ಆ್ಯಪ್ನಗರ

ಕಾಣೆಯಾದ ಚಾರಣಿಗನನ್ನು ರಕ್ಷಿಸಿದ ಕುಕ್ಕೆ ದೇವರ ತೀರ್ಥಕ್ಕೆ ಬರುವ ನೀರಿನ ಹಾದಿ!

ಬೆಂಗಳೂರಿನಿಂದ ಕುಮಾರ ಪರ್ವತಕ್ಕೆ ಚಾರಣ ಹೊರಟಿದ್ದ 12 ಮಂದಿ ಯುವಕರ ತಂಡದಲ್ಲಿ ನಾಪತ್ತೆಯಾಗಿದ್ದ ಯುವಕನೊಬ್ಬ ಮಂಗಳವಾರ ಮಧ್ಯಾಹ್ನ ಪತ್ತೆಯಾಗಿದ್ದಾರೆ. ಸುಬ್ರಹ್ಮಣ್ಯ ಬಳಿಯ ಕಲ್ಲಗುಡ್ಡೆ ಎಂಬಲ್ಲಿ ಸಂತೋಷ್ ಪತ್ತೆಯಾಗಿದ್ದಾರೆ. ಅವರು ಸಿಕ್ಕಿದ್ದು ಹೇಗೆ ಎಂಬ ಕುರಿತು ವರದಿ ಇಲ್ಲಿದೆ ನೋಡಿ.

Vijaya Karnataka Web 17 Sep 2019, 2:50 pm
ಸುಬ್ರಹ್ಮಣ್ಯ: ಭಾನುವಾರ ಸಂಜೆ ಹೊತ್ತಿಗೆ ಕುಮಾರ ಪರ್ವತದಲ್ಲಿ ನಾಪತ್ತೆಯಾಗಿದ್ದ ಬೆಂಗಳೂರಿನ ಗಾಯತ್ರಿ ನಗರ ನಿವಾಸಿ ಸಂತೋಷ್ ಇಂದು ಮಧ್ಯಾಹ್ನ ಪತ್ತೆಯಾಗಿದ್ದಾರೆ.
Vijaya Karnataka Web trekker santosh


ಕುಕ್ಕೆ ಸುಬ್ರಹ್ಮಣ್ಯ ದೇವಳದ ಸಮೀಪ ಇರುವ ಆದಿ ಸುಬ್ರಹ್ಮಣ್ಯ ಬಳಿಯ ಕಲ್ಲಗುಡ್ಡೆ ಎಂಬಲ್ಲಿ ಸಂತೋಷ್ ಪತ್ತೆಯಾಗಿದ್ದಾರೆ. ಬೆಂಗಳೂರಿನ 12 ಮಂದಿ ಚಾರಣಿಗರ ತಂಡದಲ್ಲಿ ಕುಮಾರ ಪರ್ವತಕ್ಕೆ ಶನಿವಾರ ಚಾರಣ ಹೊರಟಿದ್ದ ಸಂತೋಷ್ ಭಾನುವಾರ ಪರ್ವತ ಇಳಿಯುವ ಹಾದಿಯಲ್ಲಿ ಇದ್ದಕ್ಕಿದ್ದಂತೆ ತಂಡದಿಂದ ಬೇರ್ಪಟ್ಟಿದ್ದರು. ಈ ಬಗ್ಗೆ ಸುಬ್ರಹ್ಮಣ್ಯ ಠಾಣೆಯಲ್ಲಿ ಕೇಸು ದಾಖಲಾದ ಬಳಿಕ ಸೋಮವಾರ ಶೋಧ ಕಾರ್ಯಾಚರಣೆ ಆರಂಭಗೊಂಡಿತ್ತು.

ಕುಮಾರ ಪರ್ವತಕ್ಕೆ ಟ್ರೆಕ್ಕಿಂಗ್‌ ಹೋಗಿ ನಾಪತ್ತೆಯಾಗಿದ್ದ ಬೆಂಗಳೂರಿನ ಯುವಕ ಪತ್ತೆ

ಸಂತೋಷ್ ಭಾನುವಾರ ತಮ್ಮ ಸಹ ಚಾರಣಿಗರಿಂದ ಬೇರ್ಪಟ್ಟ ಬಳಿಕ ಒಬ್ಬಂಟಿಯಾಗಿ ಬಂದಿದ್ದರೂ ದಾರಿ ತಪ್ಪಿದ ಕಾರಣ ಕಂಗಾಲಾಗಿದ್ದರು. ಭಾನುವಾರ ರಾತ್ರಿ ಪರ್ವತ ಪ್ರದೇಶದಲ್ಲೇ ಕಳೆದಿದ್ದರು. ಸೋಮವಾರವೂ ಕಾಡು ಮೇಡು ಅಲೆಯುತ್ತಾ ಬರುತ್ತಿದ್ದಾಗ ಪೈಪ್ ಲೈನೊಂದು ಸಿಕ್ಕಿತ್ತು. ಇದು ನಗರ ಪ್ರದೇಶಕ್ಕೆ ಸಂಪರ್ಕ ಕಲ್ಪಿಸಬಹುದು ಎಂಬುದನ್ನು ಗ್ರಹಿಸಿದ ಸಂತೋಷ್ ಅದೇ ಪೈಪ್ ಹಾದಿ ಹಿಡಿದು ಪರ್ವತ ಇಳಿದು ಮಂಗಳವಾರ ಮಧ್ಯಾಹ್ಮ ಸುಬ್ರಹ್ಮಣ್ಯ ಪಟ್ಟಣ ತಲುಪಿದ್ದಾರೆ. ಸ್ಥಳೀಯರು ಅವರಿಗೆ ನೀರು, ಆಹಾರ ನೀಡಿ ಉಪಚರಿಸಿದ್ದಾರೆ.

ಕುಮಾರ ಪರ್ವತದಲ್ಲಿ ಟ್ರೆಕ್ಕಿಂಗ್‌: 6-5=2 ಸಿನೆಮಾ ಮಾದರಿಯಲ್ಲೇ ಯುವಕ ಮಿಸ್ಸಿಂಗ್!

ಬೆಟ್ಟದ ಮೇಲಿನಿಂದ ಹರಿಯುವ ಶುದ್ಧ ನೀರನ್ನು ದೇವಳಕ್ಕೆ ತರಲು ಈ ಪೈಪ್ ಲೈನ್ ಹಾಕಲಾಗಿತ್ತು. ಕಡು ಬೇಸಿಗೆಯಲ್ಲಿ ನೀರಿನ ಸಮಸ್ಯೆ ತಲೆ ದೋರಿದಾಗ ಇದೇ ನೀರನ್ನು ದೇವರ ತೀರ್ಥ ಮತ್ತಿತರ ದೇಗುಲದ ಧಾರ್ಮಿಕ ವಿಧಿಗಳಿಗೆ ಬಳಸಲಾಗುತ್ತಿದೆ. ಅದೇ ನೀರಿನ ಪೈಪ್ಲೈನ್ ಈಗ ಯುವಕನ ಪ್ರಾಣ ರಕ್ಷಿಸಿದೆ. ಈ ಪೈಪ್ ಇಲ್ಲದೇ ಇರುತ್ತಿದ್ದರೆ ಸಂತೋಷ್ ಇನ್ನೆಷ್ಟು ಸಮಯ ಕಾಡಲ್ಲಿ ಅಲೆದಾಡುತ್ತಿದ್ದರೋ ಎಂಬ ಪ್ರಶ್ನೆ ಕಾಡುತ್ತಿದೆ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