ವಳಚ್ಚಿಲ್: ನೆರೆ ನೀರಿಗೆ ಬಿದ್ದು ಮಸೀದಿ ಸಿಬ್ಬಂದಿ ಸಾವು

ಮಂಗಳೂರು: ವಳಚ್ಚಿಲ್ ಕೇಂದ್ರ ಜುಮ್ಮಾ ಮಸೀದಿಗೆ ಬೆಳಗ್ಗಿನ ಊಪಾಹಾರ ಕೊಂಡೊಯ್ಯುತ್ತಿದ್ದ ಮಸೀದಿಯ ಸಹಾಯಕ, ಉಪ್ಪಿನಂಗಡಿ ಆತೂರು ನಿವಾಸಿ ಮುಅದ್ದಿನ್ (45) ನೇತ್ರಾವತಿ ನದಿ ನೆರೆ ನೀರಿಗೆ ಜಾರಿ ಬಿದ್ದು ಮೃತಪಟ್ಟಿದ್ದಾರೆ.

ಮಸೀದಿಯಿಂದ ಶನಿವಾರ ಬೆಳಗ್ಗೆ 9ಗಂಟೆ ಸುಮಾರು ವಳಚ್ಚಿಲ್ ಬಿ.ಎಚ್. ಸ್ಟೋರ್ ಸಮೀಪವಿರುವ ಮನೆಗೆ ಉಪಹಾರ ಕೊಂಡೊಯ್ಯಲು ಹೋಗಿದ್ದರು. ಮರಳಿ ಬರುವಾಗ ಕಾಲುದಾರಿಯಲ್ಲೇ ತೋಡಿನ ನೆರೆ ನೀರು ತುಂಬಿ ಹರಿಯುತ್ತಿತ್ತು. ಈ ಸಂದರ್ಭ ದಾರಿಯ ಅರಿವಾಗದೆ ಕಾಲು ಜಾರಿ ತೋಡಿಗೆ ಬಿದ್ದಿದ್ದಾರೆ.

ಸ್ಥಳೀಯರು ಗಮನಿಸಿ ಕೂಡಲೇ ಅವರನ್ನು ರಕ್ಷಣೆ ಮಾಡುವ ಪ್ರಯತ್ನಪಟ್ಟರು. ಆದರೆ ಆಸ್ಪತ್ರೆಗೆ ಕೊಂಡೊಯ್ಯುವ ವೇಳೆ ಮುಅದ್ದೀನ್ ಮೃತಪಟ್ಟಿರುವುದಾಗಿ ತಿಳಿದು ಬಂದಿದೆ.
ಮಂಗಳೂರು ಗ್ರಾಮಾಂತರ ಪೊಲೀಸರು ಸ್ಥಳಕ್ಕೆ ಧಾವಿಸಿ ಪರಿಶೀಲನೆ ನಡೆಸಿದ್ದಾರೆ. ಇವರು ಈ ಹಿಂದೆ ಕುದ್ರೋಳಿ ಮುಹಿಯುದ್ದೀನ್ ಜುಮ್ಮಾ ಮಸೀದಿಯಲ್ಲಿ ಕರ್ತವ್ಯ ನಿರ್ವಹಿಸಿದ್ದರು.