ಸಿದ್ದಿಕ್ ಕುಂಬ್ರ, ಪುತ್ತೂರು
ಪ್ರಗತಿಪರ ಕೃಷಿಕರೊಬ್ಬರು ಸಿಮೆಂಟ್ ಶೀಟಿನಲ್ಲಿ ಜೇನುಗೂಡನ್ನು ತಯಾರಿಸುವ ಮೂಲಕ ಯಶಸ್ಸು ಕಂಡಿದ್ದು, ಮರದ ಪೆಟ್ಟಿಗೆಯನ್ನೇ ಇನ್ನು ಮುಂದೆ ಜೇನು ಕೃಷಿಕರು ಆಶ್ರಯಿಸಬೇಕಿಲ್ಲ ಮತ್ತು ಮರದ ಪೆಟ್ಟಿಗೆಯಲ್ಲಿ ಮಾತ್ರ ಜೇನು ಸಂಸಾರ ಮಾಡುತ್ತದೆ ಎಂಬುದೂ ಸುಳ್ಳು ಎಂದು ಸಾಬೀತು ಪಡಿಸಿದ್ದಾರೆ.
ಪೆರ್ನಾಜೆಯ ಪ್ರಗತಿಪರ ಕೃಷಿಕ ಕುಮಾರ್ ಪೆರ್ನಾಜೆ ಈ ಹೊಸ ಪ್ರಯೋಗ ಮಾಡಿ ಯಶಸ್ವಿಯಾದ ಕೃಷಿಕ. ಕಳೆದ ಹಲವಾರು ವರ್ಷಗಳಿಂದ ಅಡಕೆ ಕೃಷಿ ಜತೆಗೆ ಜೇನು ಕೃಷಿಯಲ್ಲಿ ತನ್ನನ್ನು ತೊಡಗಿಸಿಕೊಂಡಿರುವ ಕುಮಾರ್ ಪೆರ್ನಾಜೆ 50ಕ್ಕೂ ಮಿಕ್ಕಿ ಜೇನುಗೂಡು ಇಟ್ಟುಕೊಂಡಿದ್ದಾರೆ. ಮರದ ಪೆಟ್ಟಿಗೆಯಲ್ಲೇ ಜೇನು ಕೃಷಿ ಮಾಡುತ್ತಿದ್ದ ಅವರು, ಕೆಲವು ದಿನಗಳ ಹಿಂದೆ ಸಿಮೆಂಟ್ ಶೀಟ್ ಮೂಲಕ ಜೇನುಪೆಟ್ಟಿಗೆ ತಯಾರಿಸಿ ಅದರಲ್ಲಿ ಜೇನು ಸಂಸಾರವನ್ನು ಸಾಕುತ್ತಿದ್ದು, ಪ್ರಯೋಗ ಯಶಸ್ವಿಯೂ ಆಗಿದೆ.
ಲಾಭದಾಯಕ ಪ್ರಯೋಗ: ಸಾಧಾರಣವಾಗಿ ಹೆಚ್ಚಿನ ಜೇನು ಕೃಷಿಕರು ಮರದ ಪೆಟ್ಟಿಗೆಯಲ್ಲೇ ಜೇನು ಕೃಷಿ ಮಾಡುತ್ತಾರೆ. ಇದು ಅನೇಕ ವರ್ಷಗಳಿಂದ ಮಾಡುತ್ತಿರುವ ಒಂದು ಜೇನು ಕೃಷಿ ಪದ್ಧತಿಯೂ ಹೌದು. ಮರದ ಪೆಟ್ಟಿಗೆಯ ಗೂಡಿನಲ್ಲಿ ಮಾತ್ರ ಜೇನು ಸಾಕಣೆ ಸಾಧ್ಯ ಎಂಬ ನಂಬಿಕೆ ಇಂದಿಗೂ ಚಾಲ್ತಿಯಲ್ಲಿದೆ. ಆದರೆ ಕುಮಾರ್ ಪೆರ್ನಾಜೆಯವರು ಹೊಸ ಪ್ರಯೋಗ ಮಾಡಿ ಜೇನು ಸಂಸಾರವನ್ನು ಸಿಮೆಂಟ್ ಶೀಟಿನ ಪೆಟ್ಟಿಗೆಯೊಳಗೆ ಸೇರಿಸಿದ್ದಾರೆ. ಜೇನು ಅದರಲ್ಲಿಯೇ ಸಂಸಾರ ಮಾಡುತ್ತಿದೆ. ಪೆಟ್ಟಿಗೆಯ ಸುತ್ತ ಮಾತ್ರ ಸಿಮೆಂಟ್ ಶೀಟನ್ನು ಬಳಕೆ ಮಾಡಿದ್ದು ಒಳಗಿರುವ ಜೇನು ನೊಣಗಳು ಕುಳಿತುಕೊಳ್ಳುವ ಪಟ್ಟಿ(ಎದಿ) ಅದು ಸಂಪೂರ್ಣ ಮರದಿಂದ ಕೂಡಿದೆ. ಜೇನುಗೂಡು ತಯಾರಿಸಲು ಅದಕ್ಕೆ ಅಗತ್ಯವಾಗಿ ಬೇಕಾದ ಪಟ್ಟಿ ಮಾರುಕಟ್ಟೆಯಲ್ಲಿ ದೊರೆಯುತ್ತದೆ. ಸಿಮೆಂಟ್ ಶೀಟಿನ ಪೆಟ್ಟಿಗೆ ತಯಾರಿಸಿ ಅದರಲ್ಲಿ ಪಟ್ಟಿ ಅಳವಡಿಸಿ ಜೇನುಮನೆ ನಿರ್ಮಿಸಬಹುದು.
