ಮಿಥುನ್‌ ರೈ ಗೆಲುವಿಗೆ ಕಾಂಗ್ರೆಸ್‌-ಜೆಡಿಎಸ್‌ ಕಾರ‍್ಯತಂತ್ರ

ಮಂಗಳೂರು: ದಕ್ಷಿಣ ಕನ್ನಡ ಲೋಕಸಭೆ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿ ಮಿಥುನ್‌ ರೈ ಗೆಲುವಿಗಾಗಿ ಕಾಂಗ್ರೆಸ್‌ ಮತ್ತು ಜಾತ್ಯತೀತ ಜನತಾ ದಳ ಜಂಟಿ ಚುನಾವಣಾ ಸಮಿತಿ ರಚಿಸಿದ್ದು, ಆ ಮೂಲಕ ಪ್ರಚಾರ ತಂತ್ರ ಕೈಗೊಳ್ಳಲಾಗಿದೆ ಎಂದು ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಹರೀಶ್‌ ಕುಮಾರ್‌ ಹೇಳಿದರು.

ದ.ಕ. ಜಿಲ್ಲಾ ಕಾಂಗ್ರೆಸ್‌ ಕಚೇರಿಯಲ್ಲಿ ಭಾನುವಾರ ಕಾಂಗ್ರೆಸ್‌-ಜೆಡಿಎಸ್‌ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ರಾಜ್ಯದ ಸಮ್ಮಿಶ್ರ ಸರಕಾರದ ಆಶಯದಂತೆ ಇಲ್ಲೂ ಸಮ್ಮಿಶ್ರವಾಗಿ ಚುನಾವಣೆ ಎದುರಿಸಲು ಮಾಜಿ ಸಚಿವ ಬಿ. ರಮಾನಾಥ ರೈ ಅಧ್ಯಕ್ಷತೆಯ ಉಭಯ ಪಕ್ಷದ ಹಿರಿಯರ ಜಂಟಿ ಸಮಿತಿ ರಚಿಸಲಾಗಿದೆ ಎಂದರು.

ಕ್ಷೇತ್ರದ ನಿಷ್ಕ್ರಿಯ ಸಂಸದರಿಗೆ ನಿವೃತ್ತಿ ನೀಡಿ, ಕ್ರಿಯಾಶೀಲ ಸಂಸದನ ಆಯ್ಕೆ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ ಹೈಕಮಾಂಡ್‌ ಈ ಬಾರಿ ಯುವ ಕಾಂಗ್ರೆಸ್‌ ಅಧ್ಯಕ್ಷ ಮಿಥುನ್‌ ರೈ ಅವರಿಗೆ ಟಿಕೆಟ್‌ ನೀಡಿದೆ. ಹಾಲಿ ಸಂಸದರು 10 ವರ್ಷಗಳಲ್ಲಿ ಯಾವುದೇ ಅಭಿವೃದ್ಧಿ ಕಾರ್ಯ ಮಾಡಿಲ್ಲ. 28 ವರ್ಷದ ಬಿಜೆಪಿ ಅಧಿಕಾರದಲ್ಲಿ ಒಂದು ಹೆಜ್ಜೆ ಗುರುತೂ ಮೂಡಿಲ್ಲ. ಇದೇ ಕಾಂಗ್ರೆಸ್‌ಗೆ ಲಾಭ ತರಲಿದ್ದು, ಎಲ್ಲ ನಾಯಕರು ಜತೆಯಾಗಿ ಮಿಥುನ್‌ ಗೆಲುವಿಗೆ ಶ್ರಮಿಸುತ್ತಿದ್ದಾರೆ ಎಂದರು.

ಜೆಡಿಎಸ್‌ ಜಿಲ್ಲಾಧ್ಯಕ್ಷ ಮುಹಮ್ಮದ್‌ ಕುಂಞಿ ಮಾತನಾಡಿ, ಗೆಲ್ಲುವ ಅಭ್ಯರ್ಥಿಗೆ ಕಾಂಗ್ರೆಸ್‌ ಟಿಕೆಟ್‌ ನೀಡಿದೆ. ರಾಜ್ಯದಲ್ಲಿ ಕುಮಾರಸ್ವಾಮಿ ನೇತೃತ್ವದ ಸರಕಾರ ಒಳ್ಳೆಯ ಕೆಲಸ ಮಾಡುತ್ತಿದೆ. ಇಲ್ಲಿ ಜನತೆ ಬದಲಾವಣೆ ಬಯಸಿರುವುದು ಮತ್ತು ಬಿಜೆಪಿಗೆ ತನ್ನ ಆಡಳಿತ ವೈಫಲ್ಯ ಮುಳುವಾಗಿ, ಕಾಂಗ್ರೆಸ್‌ ಗೆಲ್ಲಲಿದೆ ಎಂದರು.

ಮಾಜಿ ಸಚಿವ ಬಿ. ರಮಾನಾಥ ರೈ ಮಾತನಾಡಿ, ಶ್ರೀನಿವಾಸ ಮಲ್ಯರಿಂದ ಹಿಡಿದು ಎಲ್ಲ ಕಾಂಗ್ರೆಸ್‌ ಸಂಸದರು ಎನ್‌ಐಟಿಕೆ, ಹೆದ್ದಾರಿಗಳು, ಬಂದರು, ಎಂಆರ್‌ಪಿಎಲ್‌ ಇತ್ಯಾದಿ ಮಾಡಿದ್ದರೆ, ಬಿಜೆಪಿ ಸಂಸದರ ಕಾಲದಲ್ಲಿ ಯಾವುದೇ ಸಾಧನೆಯಾಗಿಲ್ಲ, ಬದಲಾಗಿ ಎಲ್ಲವನ್ನೂ ಮಾರಲು ಹೊರಟಿದ್ದಾರೆ. ಎಲ್ಲ ವೈಫಲ್ಯಗಳಿಗೂ ಸಬೂಬು ನೀಡುತ್ತಿರುವ ಸಂಸದ ನಳಿನ್‌ಗೆ ಇಚ್ಛಾಶಕ್ತಿ ಇದ್ದಿದ್ದರೆ ತನ್ನದೇ ಸರಕಾರದಲ್ಲಿ ಉತ್ತಮ ಕೆಲಸ ಮಾಡಬಹುದಿತ್ತು. ಬಿಜೆಪಿ ನಾಯಕರೇ ಅವರನ್ನು ಕಳಪೆ ಸಂಸದ ಎಂದು ಒಪ್ಪಿಕೊಂಡಿದ್ದಾರೆ ಎಂದರು.