ದ.ಕ. ಜಿಲ್ಲೆಯಲ್ಲಿ ಜೂ.1ರಂದು ನಾಲ್ಕು ಕೊರೊನಾ ಪಾಸಿಟಿವ್‌ ಬೆಳಕಿಗೆ!

ಮಂಗಳೂರು: ರಾಜ್ಯದಲ್ಲಿ ಕೊರೊನಾ ಸೋಂಕು ದಿನದಿಂದ ದಿನಕ್ಕೆ ವ್ಯಾಪಕವಾಗಿ ಹರಡುತ್ತಿದೆ. ಜೂ. 1ರಂದು ಕೊರೊನಾ ಬುಲೆಟಿನ್‌ನಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಒಟ್ಟು 4 ಮಂದಿಯಲ್ಲಿ ಕೊರೊನಾ ಸೋಂಕು ಪತ್ತೆಯಾಗಿದೆ. ಈ ಮೂಲಕ ಒಟ್ಟು ಪ್ರಕರಣಗಳ ಸಂಖ್ಯೆ 137ಕ್ಕೆ ಏರಿಕೆಯಾಗಿದೆ.

ಸೋಮವಾರದ ವರದಿಯಲ್ಲಿ ದೃಢಪಟ್ಟ ಹೊಸ ಪ್ರಕರಣಗಳಲ್ಲಿ 50 ವರ್ಷದ ವ್ಯಕ್ತಿಯೊಬ್ಬರು ಗುಜರಾತ್‌ನಿಂದ ಬಂದಿದ್ದು, ಸಾಂಸ್ಥಿಕ ಕ್ವಾರಂಟೈನ್‌ನಲ್ಲಿದ್ದರು. ಅವರಿಗೆ ಪರೀಕ್ಷೆ ನಡೆಸಿದಾಗ ಕೊರೊನಾ ಪಾಸಿಟಿವ್‌ ವರದಿ ಬಂದಿದೆ. ಬೆಳ್ತಂಗಡಿಯ ಕಲ್ಲೇರಿಯ 45 ವರ್ಷದ ಮಹಿಳೆ ಉಸಿರಾಟದಲ್ಲಿಸಮಸ್ಯೆಯಿಂದ ಪರೀಕ್ಷೆ ಮಾಡಿಸಿದಾಗ ಕೊರೊನಾ ಸೋಂಕು ದೃಢಪಟ್ಟಿದೆ.

ಸುರತ್ಕಲ್‌ ನಿವಾಸಿ 24 ವರ್ಷದ ಮಹಿಳೆ ಫೆಬ್ರವರಿಯಲ್ಲಿ ಬಹರೈನ್‌ನಿಂದ ಪೂನಾ ಮಾರ್ಗವಾಗಿ ಸುರತ್ಕಲ್‌ಗೆ ಬಂದಿದ್ದರು. ಇದೀಗ ಮರಳಿ ಬಹರೈನ್‌ಗೆ ಹೋಗಲು ಸಿದ್ಧತೆ ನಡೆಸಿದ ಕಾರಣ ಖಾಸಗಿ ಪ್ರಯೋಗಾಲಯದಲ್ಲಿ ಪರೀಕ್ಷೆ ನಡೆಸಿದ್ದರು. ಇವರ ವರದಿಯಲ್ಲಿಕೊರೊನಾ ಪಾಸಿಟಿವ್‌ ಬಂದಿದೆ.

27 ವರ್ಷದ ವ್ಯಕ್ತಿಯೊಬ್ಬರು ವಿಮಾನ ಸಿಬ್ಬಂದಿಯಾಗಿದ್ದು, ಕರ್ತವ್ಯಕ್ಕೆ ಹಾಜರಾಗಬೇಕಾದರೆ ನಿಯಮಾವಳಿಯಂತೆ ತಮ್ಮ ಗಂಟಲಿನ ಮಾದರಿಯ ಪರೀಕ್ಷೆ ನಡೆಸಿದ್ದರು. ಸೋಮವಾರ ಇವರ ವರದಿ ಬಂದಿದ್ದು, ಕೊರೊನಾ ದೃಢಪಟ್ಟಿದೆ. ಜಿಲ್ಲಾಡಳಿತ ಕೂಡ ಕೊರೊನಾ ನಿಯಂತ್ರಣಕ್ಕೆ ಹರಸಾಹಸ ಪಡುತ್ತಿದೆ. ಕಟ್ಟು ನಿಟ್ಟಿನ ಕ್ರಮಗಳ ಮೂಲಕ ಕಂಟ್ರೋಲ್‌ಗೆ ಮುಂದಾಗಿದೆ.