ಮಂಗಳೂರು: ದಿಲ್ಲಿಯ ನಿಜಾಮುದ್ದೀನ್ ತಬ್ಲೀಗ್ ಮರ್ಕಝ್‍ನಲ್ಲಿ ನಡೆದ ಸಮಾವೇಶದಲ್ಲಿ ಭಾಗವಹಿಸಿದವರು ಇದ್ದರೆ ಸ್ವಯಂಪ್ರೇರಿತರಾಗಿ ಆರೋಗ್ಯ ಇಲಾಖೆಗೆ ಮಾಹಿತಿ ನೀಡುವಂತೆ ಶಾಸಕ ಯುಟಿ ಖಾದರ್ ಮನವಿ ಮಾಡಿದ್ದಾರೆ.

ತಾವು ನಂಬಿರುವ ತತ್ವ, ಸಿದ್ಧಾಂತಗಳಿಗೆ ಅನುಗುಣವಾಗಿ ತಮ್ಮ ವ್ಯಕ್ತಿತ್ವ ವಿಕಸನಗೊಳಿಸಲು ಈ ಧಾರ್ಮಿಕ ಕಾರ್ಯಕ್ರಮದಲ್ಲಿ ಭಾಗವಹಿಸಿರಬಹುದು. ಅಲ್ಲಿ ಭಾಗವಹಿಸಿದ ಕೆಲವರಿಗೆ ಕೊರೊನಾ ವೈರಸ್ ಬಾಧಿಸಿರುವುದು ದೃಢಪಟ್ಟಿದೆ. ಈ ಸೋಂಕು ಅಲ್ಲಿದ್ದ ಇತರರಿಗೂ ಪಸರಿಸಿರುವ ಸಂಶಯವಿದೆ. ಕಾರ್ಯಕ್ರಮದಲ್ಲಿ ಭಾಗವಹಿಸಿದವರ ಮನೆಯವರ, ಮಕ್ಕಳ, ಪರಿಸರದ ಆರೋಗ್ಯದ ಹಿತದೃಷ್ಟಿಯಿಂದ ಸ್ವಯಂಪ್ರೇರಿತವಾಗಿ ಆ ಮಾಹಿತಿ ಕೊಡಬೇಕಾದುದು ಕರ್ತವ್ಯ ಎಂದು ಖಾದರ್‌ ತಿಳಿಸಿದ್ದಾರೆ.

ದೇಶದಲ್ಲಿ 1637 ಕೊರೊನಾ ಸೋಂಕಿತರು..! ಆತಂಕ ತಂದಿದೆ ತಬ್ಲಿಘಿ ಜಮಾತ್ ಹಾಟ್‌ಸ್ಪಾಟ್‌..!

ಸ್ವಯಂಪ್ರೇರಿತವಾಗಿ ಜಿಲ್ಲಾಡಳಿತಕ್ಕೆ ಮಾಹಿತಿ ಕೊಟ್ಟು ತಪಾಸಣೆಗೊಳಪಟ್ಟಲ್ಲಿ ಆರೋಗ್ಯದ ಬಗ್ಗೆ ಮುಂಜಾಗ್ರತೆ ವಹಿಸಬಹುದು. ಇಲ್ಲದೇ ಇದ್ದಲ್ಲಿ 10-15 ದಿವಸ ಕಳೆದ ಬಳಿಕ ತಮಗೆ ಅಸೌಖ್ಯ ಕಂಡುಬಂದಲ್ಲಿ ತಮಗೂ ಅಪಾಯ ಮತ್ತು ಮನೆಯವರು, ಮಕ್ಕಳು, ಕುಟುಂಬಸ್ಥರಿಗೆ, ಪರಿಸರ, ಸಮಾಜಕ್ಕೆ ಸಮಸ್ಯೆಯಾಗುತ್ತದೆ. ಇದನ್ನು ತಮ್ಮ ಆದ್ಯ ಕರ್ತವ್ಯ ಎಂದು ಭಾವಿಸಿಕೊಂಡು ಹತ್ತಿರದ ಆರೋಗ್ಯ ಕೇಂದ್ರಕ್ಕೆ ಮಾಹಿತಿ ಕೊಟ್ಟು ತಪಾಸಣೆ ಮಾಡಿಸಿಕೊಳ್ಳಲು ಖಾದರ್ ಮನವಿ ಮಾಡಿದ್ದಾರೆ.

ದೆಹಲಿ ಧಾರ್ಮಿಕ ಸಭೆಯಲ್ಲಿ ರಾಜ್ಯದ 300ಕ್ಕೂ ಹೆಚ್ಚು ಮಂದಿ ಭಾಗಿ, ವೈರಸ್ ಹಬ್ಬುವ ಭೀತಿ!

ಜಿಲ್ಲಾಡಳಿತ ಮನವಿ

ಮಾರ್ಚ್‌ 8 ರಿಂದ ಮಾ. 20ರ ವರೆಗೆ ದಿಲ್ಲಿಯ ನಿಜಾಮುದ್ದೀನ್ ತಬ್ಲೀಗ್ ಮರ್ಕಝ್ ಸಭೆಯಲ್ಲಿ ಭಾಗವಹಿಸಿದವರಲ್ಲಿ ಯಾರಾದರೂ ಕೋವಿಡ್- 19 ಸೋಂಕಿಗೆ ಒಳಗಾಗಿರಬಹುದು. ಅಂಥವರು ತಮ್ಮ ಮಾಹಿತಿಯನ್ನು ಕೂಡಲೇ ಸಹಾಯವಾಣಿ ಸಂಖ್ಯೆ-1077 ಅಥವಾ ಜಿಲ್ಲಾ ಆರೋಗ್ಯ ಅಧಿಕಾರಿಗಳಿಗೆ ನೀಡಬೇಕು. ಇದು ಗಂಭೀರ ವಿಷಯ ಆಗಿರುವುದರಿಂದ ಯಾರೂ ನಿರ್ಲಕ್ಷಿಸಬಾರದು ಎಂದು ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಸಿಂಧೂ ಬಿ. ರೂಪೇಶ್ ಕೋರಿದ್ದಾರೆ.