ಕರಾವಳಿಯಲ್ಲಿ ಭಾರೀ ಮಳೆ: ಇನ್ನು ಎರಡು ದಿನ ಆರೆಂಜ್‌ ಅಲರ್ಟ್‌

ಮಂಗಳೂರು: ಬಂಗಾಳ ಕೊಲ್ಲಿಯಲ್ಲಿ ವಾಯುಭಾರ ಕುಸಿತದಿಂದ ಕರಾವಳಿಯ ದ.ಕ, ಉಡುಪಿಯಲ್ಲಿ ಭಾರೀ ಮಳೆಯಾಗುತ್ತಿದೆ. ಇದರ ಜತೆಗೆ ಹವಾಮಾನ ಇಲಾಖೆ ಕೂಡ ಎರಡು ದಿನಗಳ ಕಾಲ ಆರೆಂಜ್‌ ಅಲರ್ಟ್‌ ಘೋಷಣೆ ಮಾಡಿದೆ.

ಮಂಗಳೂರು ನಗರ ಹಾಗೂ ಗ್ರಾಮಾಂತರ ಭಾಗದಲ್ಲಿ ಮಂಗಳವಾರ ಉತ್ತಮ ಮಳೆಯಾಗಿದೆ. ನಗರ ವ್ಯಾಪ್ತಿಯಲ್ಲೇ 84 ಮಿಮೀ ಮಳೆಯಾದರೆ ಪುತ್ತೂರಿನಲ್ಲಿ 82 ಮಿಮೀ ಮಳೆಯಾಗಿದೆ. ಸುಳ್ಯ 70 ಮಿಮೀ, ಬೆಳ್ತಂಗಡಿ 55.5 ಮಿಮೀ ಹಾಗೂ ಬಂಟ್ವಾಳದಲ್ಲಿ 66.6 ಮಿಮೀ ಮಳೆಯಾಗಿರುವ ಕುರಿತು ಹವಾಮಾನ ಇಲಾಖೆ ಮಾಹಿತಿ ನೀಡಿದೆ. ವಿಶೇಷವಾಗಿ ಮಂಗಳೂರು- ಕಾಸರಗೋಡು ಗಡಿಭಾಗವಾದ ತಲಪಾಡಿಯಲ್ಲಿ 84.5ಮಿಮೀ ಮಳೆಯಾಗಿದೆ. ಪುತ್ತೂರಿನ ಬೆಳಂದೂರು 77 ಮಿಮೀ, ಬೆಳ್ತಂಗಡಿಯ ಕೊಕ್ಕಡ 55.5 ಹಾಗೂ ಬಂಟ್ವಾಳದ ಮಾಣಿಲ ಪ್ರದೇಶದಲ್ಲಿ 66 ಮಿಮೀ ಮಳೆಯಾಗಿದೆ.

ಮಂಗಳೂರಿನಲ್ಲಿ ಬೆಳಗ್ಗೆಯಿಂದಲೇ ನಿರಂತರವಾಗಿ ಮಳೆಯಾಗುತ್ತಿದ್ದು, ಸಂಜೆಯಾಗುತ್ತಿದ್ದಂತೆ ಮಳೆ ಕಡಿಮೆಯಾಗುತ್ತಾ ರಾತ್ರಿ ಮತ್ತೆ ಜೋರಾಗಿ ಸುರಿಯಲಾರಂಭಿಸಿದೆ.

ನಗರದ ಪಡೀಲ್‌ ಅಂಡರ್‌ಪಾಸ್‌, ಪಂಪ್‌ವೆಲ್‌ ಮೇಲ್ಸೇತುವೆಯ ಕೆಳಭಾಗ, ಜ್ಯೋತಿ, ನಂತೂರು- ಬಿಕರ್ನಕಟ್ಟೆ ರಸ್ತೆ, ಕೊಟ್ಟಾರದ ಬಳಿಯಲ್ಲಿ ಮಳೆ ನೀರು ಸರಾಗವಾಗಿ ಸಾಗದೇ ವಾಹನ ಸವಾರರಿಗೆ ಸೇರಿದಂತೆ ಪಾದಚಾರಿಗಳಿಗೂ ಸಾಕಷ್ಟು ಸಮಸ್ಯೆಯಾಗಿದೆ.

ಎರಡು ದಿನ ಆರೆಂಜ್‌ ಅಲರ್ಟ್‌ಕರಾವಳಿಯಲ್ಲಿ ಅಕ್ಟೋಬರ್‌ 14 ಮತ್ತು 15ರಂದು ಆರೆಂಜ್‌ ಅಲರ್ಟ್‌ ಇರಲಿದೆ. ಅಕ್ಟೋಬರ್‌ ಕೊನೆಯ ತನಕವೂ ಮಳೆ ಮುಂದುವರಿಯಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.