ಮುಂಗಾರಿಗೆ 'ನಿಸರ್ಗ'ದ ಆವೇಗ‌: ಜೂ.8ರ ನಂತರ ಭಾರೀ ಮಳೆ ಸಂಭವ!

ಮಂಗಳೂರು: ಕೇರಳಕ್ಕೆ ಮುಂಗಾರು ಪ್ರವೇಶವಾಗಿ ಮೂರೇ ದಿನಗಳಲ್ಲಿ ಕರಾವಳಿ ಜತೆಗೆ ಮಲೆನಾಡು ಪ್ರದೇಶಕ್ಕೆ ಮುಂಗಾರು ಪ್ರವೇಶ ಮಾಡಿದೆ. ಆದರೆ ಹೇಳುವಂತಹ ಮಳೆ ಸುರಿದಿಲ್ಲ. ಇದಕ್ಕೆಲ್ಲ ನಿಸರ್ಗ ಚಂಡಮಾರುತದ ಪ್ರಭಾವ ಎನ್ನುತ್ತಾರೆ ವಿಜ್ಞಾನಿಗಳು.

ಕೇರಳಕ್ಕೆ ಕಳೆದ ವರ್ಷ ಜೂ.8ಕ್ಕೆ ಮುಂಗಾರು ಪ್ರವೇಶಿಸಿದ್ದರೆ, ಈ ವರ್ಷ ಜೂ.1ರಂದು ಆಗಮಿಸಿದೆ. ಅಲ್ಲಿ ಮುಂಗಾರು ಪ್ರವೇಶವಾಗಿ ಮೂರೇ ದಿನಗಳಲ್ಲಿ ಕರಾವಳಿ ಸೇರಿದಂತೆ ಮಲೆನಾಡು ಪ್ರದೇಶಕ್ಕೆ ಮುಂಗಾರು ಪ್ರವೇಶ ಪಡೆದುಕೊಂಡಿದೆ. ಆದರೆ ನಿಸರ್ಗ ಚಂಡಮಾರುತದಿಂದಾಗಿ ಮುಂಗಾರು ಕ್ಷೀಣಿಸಿದೆ.

ನಿಸರ್ಗ ಚಂಡಮಾರುತ ಇಲ್ಲಿನ ತೇವಾಂಶವನ್ನು ಹೀರಿಕೊಂಡು ಹೋದ ಪರಿಣಾಮ ಮುಂಗಾರು ತನ್ನ ಎಂದಿನ ಲಯ ಪಡೆದುಕೊಳ್ಳಲು ಇನ್ನೆರಡು ದಿನಗಳು ಬೇಕಾಗುತ್ತದೆ ಎನ್ನುವುದು ಹವಾಮಾನ ಇಲಾಖೆಯ ಅಭಿಪ್ರಾಯ.

ಉಡುಪಿ, ಯಾದಗಿರಿಯಲ್ಲಿ ಶತಕ ದಾಟಿದ ಕೊರೊನಾ ಸೋಂಕು!

ಕಳೆದ ವರ್ಷ ಕರಾವಳಿಗೆ ಜೂ.14ರ ಬಳಿಕ ಮುಂಗಾರು ಪ್ರವೇಶಿಸಿತ್ತು. ಆ ಬಳಿಕ ನಿರಂತರ ಮಳೆ ಸುರಿದಿದೆ. ಆದರೆ ಈ ಬಾರಿ ಕೊಂಚ ಬೇಗನೆ ಮುಂಗಾರು ಬಂದರೂ, ನಿಸರ್ಗದ ಪ್ರಭಾವದಿಂದ ಕ್ಷೀಣಗೊಂಡಿದೆ ಎನ್ನುತ್ತಾರೆ ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ನಿರ್ವಹಣಾ ಸಂಸ್ಥೆಯ ಸಹಾಯಕ ವಿಜ್ಞಾನಿ ಎಸ್‌.ಎಸ್‌.ಎಂ. ಗವಾಸ್ಕರ್‌.

ಜೂ.8ರ ಮೇಲೆ ಭರ್ಜರಿ ಮಳೆ: ನಿಸರ್ಗ ಚಂಡಮಾರುತದ ಪ್ರಭಾವದಿಂದ ಕ್ಷೀಣಗೊಂಡ ಮುಂಗಾರು ತನ್ನ ನಿಜವಾದ ಶಕ್ತಿಯನ್ನು ಜೂ.8ರ ಬಳಿಕ ತೋರಿಸುವ ಸಾಧ್ಯತೆ ಇದೆ. ಈ ಸಮಯದಲ್ಲಿ ಆರಂಭವಾದ ಮಳೆ ನಾಲ್ಕೈದು ದಿನಗಳ ಕಾಲ ಭರ್ಜರಿಯಾಗಿ ಸುರಿಯಲಿದೆ ಎನ್ನುವುದು ಹವಾಮಾನ ಇಲಾಖೆಯ ಮಾಹಿತಿ.

"ಈಗಾಗಲೇ ಕರಾವಳಿಯಲ್ಲಿಮಳೆಯ ಮೋಡಗಳು ಗೋಚರವಾಗಿದೆ. ಕೆಲವು ದಿನಗಳ ಬಳಿಕ ಇದು ಮಳೆಯಾಗಿ ಬದಲಾವಣೆಯಾಗುವ ಸಾಧ್ಯತೆ ಇದೆ. ಮೀನುಗಾರಿಕೆ ಹೋಗುವ ಮೀನುಗಾರರು ಯಾವುದೇ ಕಾರಣಕ್ಕೂ ಮೀನುಗಾರಿಕೆ ಹೋಗಬಾರದು. ಕಡಲಿನಲ್ಲಿ ತೂಫಾನ್‌ ಇರುವುದರಿಂದ ಮೀನುಗಾರಿಕೆಯಲ್ಲಿರುವ ಮಂದಿಗೆ ಅಪಾಯವಿದೆ."
-ಎಸ್‌.ಎಸ್‌.ಎಂ. ಗವಾಸ್ಕರ್‌, ಸಹಾಯಕ ವಿಜ್ಞಾನಿ, ಕರ್ನಾಟಕ ರಾಜ್ಯ ನೈಸರ್ಗಿಕ ವಿಕೋಪ ನಿರ್ವಹಣಾ ಸಂಸ್ಥೆ