9ರಂದು ಮಾಂಡೊವಿ ಮೋಟಾರ್ಸ್‌ ಅಟೋಕ್ರಾಸ್‌-2019

ಮಂಗಳೂರು: ಮಂಗಳೂರು ಮೋಟಾರ್‌ ಸ್ಪೋರ್ಟ್ಸ್ ಅಸೋಸಿಯೇಶನ್‌ ವತಿಯಿಂದ ಜೂ.9ರಂದು ಬಂಗ್ರ ಕೂಳೂರಿನ ಗೋಲ್ಡ್‌ ಫಿಂಚ್‌ ಸಿಟಿ ಮೈದಾನದಲ್ಲಿ ಮಾಂಡೋವಿ ಮೋಟಾರ್ಸ್‌ ಅಟೋ ಕ್ರಾಸ್‌- 2019 ಸ್ಪರ್ಧೆ ಆಯೋಜಿಸಲಾಗಿದೆ.

ಮಂಗಳೂರು ಮೋಟಾರ್‌ ಸ್ಪೋರ್ಟ್ಸ್ ಅಸೋಸಿಯೇಶನ್‌ನ ಅಧ್ಯಕ್ಷ ಸುಧೀರ್‌ ಬಿ.ಕೆ. ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ಅಂದು ಬೆಳಗ್ಗೆ 8.30ರಿಂದ ಸ್ಪರ್ಧೆ ನಡೆಯಲಿದೆ. ಸ್ಪೋರ್ಟ್ಸ್ ಕಾರು ಚಲಾಯಿಸುವವರು ತೆಗೆದುಕೊಳ್ಳುವ ಸಮಯದ ಆಧಾರದಲ್ಲಿ ವಿಜೇತರನ್ನು ನಿರ್ಣಯಿಸಲಾಗುತ್ತದೆ. ಗುಂಪುಗಳಲ್ಲಿ ಕಾರು ರೇಸ್‌ ನಡೆಯುವುದಿಲ್ಲ. ವೈಯಕ್ತಿಕ ಪ್ರದರ್ಶನ ಮಾತ್ರ ಇರುತ್ತದೆ. ಸುಮಾರು 100ಕ್ಕೂ ಅಧಿಕ ಸ್ಪರ್ಧಿಗಳು ಭಾಗವಹಿಸುವ ನಿರೀಕ್ಷೆ ಇದೆ ಎಂದರು.

800 ಮೀ. ಉದ್ದ ಹಾಗೂ 15 ಮೀ. ಅಗಲದ ಡರ್ಟ್‌ ಟ್ರ್ಯಾಕ್‌, ಫಾಸ್ಟ್‌ ಕಾರ್ನರ್‌ಗಳು ಹಾಗೂ ಹೇರ್‌ಪಿನ್‌ ಬೆಂಡ್‌ಗಳನ್ನು ಹೊಂದಿರುತ್ತದೆ. ಭಾಗವಹಿಸುವ ಪ್ರತಿ ಸ್ಪರ್ಧಿಯೂ ತಲಾ 800 ಮೀ.ನಂತೆ ಎರಡು ಸುತ್ತುಗಳಲ್ಲಿ ಒಟ್ಟು ಸುಮಾರು 1.6 ಕಿ.ಮೀ. ಉದ್ದವನ್ನು ಕ್ರಮಿಸಬೇಕಾಗಿದೆ. ಪ್ರವೇಶ ನಿಗದಿಯಾದ ಸ್ಪರ್ಧಿಗಳಿಗೆ ಜೂ.8ರಂದು ಬೆಳಗ್ಗೆ 9 ಗಂಟೆಯಿಂದ 1 ಗಂಟೆಯವರೆಗೆ ಟ್ರ್ಯಾಕ್‌ನಲ್ಲಿ ತರಬೇತಿ ಪಡೆಯಲು ಅವಕಾಶವಿದೆ ಎಂದು ತಿಳಿಸಿದ್ದಾರೆ.

ಅಸೋಸಿಯೇಶನ್‌ನ ಸ್ಥಾಪಕ ಸದಸ್ಯ ಅನ್ವರ್‌ ಮಾಣಿಪ್ಪಾಡಿ ಮಾತನಾಡಿ, ರಾಷ್ಟ್ರ ಮಟ್ಟದ ಕಾರು ಚಾಲಕರು ಈ ಸ್ಪರ್ಧೆಯಲ್ಲಿ ಭಾಗವಹಿಸಲಿದ್ದು, ವಿಶೇಷವಾಗಿ ಸ್ಥಳೀಯ ಪ್ರತಿಭೆಗಳಿಗೂ ಅವಕಾಶ ಮಾಡಿಕೊಡಲಾಗಿದೆ. ಅರೂರು ಅರ್ಜುನ್‌ ರಾವ್‌, ಡೇನ್‌ ಮಸ್ಕರೇನಸ್‌, ಅರೂರು ವಿಕ್ರಮ್‌ ರಾವ್‌, ಬಬ್ಬನ್‌ ಖಾನ್‌ ಮತ್ತಿತರ ಚಾಲಕರು ಈ ಕ್ರೀಡೆಗೆ ಮೆರುಗು ನೀಡಲಿದ್ದಾರೆ ಎಂದರು.

ಶರೀರ್‌ ರಝಾಕ್‌, ಯತೀಶ್‌ ಬೈಕಂಪಾಡಿ, ಲ್ಯಾನ್ಸ್‌ ಲಾಟ್‌ ಸಲ್ಡಾನಾ ಸುದ್ದಿಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.