ತಂದೆಯ ಮರಣದ ಸುದ್ದಿ ಕೇಳಿ ಪುತ್ರ ಆತ್ಮಹತ್ಯೆ

ಸಂಟ್ಯಾರ್‌: ತಂದೆಯ ಮರಣದ ವಾರ್ತೆ ಕೇಳಿದ ತಕ್ಷ ಣ ಮನೆಯಿಂದ ತೆರಳಿದ ಯುವಕನೊಬ್ಬ ಮನೆ ಸಮೀಪದ ಮರಕ್ಕೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡ ಘಟನೆ ಸಂಟ್ಯಾರ್‌ನಲ್ಲಿ ನಡೆದಿದೆ.

ಆರ್ಯಾಪು ಗ್ರಾಮದ ಸಂಟ್ಯಾರ್‌ ಶಾಲಾ ಬಳಿ ನಿವಾಸಿ ಸುರೇಶ್‌ (31) ಆತ್ಮಹತ್ಯೆ ಮಾಡಿಕೊಂಡ ಯುವಕ. ಸುರೇಶ್‌ ಅವರ ತಂದೆ ಜು.14ರಂದು ನಿಧನರಾಗಿದ್ದರು. ಆ ದಿನ ತನ್ನ ಚಿಕ್ಕಪ್ಪ ಚಿದಾನಂದ ಅವರ ಮನೆಯಲ್ಲಿದ್ದ ವೇಳೆ ಯಾರೋ ಕರೆ ಮಾಡಿ ತಂದೆ ಮರಣ ಹೊಂದಿದ ವಿಚಾರವನ್ನು ತಿಳಿಸಿದ್ದಾರೆ.

ಅಲ್ಲಿಂದ ತೆರಳಿದ್ದ ಸುರೇಶ್‌ ಬಳಿಕ ನಾಪತ್ತೆಯಾಗಿದ್ದರು. ಹುಡಕಾಡಿದರೂ ಸಿಗದೇ ಇರುವಾಗ ಚಿದಾನಂದ ಪತ್ನಿ ಯಮುನಾ ಅವರು ಸಂಪ್ಯ ಗ್ರಾಮಾಂತರ ಠಾಣೆಗೆ ದೂರು ನೀಡಿದ್ದರು. ಜು. 16 ರಂದು ಸಂಟ್ಯಾರ್‌ ಶಾಲಾ ಬಳಿ ಗುಡ್ಡದಲ್ಲಿ ವಾಸನೆ ಬರುವುದನ್ನು ಗಮನಿಸಿದ ಸ್ಥಳೀಯರು ಅಲ್ಲಿ ತೆರಳಿದಾಗ ಸುರೇಶ್‌ ಅವರು ಮರಕ್ಕೆ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿದ್ದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ತಂದೆಯ ಮರಣದ ಸುದ್ದಿ ಕೇಳಿ ಮಾನಸಿಕ ಖಿನ್ನತೆಗೊಳಗಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಶಂಕಿಸಲಾಗಿದೆ. ಸಂಪ್ಯ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.