ಮೋದಿ ಮಂಗಳೂರು ರ‍್ಯಾಲಿಗೆ ಬಾಂಬ್ ಹಾಕ್ಬೇಕಿತ್ತು ಎಂದ FB ಪೋಸ್ಟ್ ವಿರುದ್ಧ ಆಕ್ರೋಶ

ಮಂಗಳೂರು: ಮಂಗಳೂರು ನಗರದಲ್ಲಿ ಶನಿವಾರ ನಡೆದ ಬಿಜೆಪಿ ವಿಜಯ ಸಂಕಲ್ಪ ರಾಲಿಯನ್ನು ದೂಷಿಸುವ ಭರದಲ್ಲಿ ಯಾರೋ ಕಿಡಿಗೇಡಿಗಳು ಫೇಸ್‌ಬುನಲ್ಲಿ ಪಾಕ್‌ ಪರ ಸಂದೇಶ ಹಾಕಿ ದೇಶದ್ರೋಹಿ ಪೋಸ್ಟ್‌ ಹಾಕಿರುವುದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.

ಭಾನುವಾರ ಮಧ್ಯಾಹ್ನ ವೇಳೆ ಯುವತಿಯೊಬ್ಬಳ ಹೆಸರಿರುವ ಫೇಸ್‌ಬುಕ್‌ ಪೇಜ್‌ನಲ್ಲಿ ಮಂಗಳೂರಿನಲ್ಲಿ ಶನಿವಾರ ನಡೆದ ಬಿಜೆಪಿ ರಾಲಿಯ ಬಗ್ಗೆ ಭಯೋತ್ಪಾದನೆ ನಡೆಸದ ಪಾಕಿಸ್ತಾನದ ಗುಡ್ಡದ ಮೇಲೆ ಇರುವ ಮರಗಳ ಮೇಲೆ 1 ಸಾವಿರ ಕೆಜಿ ಬಾಂಬ್‌ ನಮ್ಮ ಸೇನೆ ಹಾಕುವ ಬದಲು, ಮಂಗಳೂರಿನಲ್ಲಿ ನಡೆದ ಮೋದಿ ಸಮಾವೇಶದಲ್ಲಿ 2 ಕೆಜಿ ಬಾಂಬ್‌ ಹಾಕಿದ್ರೂ ಸಾಕಿತ್ತು. ದಕ್ಷಿಣ ಕನ್ನಡ 50 ವರ್ಷ ನೆಮ್ಮದಿ ಆಗಿರುತ್ತಿತ್ತು ಎಂದು ಕಮೆಂಟ್‌ ಹಾಕಲಾಗಿದೆ.

ಭಾನುವಾರ ಸಂಜೆ 3.30ರ ಸುಮಾರಿಗೆ ಕಮೆಂಟ್‌ ಹಾಕಲಾಗಿದ್ದು, ಕಮೆಂಟ್‌ ಹಾಕಿದವಳು ಪ್ರೊಫೈಲ್‌ನಲ್ಲಿ ಉಡುಪಿಯವಳು ಎಂದು ಹೇಳಿಕೊಂಡಿದ್ದಾಳೆ. ಫೇಸ್‌ಬುಕ್‌ನಲ್ಲಿ ಸಂದೇಶ ಬೀಳುತ್ತಿದ್ದಂತೆ ಸಾರ್ವಜನಿಕರಿಂದ ಆಕ್ರೋಶದ ಸಂದೇಶಗಳು ವ್ಯಕ್ತವಾಗಿದೆ.

ಡಿಲೀಟ್‌ ಮಾಡಲೇ ಇಲ್ಲ: ಯುವತಿಯ ಸಂದೇಶದ ಬಗ್ಗೆ ಆಕ್ರೋಶ ಕೇಳಿ ಬರುತ್ತಿದ್ದಂತೆ ಎಲ್ಲರೂ ಸಂದೇಶ ಡಿಲೀಟ್‌ ಮಾಡಲು ಆಗ್ರಹಿಸಿದರೂ ಸೋಮವಾರ ಮಧ್ಯಾಹ್ನವರೆಗೂ ಪೋಸ್ಟ್‌ ಡಿಲೀಟ್‌ ಆಗಲೇ ಇಲ್ಲ.

ನಕಲಿ ಅಕೌಂಟ್‌ ಸಾಧ್ಯತೆ: ಯುವತಿ ಹೆಸರಲ್ಲಿ ರುವ ಈ ಫೇಸ್‌ಬುಕ್‌ ಪೇಜ್‌ ನಕಲಿ ಆಗಿರುವ ಸಾಧ್ಯತೆಯಿದೆ. ಈ ಬಗ್ಗೆ ಪೊಲೀಸ್‌ ತನಿಖೆಯಿಂದ ಸತ್ಯ ವಿಚಾರ ಬರಬೇಕಿದೆ.

ಫೇಸ್‌ಬುಕ್‌ ದುರ್ಬಳಕೆ: ಸುಮಾರು 2 ವರ್ಷದ ಹಿಂದೆ ಇದೇ ರೀತಿ ಕಟೀಲು ದೇವಿಯನ್ನು ಫೇಸ್‌ಬುಕ್‌ ಪೇಜ್‌ನಲ್ಲಿ ಅವಹೇಳನ ಮಾಡಲಾಗಿದ್ದು, ಮಂಗಳೂರಿನ ಬಂದರು ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಈ ಪ್ರಕರಣವನ್ನು ಸಂಪೂರ್ಣ ಬಯಲಿಗೆಳೆಯುವಲ್ಲಿ ಪೊಲೀಸರು ವಿಫಲರಾಗಿದ್ದು, ಇದೀಗ ಈ ರೀತಿ ಸಂದೇಶ ಮತ್ತೆ ಮುಂದುವರಿದಿದೆ.