ಬಾವಿಗೆ ಇಳಿದ ಅಪ್ಪ ಮಗನ ರಕ್ಷಣೆ ಮಾಡಿದ ಅಗ್ನಿಶಾಮಕ ಸಿಬ್ಬಂದಿ

ಪುತ್ತೂರು: ಬಾವಿಯ ಕೆಸರು ಮಣ್ಣು ತೆಗೆದು ದುರಸ್ತಿ ಮಾಡುವ ಕೆಲಸಕ್ಕೆಂದು ಅಳವಾದ ಬಾವಿಗೆ ಇಳಿದ ಅಪ್ಪ, ಮಗ ಇಬ್ಬರು ಬಾವಿಯೊಳಗೆ ಆಮ್ಲಜನಕದ ಕೊರತೆಯಿಂದ ಬಳಲಿದ್ದು, ಅಗ್ನಿಶಾಮಕ ದಳದವರು ಬಂದು ಇಬ್ಬರನ್ನೂ ರಕ್ಚಿಸಿದ್ದಾರೆ.

ಪುತ್ತೂರು ತಾಲೂಕಿನ ಬಡಗನ್ನೂರು ಗ್ರಾಮದ ಬಾಣದಪದವು ಎಂಬಲ್ಲಿನ ಮೂಲೆಗದ್ದೆ ಎಂಬಲ್ಲಿ ಈ ಘಟನೆ ನಡೆದಿದೆ.

ಸ್ಥಳೀಯರಾದ ಬಾಬು ( 50) ಮತ್ತು ಅವರ ಮಗ ಶ್ರೀನಿವಾಸ (26) ಎಂಬವರೇ ಬಾವಿಯೊಳಗೆ ಉಸಿರಾಟದ ಸಮಸ್ಯೆಗೆ ಸಿಲುಕಿದವರು.

ಬೇಸಿಗೆಯಲ್ಲಿ ನೀರಿನ ಸಮಸ್ಯೆ ಕಾಣಿಸಿಕೊಂಡ ಪರಿಣಾಮ ಸ್ಥಳೀಯರಾದ ಸುರೇಖಾ ಎಂಬವರ ಮನೆಯ ಬಾವಿಯ ಕೆಸರು, ಮಣ್ಣು ತೆಗೆಯಲು ಆಳುಗಳನ್ನು ಕರೆಸಲಾಗಿತ್ತು.

ಬಾಬು ಎಂಬವರು ಬಾವಿಗೆ ಇಳಿದು ಕೆಸರು ಶುಚಿಗೊಳಿಸುವ ಸಂದರ್ಭ 65 ಅಡಿ ಆಳದಲ್ಲಿ ಉಸಿರಾಟದ ಸಮಸ್ಯೆ ಕಾಣಿಸಿಕಂಡಿತು. ವಿಷಯ ಅರ್ಥ ಮಾಡಿಕೊಂಡ ಮಗ ಶ್ರೀನಿವಾಸ್ ಕೂಡ ಬಾವಿಗೆ ಇಳಿದರು.

ಅವರಿಗೂ ಅದೇ ಸಮಸ್ಯೆ ಕಾಣಿಸಿಕೊಂಡಾಗ ಬಾವಿಯ ಮೇಲಿದ್ದವರು ತಕ್ಣಣ ಅಗ್ನಿಶಾಮಕ‌ದವರಿಗೆ ಮಾಹಿತಿ ನೀಡಿದರು.

ಅವರು ಬಂದು ತಕ್ಷಣ ಬಾವಿಗೆ ಇಳಿದು ಇಬ್ಬರನ್ನೂ ಮೇಲೆತ್ತಿ ರಕ್ಷಿಸಿದರು. ಅಗ್ನಿಶಾಮಕ ದಳ ಸಿಬ್ಬಂದಿ ಲೀಲಾಧರ್ ಬಾವಿಗೆ ಇಳಿದು ಧೈರ್ಯದಿಂದ ರಕ್ಷಣಾ ಕಾರ್ಯಾಚರಣೆ ನಡೆಸಿಸಿದರು.ಇತರ ಸಿಬ್ಬಂದಿ ಸಹಕರಿಸಿದರು.