ಕುಕ್ಕೆಯಲ್ಲಿ ಗುಡುಗು, ಮಿಂಚು ಸಹಿತ ಭಾರಿ ಮಳೆ; ಮನೆಗಳಿಗೆ ನುಗ್ಗಿದ ನೀರು

ಸುಬ್ರಹ್ಮಣ್ಯ(ದ.ಕ.): ಕುಕ್ಕೆ ಸುಬ್ರಹ್ಮಣ್ಯ ಸೇರಿದಂತೆ ಇಲ್ಲಿನ ಪರಿಸರದಲ್ಲಿ ಗುರುವಾರ ಸಂಜೆ ಗುಡುಗು, ಮಿಂಚು, ಸಿಡಿಲು ಸಹಿತ ಭಾರಿ ಮಳೆ ಸುರಿದಿದೆ.

ಸಂಜೆ 6.30ರಿಂದ ಗುಡುಗು ಮಿಂಚಿನ ಅಬ್ಬರ ಆರಂಭವಾಗಿತ್ತು. ರಾತ್ರಿ 7 ಗಂಟೆಗೆ ಆರಂಭವಾದ ಭಾರಿ ಮಳೆ ಸುಮಾರು 3 ಗಂಟೆ ಕಾಲ ಎಡೆಬಿಡದೆ ಸುರಿಯಿತು.

ಸುಬ್ರಹ್ಮಣ್ಯ ಸೇರಿದಂತೆ ಇಲ್ಲಿನ ಪರಿಸರದ ಕೊಲ್ಲಮೊಗ್ರು, ಹರಿಹರ ಪಲ್ಲತ್ತಡ್ಕ, ಕಲ್ಮಕಾರು, ಬಾಳುಗೋಡು, ನಡುಗಲ್ಲು, ಗುತ್ತಿಗಾರು, ಪಂಜ, ವಳಲಂಬೆ, ಕಮಿಲ, ಬಳ್ಪ, ಬೀದಿಗುಡ್ಡೆ, ಕೇನ್ಯ, ನಿಂತಿಕಲ್ಲು ಮತ್ತಿತರ ಕಡೆ ಅಬ್ಬರದ ಮಳೆಯಾಯಿತು.

ಕೊಲ್ಲಮೊಗ್ರು ಸೇತುವೆ ಬಂದ್‌
ಭಾರಿ ಮಳೆಗೆ ಕೊಲ್ಲಮೊಗ್ರು ಹೊಳೆಯಲ್ಲಿ ಪ್ರವಾಹ ಉಂಟಾಗಿ ಕೊಲ್ಲಮೊಗ್ರು ಸೇತುವೆ ಮುಳುಗಡೆಗೊಂಡು ಸಂಚಾರ ಸ್ಥಗಿತಗೊಂಡಿತ್ತು. ಹೊಳೆಯ ನೀರು ಸಮೀಪದ ಹಲವಾರು ಮನೆಗಳಿಗೆ ನುಗ್ಗಿದೆ.

ಸುಬ್ರಹ್ಮಣ್ಯ ದರ್ಪಣ ತೀರ್ಥ ನದಿ ಪ್ರವಾಹದಿಂದ ತುಂಬಿ ಹರಿಯಿತು. ಕೃಷಿ ತೋಟಗಳಿಗೆ ಮಳೆ ನೀರು ನುಗ್ಗಿದ ಕಾರಣ ಕೃಷಿಕರು ತೋಟಕ್ಕೆ ಹಾಕಿದ್ದ ಗೊಬ್ಬರ ನೀರು ಪಾಲಾಯಿತು. ತೋಟದಲ್ಲಿದ್ದ ಫಸಲುಗಳು ನೀರಿನಲ್ಲಿ ಕೊಚ್ಚಿ ಹೋಗಿವೆ.

ಭಾರಿ ಮಳೆಗೆ ಆದಿ ಸುಬ್ರಹ್ಮಣ್ಯದಲ್ಲಿಅಂಗಡಿ- ಮುಂಗಟ್ಟುಗಳಿಗೆ ಹಾಗೂ ಸುಬ್ರಹ್ಮಣ್ಯ ಪೇಟೆಯ ವಸತಿಗೃಹ ಹಾಗೂ ಮನೆಗಳಿಗೆ ನೀರು ನುಗ್ಗಿದೆ.

ಹಗಲು ಬಿಸಿಲು ಕುಕ್ಕೆ ಸುಬ್ರಹ್ಮಣ್ಯ ಸೇರಿದಂತೆ ಇಲ್ಲಿನ ಪರಿಸರದಲ್ಲಿ ಸಂಜೆ 5 ಗಂಟೆ ತನಕ ಬಿಸಿಲಿನ ವಾತಾವರಣ ಇತ್ತು. ಬಳಿಕ ಒಮ್ಮಿಂದೊಮ್ಮೆಲೆ ಭಾರಿ ಮೋಡ ಕವಿದು ಗುಡುಗು ಮಿಂಚು ಸಹಿತ ಧಾರಾಕಾರ ಮಳೆ ಸುರಿಯಿತು.