ಸಮುದ್ರದಲ್ಲಿ ಸಿಲುಕಿದ್ದ 24 ಮೀನುಗಾರರ ರಕ್ಷಿಸಿದ ಕೋಸ್ಟ್‌ಗಾರ್ಡ್‌

ಮಂಗಳೂರು: ಹೊನ್ನಾವರ ಬಂದರಿನಿಂದ ಮೀನುಗಾರಿಕೆಗೆ ತೆರಳಿದ್ದ 24 ಮೀನುಗಾರರು ಸಮುದ್ರ ದಡದಿಂದ 15 ನಾಟಿಕಲ್‌ ದೂರದಲ್ಲಿ ಅಪಾಯಕ್ಕೆ ಸಿಲುಕಿದ್ದು, ಅವರನ್ನು ಮಂಗಳೂರಿನ ಕೋರ್ಸ್‌ಗಾರ್ಡ್‌ ಸಿಬ್ಬಂದಿ ರಕ್ಷಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಭಟ್ಕಳದ 'ಖಮ್ರುಲ್ಲಾಬಾಹರ್‌' ಹೆಸರಿನ ಯಾಂತ್ರಿಕ ಬೋಟ್‌ ಮೀನುಗಾರಿಕೆಗೆ ತೆರಳಿತ್ತು. ಗುರುವಾರ ಮಧ್ಯಾಹ್ನ 2 ಗಂಟೆ ಸುಮಾರಿಗೆ ಬೋಟ್‌ನ ಎಂಜಿನ್‌ನಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡು ಸ್ತಬ್ಧಗೊಂಡಿತು. ಪರಿಣಾಮ ಅದರಲ್ಲಿದ್ದ 24 ಮೀನುಗಾರರು ಅಪಾಯದಲ್ಲಿ ಸಿಲುಕಿದ್ದರು. ಒಂದೆಡೆ ಸಮುದ್ರದಲ್ಲಿ ಮಳೆ, ಬಿರುಗಾಳಿ. ಇನ್ನೊಂದೆಡೆ ಕೈಕೊಟ್ಟ ಬೋಟ್‌ನಿಂದ ಮೀನುಗಾರರು ಆತಂಕಕ್ಕೊಳಗಾಗಿದ್ದರು. ಈ ಬಗ್ಗೆ ಕೋಸ್ಟ್‌ಗಾರ್ಡ್‌, ಕರಾವಳಿ ಕಾವಲು ಪೊಲೀಸರಿಗೆ ಮಾಹಿತಿ ನೀಡಲಾಯಿತು.

ಕಾರ್ಯಾಚರಣೆ ಆರಂಭ: ಮಾಹಿತಿ ಪಡೆದ ಮಂಗಳೂರು ಕೋಸ್ಟ್‌ಗಾರ್ಡ್‌ ಸಿಬ್ಬಂದಿ ತಕ್ಷಣ ನೌಕೆಯ ಮೂಲಕ ಅಪಾಯದಲ್ಲಿ ಸಿಲುಕಿದ್ದ ಮೀನುಗಾರರ ದೋಣಿಯ ಬಳಿ ತೆರಳಿದ್ದಾರೆ. ಆದರೆ ಪ್ರತಿಕೂಲ ಹವಾಮಾನದಿಂದ ಅವರನ್ನು ಕರೆ ತರಲು ಸಾಧ್ಯವಾಗಿರಲಿಲ್ಲ.

ರಾಜ್ಯದಲ್ಲಿ 4.4 ಲಕ್ಷ ದಾಟಿದ ಸೋಂಕಿತರು: 7 ಸಾವಿರ ದಾಟಿದ ಮೃತರ ಸಖ್ಯೆ!

ಶುಕ್ರವಾರ ಬೆಳಗ್ಗೆ ಕಾರವಾರ ಮೀನುಗಾರಿಕಾ ಉಪ ನಿರ್ದೇಶಕರ ಮನವಿ ಮೇರೆಗೆ ಇತರ ಮೀನುಗಾರರು ತಮ್ಮ ಬೋಟ್‌ನೊಂದಿಗೆ ತೆರಳಿ ಕಾರ್ಯಾಚರಣೆ ನಡೆಸಿದ್ದಾರೆ. ಬಳಿಕ ಕೋಸ್ಟ್‌ಗಾರ್ಡ್‌ ನೌಕೆ ತೆರಳಿ ಎಲ್ಲ ಮೀನುಗಾರರನ್ನು ಸುರಕ್ಷಿತವಾಗಿ ಭಟ್ಕಳ ಬಂದರಿಗೆ ಕರೆ ತಂದಿದ್ದಾರೆ.