ದಕ್ಷಿಣ ಕನ್ನಡದಲ್ಲಿ ಕೊರೊನಾ ಅಟ್ಟಹಾಸ: ಮತ್ತೆ 149 ಮಂದಿಗೆ ಸೋಂಕು‌; 10 ಜನರ ಸಾವು

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಬುಧವಾರ 149 ಮಂದಿಯಲ್ಲಿ ಕೊರೊನಾ ಸೋಂಕು ದೃಢಪಟ್ಟಿದ್ದು, 10 ಮಂದಿ ಸೋಂಕಿತರು ಮೃತಪಟ್ಟಿದ್ದಾರೆ. ಇದರೊಂದಿಗೆ ಒಟ್ಟು ಸೋಂಕಿತರ ಸಂಖ್ಯೆ 6542ಕ್ಕೇರಿಕೆಯಾದರೆ, ಮೃತರ ಸಂಖ್ಯೆ 190ಕ್ಕೆ ಹೆಚ್ಚಳವಾಗಿದೆ. ಮೃತರಲ್ಲಿ 162 ಮಂದಿ ದಕ ಜಿಲ್ಲೆಯವರಾದರೆ, 28 ಮಂದಿ ಹೊರಜಿಲ್ಲೆಯವರಾಗಿದ್ದಾರೆ.

ಮಂಗಳವಾರ 82 ಮಂದಿ ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದು, ಈ ಮೂಲಕ ಒಟ್ಟು 3009 ಮಂದಿ ಸೋಂಕಿನಿಂದ ಗುಣಮುಖರಾಗಿ, ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದಾರೆ. 3343 ಮಂದಿ ಸೋಂಕಿತರ ಚಿಕಿತ್ಸೆ ಮುಂದುವರಿದಿದೆ. ಮೃತರಲ್ಲಿ ಏಳು ಮಂದಿ ಮಂಗಳೂರು ತಾಲೂಕಿನವರಾಗಿದ್ದರೆ, ಉಳಿದಂತೆ ಬೆಳ್ತಂಗಡಿ, ಸುಳ್ಯ ಮತ್ತು ಇತರ ಜಿಲ್ಲೆಯ ತಲಾ ಒಬ್ಬರಿದ್ದಾರೆ.

ಪಾಸಿಟಿವ್‌ ಆದವರಲ್ಲಿ ಮಂಗಳೂರು ತಾಲೂಕಿನ 79, ಬಂಟ್ವಾಳದ 16, ಬೆಳ್ತಂಗಡಿಯ 21, ಪುತ್ತೂರಿನ 20, ಸುಳ್ಯದ 1 ಮತ್ತು ಇತರ ಜಿಲ್ಲೆಗಳ 12 ಮಂದಿ ಸೇರಿದ್ದಾರೆ. ಅವರಲ್ಲಿ 27 ಮಂದಿಗೆ ಪ್ರಾಥಮಿಕ ಸಂಪರ್ಕದಿಂದ ಸೋಂಕು ತಗುಲಿದೆ. 64 ಮಂದಿಗೆ ಇನ್ ಪ್ಲುಯೆನ್ಸಾ ಲೈಕ್‌ ಇಲ್‌ನೆಸ್‌ ಕಂಡುಬಂದಿದ್ದು, 12 ಮಂದಿ ಉಸಿರಾಟ ಸಮಸ್ಯೆಯಿಂದ ಚಿಕಿತ್ಸೆಗೆ ತೆರಳಿದಾಗ ಕೊರೊನಾ ಪಾಸಿಟಿವ್‌ ದೃಢಪಟ್ಟಿದೆ. 46 ಮಂದಿಗೆ ಸೋಂಕು ತಗುಲಿದ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಎಲ್ಲರಿಗೂ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಜಿಲ್ಲಾಡಳಿತದ ವರದಿ ತಿಳಿಸಿದೆ.