ಮಂಗಳೂರು - ದುಬೈ ವಿಮಾನದಲ್ಲಿ ಬ್ಯಾಗ್‌ಗಳ ಲಾಕ್‌ ಒಡೆದು ಕಳವು: ವಿಮಾನ ಪ್ರಯಾಣಿಕರ ಆತಂಕ

ಮಂಗಳೂರು: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ದುಬೈಗೆ ತೆರಳಿದ ವಿಮಾನವೊಂದರಲ್ಲಿ ಬ್ಯಾಗ್‌ನ ಲಾಕ್‌ ಒಡೆದು ಕಳವು ನಡೆಸಿದ ಆತಂಕಕಾರಿ ಘಟನೆ ಬುಧವಾರ ಮಧ್ಯಾಹ್ನ ಬೆಳಕಿಗೆ ಬಂದಿದೆ.

ದುಬೈ ತಲುಪಿದ ಬಳಿಕ ವಿಮಾನದಲ್ಲಿದ್ದ ಪ್ರಯಾಣಿಕರಿಗೆ ಕಳವು ಘಟನೆ ತಿಳಿದುಬಂದಿದೆ. ಆತಂಕಕ್ಕೊಳಗಾದ ಪ್ರಯಾಣಿಕರು ದುಬೈನಲ್ಲಿನ ವಿಮಾನ ಸಂಸ್ಥೆಯ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ. ಅಲ್ಲಿಂದ ಮಂಗಳೂರು ಹಾಗೂ ಬೆಂಗಳೂರಿನ ಕಚೇರಿಗಳಿಗೆ ಕಳವು ಘಟನೆ ಮಾಹಿತಿ ಇ-ಮೇಲ್‌ ಮೂಲಕ ರವಾನಿಸಿದ್ದಾರೆ.


ಘಟನೆ ವಿವರ: ಸೆ.11ರಂದು ಬೆಳಗ್ಗೆ 9:30ಕ್ಕೆ ದುಬೈಗೆ ತೆರಳುವ ನಿರೀಕ್ಷೆಯಲ್ಲಿದ್ದ ಪ್ರಯಾಣಿಕರು ಬೆಳಗ್ಗೆ 8:30ಕ್ಕೆ ಲಗೇಜ್‌ಗಳ ತಪಾಸಣೆ ನಡೆಸಿದ್ದರು. ನಿಗದಿತ ಸಮಯಕ್ಕಿಂತ ಮೂರು ಗಂಟೆ ತಡವಾಗಿ ವಿಮಾನ ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಇಳಿಯಿತು. ಬೆಳಗ್ಗೆ 11:45ಕ್ಕೆ ಪ್ರಯಾಣಿಕರು ಪಾಸ್‌ಪೋರ್ಟ್‌ ತಪಾಸಣೆ, ಬೋರ್ಡಿಂಗ್‌ ಪಾಸ್‌ ಪಡೆದುಕೊಂಡರು. ಆನಂತರ ವಿಮಾನವು 12:30ಕ್ಕೆ ಮಂಗಳೂರಿನಿಂದ ದುಬೈಗೆ ನಿರ್ಗಮಿಸಿತು ಎಂದು ಪ್ರಯಾಣಿಕರೊಬ್ಬರು ತಿಳಿಸಿದ್ದಾರೆ.


ಅಂದು ಮಧ್ಯಾಹ್ನ 2 ಗಂಟೆಗೆ (ಭಾರತೀಯ ಕಾಲಮಾನ 3:30) ವಿಮಾನ ದುಬೈ ತಲುಪಿತು. ವಿಮಾನದಿಂದ ಇಳಿದ ಬಳಿಕ ಬ್ಯಾಗ್‌ ಇರುವ ವಿಭಾಗಕ್ಕೆ ತೆರಳಿದಾಗ ಬ್ಯಾಗ್‌ ನೋಡಿ ಪ್ರಯಾಣಿಕರಿಗೆ ಶಾಕ್‌ ಆಗಿತ್ತು. ನನ್ನ ಎರಡು ಬ್ಯಾಗ್‌ಗಳ ಲಾಕ್‌ ತುಂಡು ತುಂಡು ಮಾಡಲಾಗಿತ್ತು. ನನ್ನ ಬ್ಯಾಗ್‌ನಲ್ಲಿ ಏನೂ ಕಳವಾಗಿರಲಿಲ್ಲ. ಆದರೆ ಕೇರಳದವರ ಬ್ಯಾಗ್‌ನಿಂದ ಎರಡು ಮೊಬೈಲ್‌ಗಳು ಹಾಗೂ ಭಟ್ಕಳದವರ ಬ್ಯಾಗ್‌ನಿಂದ ವಾಚ್‌ ಸೇರಿದಂತೆ ನಾನಾ ವಸ್ತುಗಳು ಕಾಣೆಯಾಗಿದ್ದವು ಎಂದು ಮಂಗಳೂರಿನ ಪ್ರಯಾಣಿಕ ಸಂತ್ರಸ್ತ ಆಬಿದ್‌ ಹುಸೈನ್‌ ಅಳಲು ತೋಡಿಕೊಂಡರು.