ಕೆನರಾ ಎಂಜಿನಿಯರಿಂಗ್‌ ವಿದ್ಯಾರ್ಥಿಗಳ ‘ಕೊಕೋನೋಕ್‌’ಗೆ ಅನ್ವೇಷಣ್‌ ಪ್ರಶಸ್ತಿ

ವಿಕ ಸುದ್ದಿಲೋಕ ಮಂಗಳೂರು

ನವೀನ ಉತ್ಪನ್ನಗಳ ಅನ್ವೇಷಣೆ ಮತ್ತು ವಿನ್ಯಾಸಕ್ಕೆ ಸಂಬಂಧಿಸಿದಂತೆ ಜಾಗತಿಕ ಮಟ್ಟದಲ್ಲಿ ವಿದ್ಯುನ್ಮಾನ ಉತ್ಪನ್ನಗಳ ವಿನ್ಯಾಸ ಸಂಸ್ಥೆ ಅನಲಾಗ್‌ ಡಿವೈಸಸ್‌ ವತಿಯಿಂದ ನಡೆದ ರಾಷ್ಟ್ರೀಯ ಮಟ್ಟದ ಅನ್ವೇಷಣ್‌ 2018 ತಾಂತ್ರಿಕ ಉತ್ಪನ್ನ ತಯಾರಿಕಾ ಸ್ಪರ್ಧೆಯಲ್ಲಿ ಕೆನರಾ ಎಂಜಿನಿಯರಿಂಗ್‌ ಕಾಲೇಜಿನ ವಿದ್ಯಾರ್ಥಿಗಳ ತಂಡ ಸ್ವಯಂ ಚಾಲಿತ ತೆಂಗಿನ ಕಾಯಿಗಳ ವರ್ಗೀಕರಣ ಉತ್ಪನ್ನ 'ಕೋಕೋನೋಕ್‌' ರನ್ನರ್ಸ್‌ ಅಪ್‌ ಪ್ರಶಸ್ತಿಯೊಂದಿಗೆ 1.5 ಲಕ್ಷ ರೂ. ನಗದು ಬಹುಮಾನವನ್ನು ಗೆದ್ದುಕೊಂಡಿದೆ.

ಬೆಂಗಳೂರಿನಲ್ಲಿ ಅನಲಾಗ್‌ ಡಿವೈಸಸ್‌ ಸಂಸ್ಥೆಯ ಆವರಣದಲ್ಲಿ ಶುಕ್ರವಾರ ನಡೆದ ಸ್ಪರ್ಧೆಯಲ್ಲಿ ಕಾಲೇಜಿನ ಎಲೆಕ್ಟ್ರಾನಿಕ್ಸ್‌ ಮತ್ತು ಕಮ್ಯುನಿಕೇಶನ್‌ ವಿಭಾಗದ ವಿದ್ಯಾರ್ಥಿಗಳಾದ ನಿಖಿನ್‌, ಅಕ್ಷಯ್‌, ನವನೀತ್‌ ಕುಮಾರ್‌, ವಿಜ್ವಲ್‌ ಎಚ್‌.ಶೆಟ್ಟಿ ತಂಡ ಈ ಗೌರವವನ್ನು ತಮ್ಮದಾಗಿಸಿಕೊಂಡಿದೆ.

ಕಾಲೇಜಿನ ರಾಘವೇಂದ್ರ ಸೂಡ ಮತ್ತು ಅನಲಾಗ್‌ ಡಿವೈಸಸ್‌ನ ಅಕ್ಷಯ್‌ ಹರಿಭಟ್‌, ಶ್ರೀದೇವಿ ವಾರಿಯರ್‌ ಮತ್ತು ಮನೀಶ್‌ ಕುಮಾರ್‌ ಅವರ ಮಾರ್ಗದರ್ಶನದಲ್ಲಿ ರೂಪಿಸಲಾಗಿದೆ. ಅನಲಾಗ್‌ ಡಿವೈಸಸ್‌ ಸಂಸ್ಥೆಯ ಅನ್ವೇಷಣ್‌ ಕಾರ್ಯಕ್ರಮದಲ್ಲಿ ಅರ್ಹತಾ ಸುತ್ತಿಗೆ ಆಯ್ಕೆಯಾಗಿದ್ದ ಕೆನರಾ ಎಂಜಿನಿಯರಿಂಗ್‌ ಕಾಲೇಜಿನ ತಂಡವು ಒಂದು ವರ್ಷದ ಅವಧಿಯಲ್ಲಿ ಉತ್ಪನ್ನದ ತಯಾರಿಕಾ ತರಬೇತಿಯನ್ನೂ ಪಡೆದಿತ್ತು. ಅಂತಿಮವಾಗಿ ಇತರೆ 99 ತಂಡಗಳ ಉತ್ಪನ್ನಗಳ ಪೈಕಿ ಸ್ಪರ್ಧೆಯಲ್ಲಿ ಕೋಕೋನಾಕ್‌ ದ್ವಿತೀಯ ಸ್ಥಾನ ತನ್ನದಾಗಿಸಿಕೊಂಡಿದೆ ಎಂದು ಪ್ರಕಟಣೆ ತಿಳಿಸಿದೆ.