6,695 ಬೋಗಿಗಳಿಗೆ ಜೈವಿಕ ಶೌಚ ದಕ್ಷಿಣ ರೈಲ್ವೆ ಪಾಲ್ಘಾಟ್‌ ವಿಭಾಗದ ದಾಖಲೆ ಸಾಧನೆ

ಮಂಗಳೂರು: ರೈಲು ಪ್ರಯಾಣಿಕರ ಸ್ವಚ್ಛತೆ ಮೇಲೆ ಗಮನವಿಟ್ಟ ದಕ್ಷಿಣ ರೈಲ್ವೆಯ ಪಾಲ್ಘಾಟ್‌ ವಿಭಾಗವು 6,695 ಬೋಗಿಗಳಿಗೆ ಜೈವಿಕ ಶೌಚಾಲಯ ಅಳವಡಿಸಿದೆ. ಇದರೊಂದಿಗೆ ಶೇ.98.10ರಷ್ಟು ಸಾಧನೆಯನ್ನು ಪಾಲ್ಘಾಟ್‌ ವಿಭಾಗ ದಾಖಲಿಸಿದೆ.

ಪಾಲ್ಘಾಟ್‌ ವಿಭಾಗದ ಒಟ್ಟು 6 ರೈಲುಗಳಿಗೆ ಉತ್ಕೃಷ್ಟ ಬೋಗಿಗಳನ್ನು ಅಳವಡಿಸಿದ ದಕ್ಷಿಣ ರೈಲ್ವೆಯು ಸ್ವಚ್ಛತೆ ಮೇಲೆ ಇನ್ನಷ್ಟು ಗಮನವಿಟ್ಟು ಈ ಕ್ರಮ ಕೈಗೊಂಡಿದೆ. ಪ್ರಯಾಣಿಕರಿಗೆ ಪರಿಸರಸ್ನೇಹಿ ಸೌಲಭ್ಯ ಒದಗಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ ಎಂದು ವಿಜಯ ಕರ್ನಾಟಕಕ್ಕೆ ದಕ್ಷಿಣ ರೈಲ್ವೆ ಪಾಲ್ಘಾಟ್‌ ವಿಭಾಗದ ಡಿಆರ್‌ಎಂ ಪ್ರತಾಪ್‌ ಸಿಂಗ್‌ ಶಮಿ ಮಾಹಿತಿ ನೀಡಿದ್ದಾರೆ.

ದಕ್ಷಿಣ ರೈಲ್ವೆಯ ಒಟ್ಟು 239 ಕಿ.ಮೀ. ರೈಲು ಮಾರ್ಗ ವಿದ್ಯುದೀಕರಣಗೊಂಡಿದೆ. 112 ಕಿಮೀ.ನಷ್ಟು ಹಳಿಯನ್ನು ದ್ವಿಪಥಗೊಳಿಸಲಾಗಿದೆ. 127 ಕಿ.ಮೀ. ಗೇಜ್‌ ಪರಿವರ್ತನೆ ಮಾಡಲಾಗಿದೆ. 257 ಕಿ.ಮೀ. ಹೊಸ ಮಾರ್ಗ ಆರಂಭಿಸಲು ಉದ್ದೇಶಿಸಿದೆ.

ರೈಲ್ವೆ ಪ್ರಯಾಣಿಕರಿಗೆ ಇನ್ನಷ್ಟು ಸೌಲಭ್ಯ ಒದಗಿಸುವ ಉದ್ದೇಶದಿಂದ ಮಂಗಳೂರು ರೈಲ್ವೆ ನಿಲ್ದಾಣ ಸೇರಿದಂತೆ ಪಾಲ್ಘಾಟ್‌ ವಿಭಾಗದ ರೈಲ್ವೆ ನಿಲ್ದಾಣಗಳಲ್ಲಿ12 ಲಿಫ್ಟ್‌ ಹಾಗೂ 12 ಎಸ್ಕಲೇಟರ್‌ ಅಳವಡಿಸಲು ನಿರ್ಧರಿಸಲಾಗಿದೆ. ರೈಲ್ವೆ ಇಲಾಖೆಯಲ್ಲಿಸಂವಹನ ವ್ಯವಸ್ಥೆ ಬಲಪಡಿಸುವ ಹಿನ್ನೆಲೆಯಲ್ಲಿಆಪ್ಟಿಕಲ್‌ ಫೈಬರ್‌ ಕೇಬಲ್‌ ಅಳವಡಿಸುವ ಕಾರ್ಯ ಅಂತಿಮ ಹಂತಕ್ಕೆ ತಲುಪಿದೆ. ಪ್ರಯಾಣಿಕರಿಗೆ ಇ-ಟಿಕೆಟ್‌, ಅತ್ಯಂತ ವೇಗದ ಇಂಟರ್‌ನೆಟ್‌ ಸೌಲಭ್ಯ, ವೈಫೆ ಸಾಕಾರಗೊಳ್ಳಲಿದೆ.


7.37ರಷ್ಟು ಆರ್ಥಿಕ ಪ್ರಗತಿ

ಪಾಲ್ಘಾಟ್‌ ವಿಭಾಗವು ಪ್ರಸಕ್ತ ಆರ್ಥಿಕ ವರ್ಷದ ಜುಲೈ ಅಂತ್ಯದವರೆಗೆ 7.37ರಷ್ಟು ಆರ್ಥಿಕ ಪ್ರಗತಿ ಸಾಧಿಸಿದೆ. ಪ್ರಯಾಣಿಕರ ಸಂಖ್ಯೆ ಶೇ.8.62ರಷ್ಟು ಹೆಚ್ಚಳವಾಗಿದೆ. ಕಲ್ಲಿದ್ದಲು, ಸಿಮೆಂಟ್‌, ಆಹಾರ ಧಾನ್ಯ, ರಸಗೊಬ್ಬರ, ಪೆಟ್ರೋಲಿಯಂ ಉತ್ಪನ್ನಗಳು ಸೇರಿದಂತೆ 10.82 ಲಕ್ಷ ಟನ್‌ ಸರಕು ಸಾಗಾಟ ಮಾಡಲಾಗಿದೆ. ಪಾಲ್ಘಾಟ್‌ ವಿಭಾಗದ ಆರ್ಥಿಕ ಪ್ರಗತಿಯಲ್ಲಿಮಂಗಳೂರಿನ ಕೊಡುಗೆ ಬಹಳಷ್ಟಿದೆ.


ರೈಲು ಸಂಚಾರದಲ್ಲಿಸಮಯ ಪಾಲನೆಗೆ ಹೆಚ್ಚಿನ ಒತ್ತು ನೀಡಲಾಗಿದೆ. ಈ ವರ್ಷ ಶೇ.82ರಷ್ಟು, ಕಳೆದ ವರ್ಷ ಶೇ.77ರಷ್ಟು ಸಮಯ ಪಾಲನೆ ಮಾಡಲಾಗಿದೆ. 15 ನಿಲ್ದಾಣಗಳಲ್ಲಿವೇಗದ ಮಿತಿ ಸಡಿಲಿಸಲಾಗಿದೆ.

-ಪ್ರತಾಪ್‌ ಸಿಂಗ್‌ ಶಮಿ, ಡಿಎಂಆರ್‌, ದಕ್ಷಿಣ ರೈಲ್ವೆ ಪಾಲ್ಘಾಟ್‌ ವಿಭಾಗ