ಚಿತ್ರ ನಿರ್ದೇಶಕನ ಸಾವಿನ ಬಗ್ಗೆ ಸಂಶಯ: ಪೊಲೀಸರಿಗೆ ದೂರು

ಮೂಡುಬಿದಿರೆ : ಚಿತ್ರ ನಿರ್ದೇಶಕರಾಗಿದ್ದ ಮಹಮ್ಮದ್‌ ಹ್ಯಾರಿಸ್‌ ಕೆಲವು ತಿಂಗಳ ಹಿಂದೆ ಕಾರು ಅಪಘಾತದಲ್ಲಿ ಮೃತಪಟ್ಟಿದ್ದು ಈ ಬಗ್ಗೆ ಸಂಶಯ ವ್ಯಕ್ತಪಡಿಸಿ ಅವರ ತಂದೆ ಮೂಡುಬಿದಿರೆ ಪೊಲೀಸರಿಗೆ ಶುಕ್ರವಾರ ದೂರು ನೀಡಿದ್ದಾರೆ.

ಹಾರಿಸ್‌ ಅವರು ಮಾರ್ಚ್‌ 21ರಂದು ಶಿರ್ತಾಡಿ ಪರಿಸರದಲ್ಲಿ ಚಿತ್ರೀಕರಣ ಮುಗಿಸಿ ಮನೆಗೆ ವಾಪಸ್ಸು ಬಂದಿದ್ದರು. ರಾತ್ರಿ ಸುಮಾರು 12 ಗಂಟೆಯ ವೇಳೆ ಶಿರ್ತಾಡಿಯ ಲಾಡ್ಜ್‌ನಲ್ಲಿದ್ದ ಚಿತ್ರ ತಂಡದವರು ಲಾಡ್ಜ್‌ಗೆ ಬರುವಂತೆ ಕರೆಮಾಡಿದ್ದರು. ಈ ಹಿನ್ನೆಲೆಯಲ್ಲಿ ತನ್ನ ಒಮ್ನಿ ಕಾರಿನಲ್ಲಿ ಶಿರ್ತಾಡಿ ಕಡೆಗೆ ತೆರಳುವ ವೇಳೆ ಕಾರು ಮರಕ್ಕೆ ಡಿಕ್ಕಿ ಹೊಡೆದಿದ್ದು ಅವರು ಮೃತಪಟ್ಟಿದ್ದರು. ಮಹಮ್ಮದ್‌ ಹ್ಯಾರಿಸ್‌ಗೆ ಬೇರೆ ಚಿತ್ರ ನಿರ್ದೇಶಕರಿಂದ ಮತ್ತು ಚಿತ್ರ ನಿರ್ಮಾಪಕರಿಂದ ಬೆದರಿಕೆ ಇರುವ ಬಗ್ಗೆ ತನ್ನಲ್ಲಿ ತಿಳಿಸಿದ್ದ. ಈ ಕುರಿತು ಚಿತ್ರ ತಂಡದ ಕೆಲವರ ಬಗ್ಗೆ ಸಂಶಯ ವ್ಯಕ್ತಪಡಿಸಿ, ಅವರ ಹೆಸರು ಸಹಿತ ದೂರಿನಲ್ಲಿ ತಿಳಿಸಿದ್ದು ಈ ಬಗ್ಗೆ ತನಿಖೆ ನಡೆಸಿ ನ್ಯಾಯ ಒದಗಿಸಬೇಕೆಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.