ಮಂಗಳೂರು ಉದ್ಯಮಿ ಕೊಲೆ ಪ್ರಕರಣ: ಹಣಕ್ಕಾಗಿ ಮರ್ಡರ್‌, ಇಬ್ಬರ ಬಂಧನ

ಮಂಗಳೂರು: ಕಾವೂರು ಮಲ್ಲಿಲೇಔಟ್‌ ನಿವಾಸಿ ಸುರೇಂದ್ರನ್‌ (60) ಎಂಬವರ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿ ಇಬ್ಬರು ಆರೋಪಿಗಳನ್ನು ನಗರ ಅಪರಾಧ ಪತ್ತೆ ದಳ ಮತ್ತು ಕಾವೂರು ಪೊಲೀಸರು ಕಾರ್ಯಾಚರಣೆ ನಡೆಸಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಕೋಡಿಕಲ್‌ ನಿವಾಸಿ ಸಂತೋಷ್‌ ಸಪಲ್ಯ (43) ಮತ್ತು ಹಾವೇರಿ ನಿವಾಸಿ ಸಿದ್ದು (28) ಬಂಧಿತ ಆರೋಪಿಗಳು.

ಹಣಕ್ಕಾಗಿ ಕೊಲೆ
ಸುರೇಂದ್ರನ್‌ ಅವರು ಸುಮಾರು 2 ವರ್ಷಗಳ ಹಿಂದೆ ಸಂತೋಷ್‌ ಅವರ ಬಳಿ ಟ್ರೆಸ್‌ ಕೆಲಸ ಮಾಡಿಸಿದ್ದರು. ಇದರಲ್ಲಿ 25 ಸಾವಿರ ರೂ. ಹಣ ಕೊಡಲು ಬಾಕಿಯಿದ್ದು, ಅದನ್ನು ಸಂತೋಷ್‌ ಕೇಳುತ್ತಲೇ ಇದ್ದರು. ಆದರೆ ಕೊಡಲು ನಿರಾಕರಿಸಿದ ಕಾರಣಕ್ಕೆ ಅ.3ರಂದು ಸಂತೋಷ್‌ ತನ್ನ ಪರಿಚಯದ ಸಿದ್ದು ಜತೆ ಸುರೇಂದ್ರನ್‌ ಅವರ ಮನೆಗೆ ಬಂದಿದ್ದಾನೆ. ಈ ಸಂದರ್ಭ ಇಬ್ಬರ ಮಧ್ಯೆ ವಾಗ್ವಾದ ನಡೆದಿದ್ದು, ಕೋಪಗೊಂಡ ಸಂತೋಷ್‌ ಮತ್ತು ಸಿದ್ದು ಸೇರಿ ಟ್ರೆಸ್‌ ಶೀಟ್‌ ಕಟ್‌ ಮಾಡುವ ಬ್ಲೇಡ್‌ನಿಂದ ಹಲ್ಲೆ ಮಾಡಿ ಕೊಲೆಗೈದಿದ್ದಾರೆ.
ಮಂಗಳೂರಿನಲ್ಲಿ ಕೇರಳ ಉದ್ಯಮಿಯನ್ನು ಇರಿದು ಕೊಲೆ ಮಾಡಿದ ದುಷ್ಕರ್ಮಿಗಳು

ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ನಗರ ಅಪರಾಧ ಪತ್ತೆದಳ ಮತ್ತು ಕಾವೂರು ಪೊಲೀಸರ ತಂಡ ಕಾರ್ಯಾಚರಣೆ ಆರಂಭಿಸಿದರು. ಸಂಶಯದ ಮೇರೆಗೆ ಸಂತೋಷ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಪ್ರಕರಣ ಬಯಲಿಗೆ ಬಂದಿದೆ. ಬಳಿಕ ಇಬ್ಬರು ಆರೋಪಿಗಳನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಪ್ರಕರಣವನ್ನು ಬೇಧಿಸಲು ಯಶಸ್ವಿಯಾದ ಪೊಲೀಸ್‌ ತಂಡಕ್ಕೆ ಸಾರ್ವಜನಿಕರಿಂದ ಶ್ಲಾಘನೆ ವ್ಯಕ್ತವಾಗಿದೆ.