ಕುವೈಟ್‌ ಅತಂತ್ರ: 28 ಮಂದಿ ವೀಸಾ ರದ್ದು

ಮಂಗಳೂರು: ಕುವೈಟ್‌ಗೆ ಉದ್ಯೋಗಕ್ಕೆ ತೆರಳಿ ಬಳಿಕ ಅತಂತ್ರರಾದ 28 ಮಂದಿಯ ವೀಸಾವನ್ನು ಕಂಪನಿ ರದ್ದುಪಡಿಸಿದ್ದು, ಅವರು ಬುಧವಾರ ತಡರಾತ್ರಿ ಭಾರತಕ್ಕೆ ಮರಳಲಿದ್ದಾರೆ.

ಈಗಾಗಲೇ ಮಂಜೇಶ್ವರ ಅಭಿಷೇಕ್‌ ಮತ್ತು ಆಂಧ್ರದ ಪಂಕಜ್‌ ಎಂಬವರು ಭಾರತಕ್ಕೆ ವಾಪಸ್‌ ಆಗಿದ್ದಾರೆ. ಮಂಗಳವಾರ ಕಂಪನಿ ಸಭೆ ನಡೆಸಿ 15 ಮಂದಿಯ ವೀಸಾ ರದ್ದುಪಡಿಸಿರುವ ಬಗ್ಗೆ ಹಾಗೂ ಉಳಿದವರ ವೀಸಾ ಬುಧವಾರ ರದ್ದುಪಡಿಸಿ ಪಾಸ್‌ಪೋರ್ಟ್‌ ನೀಡುವುದಾಗಿ ನಿರ್ಧಾರ ಪ್ರಕಟಿಸಿದೆ.

ಸೋಮವಾರ 15 ಮಂದಿ ಆಂಧ್ರದವರು ಹೊರಡಬೇಕಿತ್ತು, ಆದರೆ ಕಂಪನಿ ವೀಸಾ ರದ್ದುಪಡಿಸದೆ, ರಜೆಯೂ ನೀಡದ ಕಾರಣ ಅವರ ವಿಮಾನ ಟಿಕೆಟ್‌ ರದ್ದಾಗಿತ್ತು. ಇದೀಗ 28 ಮಂದಿಯ ಸಮಸ್ಯೆ ಬಗೆಹರಿದಿದ್ದು, ಅವರು ತಾಯ್ನಾಡಿಗೆ ಮರಳಲು ಅನುಕೂಲವಾಗಿದೆ.

ಇನ್ನೂ ಹಲವರು ಅತಂತ್ರ: ತಾಂತ್ರಿಕ ಕಾರಣದಿಂದ ಇಮ್ತಿಯಾಜ್‌, ಅಜೀಝ್‌ ಅಬ್ದುಲ್ಲ, ಹನೀಫ್‌ ಅಬ್ಬು, ಮೊಹಮ್ಮದ್‌ ಇರ್ಫಾನ್‌, ಗಣೇಶ್‌ ಶಿವರಾಮ, ಅಬ್ದುಲ್‌ ಅಜೀಝ್‌, ಮೊಹಮ್ಮದ್‌ ಆರೀಫ್‌ ಬನ್ನೂರು ಮತ್ತು ಅಶ್ಪಕ್‌ ಅಮೀರ್‌ ಹುಸೈನ್‌ ಸೇರಿದಂತೆ 15 ಮಂದಿಯ (ಮಂಗಳೂರಿನ 8 ಮಂದಿ) ಕಂಪನಿ ಜತೆ ಕಾನೂನು ವಿಷಯಗಳು ಇತ್ಯರ್ಥಗೊಳ್ಳಲು ಬಾಕಿಯಿದ್ದು, ಅವರ ಆಗಮನ ಇನ್ನೂ ಅತಂತ್ರವಾಗಿದೆ.