ಮಂಗಳೂರು: ಸಮುದ್ರದಲ್ಲಿ ಸಿಲುಕಿದ್ದ ಬೆಸ್ತರ ರಕ್ಷಿಸಿದ ಕೋಸ್ಟ್ ಗಾರ್ಡ್‌

ಮಂಗಳೂರು: ಕೇರಳದಿಂದ ಮೀನುಗಾರಿಕೆಗೆ ತೆರಳಿ ಓಖಿ ಚಂಡಮಾರುತಕ್ಕೆ ಸಿಲುಕಿ ನಾಲ್ಕು ದಿನಗಳಿಂದ ಅನ್ನ ನೀರು ಇಲ್ಲದೆ ಸಿಲುಕಿಕೊಂಡಿದ್ದ 13 ಮೀನುಗಾರರನ್ನು ಮಂಗಳೂರು ಕೋಸ್ಟ್ ಗಾರ್ಡ್ ಅಧಿಕಾರಿಗಳು ರಕ್ಷಿಸಿದ್ದಾರೆ.

ಕೊಚ್ಚಿಯಿಂದ ನ.7 ರಂದು ಬಾರಾಕುಡ ಹೆಸರಿನ ಬೋಟ್‌ನಲ್ಲಿ ಮೀನುಗಾರಿಕೆಗೆ ತೆರಳಿದ್ದರು. ನ.28ರಂದು ಸಮುದ್ರದಲ್ಲಿ ಓಖಿ ಚಂಡಮಾರುತದ ಪ್ರಭಾವದಿಂದ ಬೋಟು ಅಪಾಯಕ್ಕೆ ಸಿಲುಕಿತ್ತು. ಡಿ.2ರಂದು ಅದರೊಳಗೆ ನೀರು ಒಳಗೆ ನುಗ್ಗಿತ್ತು. ಅವರ ವಯರ್‌ಲೆಸ್‌ ಸಂಪರ್ಕ ಕಡಿತಗೊಂಡಿತ್ತು. ಆಹಾರ, ಬಟ್ಟೆ ನೀರಿನಲ್ಲಿ ಕೊಚ್ಚಿ ಹೋಗಿತ್ತು.

ಕೈಯಲ್ಲೇ ನೀರು ಹೊರಕ್ಕೆ ಹಾಕುವ ಮೂಲಕ ಬೋಟು ಸಮುದ್ರ ಪಾಲಾಗುವುದನ್ನು ತಪ್ಪಿಸಿದ್ದರು.

ಇವರು ಸಿಕ್ಕಿ ಹಾಕಿಕೊಂಡಿರುವ ಮಾಹಿತಿ ಪಡೆದ ಕೇರಳ ಕೋಸ್ಟ್ ಗಾರ್ಡ್‌ನವರು ಮಂಗಳೂರು ಕೋಸ್ಟ್ ಗಾರ್ಡ್‌ಗೆ ಮಾಹಿತಿ ರವಾನಿಸಿದ್ದರು

ಉಡುಪಿ ಜಿಲ್ಲೆಯ ಮಲ್ಪೆಯಿಂದ ಹತ್ತು ನಾಟಿಕಲ್ ಮೈಲ್ ದೂರದಲ್ಲಿದ್ದ ಬೋಟ್‌ ಅನ್ನು ಬುಧವಾರ ಬೆಳಗ್ಗೆ 7.15ಕ್ಕೆ ಪತ್ತೆ ಹಚ್ಚಿ ಎಲ್ಲ 13 ಮಂದಿಯನ್ನು ಸುರಕ್ಷಿತ ವಾಗಿ ತೀರಕ್ಕೆ ಕರೆ ತಂದಿದ್ದಾರೆ.

ಅಮಾರ್ಥ್ಯ ಹೆಸರಿನ ಶಿಪ್‌ನಲ್ಲಿ ಕೋಸ್ಟ್ ಗಾರ್ಡ್ ಅಧಿಕಾರಿಗಳು ಖಾಸಗಿ ಬೋಟ್ ಸಹಾಯದಿಂದ ಮುಳುಗುತ್ತಿದ್ದ ಬೋಟ್‌ನ ರಕ್ಷಣೆ ಮಾಡಿದ್ದಾರೆ.