ಅತ್ಯಾಚಾರ ವೀಡಿಯೊ ವೈರಲ್‌: ಆರೋಪಿಗಳಿಗೆ ಜಾಮೀನು

ಪುತ್ತೂರು: ಮೂರು ತಿಂಗಳ ಹಿಂದೆ ಪುತ್ತೂರು ಹೊರವಲಯದ ಕಟಾರ ಎಂಬಲ್ಲಿ ನಡೆದ ಕಾಲೇಜು ವಿದ್ಯಾರ್ಥಿನಿಯ ಸಾಮೂಹಿಕ ಅತ್ಯಾಚಾರ ಪ್ರಕರಣದ ವೀಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಮಾಡಿದ ಕಾರಣಕ್ಕೆ ಬಂಧಿತರಾಗಿದ್ದ ಎಲ್ಲ 11 ಆರೋಪಿಗಳಿಗೆ ಪುತ್ತೂರು ನ್ಯಾಯಾಲಯ ಶನಿವಾರ ಜಾಮೀನು ನೀಡಿದೆ.

ಆರೋಪಿಗಳಾದ ಚಂದ್ರಶೇಖರ ಮಯ್ಯ, ಮುರಳೀಧರ, ಶ್ರೇಯಾಂಸ್‌, ಪೂವಪ್ಪ ಕೆ, ಪವನ್‌ ಕುಮಾರ್‌, ಮೋಹಿತ್‌, ಧ್ಯಾನ್‌ ಎ.ಎನ್‌., ಅದ್ವಿತ್‌ ಕುಮಾರ್‌, ಜಾಬಿರ್‌, ಶೌಕತ್‌ ಆಲಿ ಮತ್ತು ನಜೀರ್‌ ಎಂಬ ಆರೋಪಿಗಳಿಗೆ ಪುತ್ತೂರು ಪ್ರಥಮ ದರ್ಜೆ ನ್ಯಾಯಿಕ ದಂಢಾಧಿಕಾರಿ ಅವರ ನ್ಯಾಯಾಲಯ ಜಾಮೀನು ನೀಡಿದೆ.

ಸಹಾಯಕ ಸರಕಾರಿ ಅಭಿಯೋಜಕರ ಆಕ್ಷೇಪಣೆ ದಾಖಲಾಗದೆ ಇದ್ದ ಕಾರಣ ಜಾಮೀನು ಅರ್ಜಿಯ ವಿಚಾರಣೆ ಶನಿವಾರಕ್ಕೆ ಮುಂದೂಡಲ್ಪಟ್ಟಿತು. ಶನಿವಾರ ವಿಚಾರಣೆ ನಡೆದು ಜಾಮೀನು ನೀಡಲಾಯಿತು. ಅತ್ಯಾಚಾರ ಆರೋಪಿಗಳ ಪೈಕಿ ಒಬ್ಬಾತ ದುಷ್ಕೃತ್ಯವನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿಕೊಂಡಿದ್ದ. ಮೂರು ತಿಂಗಳ ಬಳಿಕ ಆತ ಈ ವೀಡಿಯೋವನ್ನು ತನ್ನ ಮೊಬೈಲ್‌ನ ಸ್ಟೇಟಸ್‌ನಲ್ಲಿ ಪ್ರದರ್ಶಿಸಿದ್ದು, ಅದನ್ನು ಮತ್ತೊಬ್ಬ ವಿದ್ಯಾರ್ಥಿ ಬೇರೆಯೇ ಆ್ಯಪ್‌ ಬಳಸಿ ಡೌನ್‌ಲೋಡ್‌ ಮಾಡಿಕೊಂಡಿದ್ದ. ಇದಾದ ಬೆನ್ನಲ್ಲೇ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿತ್ತು.