ದೀರ್ಘ ಬಾಳಿಕೆ: ಮರದ ಪೆಟ್ಟಿಗೆ ಹೆಚ್ಚು ಬಾಳಿಕೆ ಬರುವುದಿಲ್ಲ. ಮಳೆಗಾಲದಲ್ಲಿ ಅಥವಾ ತೋಟದಲ್ಲಿ ಗೂಡು ಇರಿಸಿದ್ದಲ್ಲಿ ಗೆದ್ದಲು ಹಿಡಿಯುತ್ತದೆ. ಆದರೆ ಸಿಮೆಂಟ್ ಶೀಟಿನ ಕವರ್ ಬಾಕ್ಸ್ ಮಾಡಿದಲ್ಲಿ ನೀರಿನಿಂದ ಪೆಟ್ಟಿಗೆ ಒದ್ದೆಯಾಗುವುದು ಅಥವಾ ಗೆದ್ದಲು ಹಿಡಿಯುವ ಪ್ರಮೇಯವೇ ಬರುವುದಿಲ್ಲ. ತೋಟದಲ್ಲಿ ಅಥವಾ ನೆರಳಿನಲ್ಲಿ ಗೂಡು ಇರಿಸಿದ್ದಲ್ಲಿ ಸದಾ ತಂಪಿನಿಂದ ಕೂಡಿರುತ್ತದೆ. ಬಿಸಿಲಲ್ಲಿ ಇಟ್ಟರೆ ಅದಕ್ಕೆ ಬಿಸಿಲು ತಾಗದಂತೆ ಮುಚ್ಚಿಡಬೇಕಾಗಿರುವ ಕಾರಣ ಬೇಸಿಗೆಯಲ್ಲೂ ಸಿಮೆಂಟ್ ಗೂಡು ಸದಾ ತಂಪಿನಿಂದ ಕೂಡಿದ್ದು ಬಿಸಿಯಾಗುವ ಸಂಭವವೇ ಅತ್ಯಂತ ಕಡಿಮೆ ಎನ್ನುತ್ತಾರೆ ಕೃಷಿಕ ಕುಮಾರ್ ಪೆರ್ನಾಜೆ.
ನನ್ನದೇ ಸ್ವಂತ ಆಲೋಚನೆಯಲ್ಲಿ ಈ ಪ್ರಯೋಗಮಾಡಿದ್ದೇನೆ. ಪ್ರಾರಂಭದಲ್ಲಿ 15 ಗೂಡು ಮಾಡಿದ್ದು ಎಲ್ಲದರಲ್ಲೂ ಜೇನು ಸಂಸಾರ ಇದೆ. ದುಬಾರಿ ಜೇನು ಪೆಟ್ಟಿಗೆ ಖರೀದಿಸಲು ಬಡ ಕೃಷಿಕರಿಗೆ ಸಾಧ್ಯವಿಲ್ಲದ ಕಾರಣ ಅತ್ಯಂತ ಕಡಿಮೆ ಖರ್ಚಿನಲ್ಲಿ ಸಿಮೆಂಟ್ ಶೀಟ್ ಮೂಲಕ ಗೂಡು ತಯಾರಿಸಬಹುದು. ಮರದ ಪೆಟ್ಟಿಗೆಯಲ್ಲೇ ಜೇನು ಗೂಡು ನಿರ್ಮಿಸಬೇಕು ಎಂಬ ಕಡ್ಡಾಯವೇನಿಲ್ಲ. ಬಿಸಿಲಿಗೆ ಯಾವುದೇ ರೀತಿಯ ತೊಂದರೆಯೂ ಸಿಮೆಂಟ್ ಗೂಡಿನಲ್ಲಿ ಇಲ್ಲ. ಹೆಚ್ಚು ಬಾಳಿಕೆ ಬರುವ ಕಾರಣ ಕೃಷಿಕರೇ ಸ್ವಂತವಾಗಿ ಗೂಡು ತಯಾರಿಸಿ ಜೇನು ಕೃಷಿ ಮಾಡಬಹುದು. -ಕುಮಾರ್ ಪೆರ್ನಾಜೆ,