇರೆಬೈಲ್‌ನ್‌ ರಾಘವೇಂದ್ರ ಭಟ್‌, ಡೈನಿಟಾ ಪಿಂಟೋ ಹಾಗೂ ಆಳ್ವಾಸ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಎಂಜಿನಿಯರಿಂಗ್‌ ಆ್ಯಂಡ್‌ ಟೆಕ್ನಾಲಜಿ ಕಾಲೇಜಿನ ತೃಪ್ತಿ ಎ.ಎಚ್‌. ಅವರು ಅಂತಾರಾಷ್ಟ್ರೀಯ ಕಂಪನಿಯಾದ ರಿಫಿನಿಟಿವ್‌ ಕಂಪನಿಯಲ್ಲಿ ವಾರ್ಷಿಕ 5.5 ಲಕ್ಷ ರೂ. ವೇತನದೊಂದಿಗೆ ಆಯ್ಕೆಯಾಗಿದ್ದಾರೆ. ಈ ಕಂಪನಿಗೆ ಎರಡು ದಿನದ ಉದ್ಯೋಗ ಮೇಳದಲ್ಲಿ ಒಟ್ಟು 9 ಅಭ್ಯರ್ಥಿಗಳು ಆಯ್ಕೆಯಾಗಿದ್ದಾರೆ.