ಅಡಿಕೆಗೆ ಬಂತು ಬಂಗಾರದ ಬೆಲೆ: ಬೆಳೆಗಾರರು ಫುಲ್ ಖುಷ್, ಇಲ್ಲಿದೆ ದರಪಟ್ಟಿ

ಪುತ್ತೂರು: ಹತ್ತು ದಿನಗಳಿಂದ ಸ್ಥಿರವಾಗಿದ್ದ ಚಾಲಿ ಅಡಿಕೆ ಧಾರಣೆ ಇದೀಗ ಮತ್ತೆ ಜಿಗಿತ ಕಂಡಿದೆ. ಹೊಸ ಅಡಿಕೆ ಧಾರಣೆ 325ಕ್ಕೆ ಬಂದ ಬಳಿಕ ಸ್ಥಿರವಾಗಿ ನಿಂತಿತ್ತು. ಗುರುವಾರ ಕ್ಯಾಂಪ್ಕೋ ಹೊಸ ಅಡಕೆಗೆ 5 ರೂ. ಏರಿಸಿದ್ದು, 330ಕ್ಕೆ ಖರೀದಿಸಿದೆ. ಇದರಿಂದ ಉತ್ತೇಜಿತರಾದ ಖಾಸಗಿ ವ್ಯಾಪಾರಿಗಳು ಪುತ್ತೂರು ಎಪಿಎಂಸಿ ಯಾರ್ಡ್‌ನಲ್ಲಿ335 ರೂ.ಗೆ ಖರೀದಿಸುವ ಮೂಲಕ ಬೆಳೆಗಾರರಿಗೆ ಧಾರಣೆಯ ಸುಗ್ಗಿಯನ್ನೇ ಸುರಿಸಿದ್ದಾರೆ. ಈ ನಡುವೆ, ಗ್ರಾಮಾಂತರ ಪ್ರದೇಶದ ಕೆಲವು ಖಾಸಗಿ ವ್ಯಾಪಾರಸ್ಥರು ಮತ್ತಷ್ಟು ಮುಂದೆ ಹೋಗಿ 338 ರೂ.ಗೆ ಖರೀದಿಸಿದ್ದಾರೆ. ಹಳೆ ಅಡಿಕೆ ದರ 340ರಿಂದ 345 ರೂ.ಗೆ ಏರಿಕೆಯಾಗಿದೆ.

ಹತ್ತು ದಿನಗಳ ಹಿಂದೆ ಜಿಲ್ಲೆಯಿಂದ ಅಪಾರ ಪ್ರಮಾಣದ ಚಾಲಿ ಅಡಿಕೆ ಉತ್ತರ ಭಾರತಕ್ಕೆ ಸರಬರಾಜಾಗಿತ್ತು. ಮಲೇಷ್ಯಾ, ನೇಪಾಳ ಮುಂತಾದ ದೇಶಗಳಿಂದ ಈ ಬಾರಿ ಅಡಿಕೆ ಆಮದು ಸಂಪೂರ್ಣ ಸ್ಥಗಿತಗೊಂಡಿರುವ ಕಾರಣ ದೇಶೀಯ ಅಡಿಕೆಗೆ ಗುಜರಾತ್‌ ಸೇರಿದಂತೆ ಉತ್ತರ ಭಾರತದಲ್ಲಿಅಪಾರ ಬೇಡಿಕೆ ಉಂಟಾಗಿದೆ. ಇದರ ಪರಿಣಾಮ ಧಾರಣೆ ಮೇಲೆ ಬಿದ್ದಿದ್ದು, ಬೆಳೆಗಾರರ ಸಂಭ್ರಮ ಮುಗಿಲು ಮುಟ್ಟಿದೆ. ಇದೀಗ ಮತ್ತೆ ಉತ್ತರ ಭಾರತದಿಂದ ಅಡಿಕೆಗೆ ಬೇಡಿಕೆ ಬಂದಿರುವ ಕಾರಣ ಧಾರಣೆ ಮತ್ತೆ ಏರಿಕೆಯಾಗಿದೆ.
ಚಿಕ್ಕಮಗಳೂರಿಗೂ ಕಾಲಿಟ್ಟ ರಕ್ಕಸ ಮಿಡತೆ..! ಅಡಿಕೆ ಮರಗಳ ಮೇಲೆ ದಾಳಿ..!

ಕೊರೊನಾ ಲಾಕ್‌ಡೌನ್‌ ಆರಂಭಗೊಳ್ಳುವ ಮುನ್ನ ಹೊಸ ಚಾಲಿ ಅಡಿಕೆ 260 ರೂ. ಮತ್ತು ಹಳೆ ಅಡಿಕೆ 280 ರೂ. ಆಸುಪಾಸಿನಲ್ಲಿತ್ತು. ಲಾಕ್‌ಡೌನ್‌ ಮಧ್ಯೆಯೇ ಎಪಿಎಂಸಿ ಮತ್ತು ಕ್ಯಾಂಪ್ಕೋ ಅಡಿಕೆ ಖರೀದಿ ಆರಂಭಿಸಿತ್ತು. ಆಲ್ಲಿಂದೀಚೆಗೆ ಏರತೊಡಗಿದ ಧಾರಣೆ ಇದೀಗ 330 ರೂ.ಗೆ ಬಂದು ನಿಂತಿದೆ. ಮುಂದಿನ ದಿನಗಳಲ್ಲಿ ಧಾರಣೆ ಇನ್ನಷ್ಟು ಏರುವ ನಿರೀಕ್ಷೆ ಮಾರುಕಟ್ಟೆಯಲ್ಲಿ ವ್ಯಕ್ತವಾಗಿದೆ.