ಅತಿ ವಿರಳ ಜೇಡ ಪ್ರಭೇದ ಪತ್ತೆ

ಮಂಗಳೂರು: ಜಗತ್ತಿನಲ್ಲಿ ಅತ್ಯಂತ ವಿರಳವಾದ, ಜಿಗಿಯುವ ಸಾಮಥ್ಯವನ್ನು ಹೊಂದಿರುವ ಜೇಡ ಪ್ರಭೇದ ಭಾರತದಲ್ಲಿ ಮೊದಲ ಬಾರಿಗೆ ಪತ್ತೆಯಾಗಿದೆ.
ನೊಬೆರೆಟಸ್‌ ಎಂಬ ಜೇಡ ಪ್ರಭೇದವನ್ನು ಮುಂಬಯಿ ಮೂಲದ ಭಾರತೀಯ ಸಂಶೋಧಕರು ಪತ್ತೆ ಮಾಡಿದ್ದು, ಈ ತಂಡದಲ್ಲಿ ಮೂಡುಬಿದಿರೆಯ ನಿಸರ್ಗ ಪ್ರೇಮಿ, ವೈದ್ಯ ಡಾ. ಕೃಷ್ಣಮೋಹನ್‌ ಕೂಡ ಸದಸ್ಯರಾಗಿದ್ದಾರೆ.

ಇತರ ಕೀಟಗಳ ಮೊಟ್ಟೆಗಳನ್ನು ಕದ್ದು ತಿನ್ನುವ ಈ ಚಿಕ್ಕದಾದ ಜಿಗಿಯುವ ಜೇಡ ಮೊದಲಿಗೆ ದಕ್ಷಿಣ ಏಷ್ಯಾ ಮತ್ತು ದಕ್ಷಿಣ ಪೂರ್ವ ಏಷ್ಯಾ ಪ್ರದೇಶದಲ್ಲಿ ಕಂಡುಬಂದಿತ್ತು. ಇದೇ ಮೊದಲ ಬಾರಿಗೆ ದೇಶದಲ್ಲಿ ಇಂತಹ ವಿರಳ ಜೇಡ ಪ್ರಭೇದ ಪತ್ತೆಯಾಗಿದ್ದು, ಅವುಗಳ ಶರೀರ ಕೇವಲ 2.5 ಮಿಮೀನಿಂದ 3.5 ಮಿ.ಮೀ.ನಷ್ಟಿದೆ. ಚಿಕ್ಕದಾಗಿಯೂ, ಆಕರ್ಷಕವಾಗಿಯೂ ಇರುವ ಈ ಜೇಡ ಪ್ರಭೇದದ ಜೈವಿಕ ಇತಿಹಾಸ, ಗುಣಸ್ವಭಾವ, ವಾಸಪ್ರದೇಶ ಇತ್ಯಾದಿಗಳ ಅಧ್ಯಯನ ಇನ್ನಷ್ಟೇ ನಡೆಯಬೇಕಿದೆ.

ಜಿಗಿದಾಡುವ ಜೇಡ ಪ್ರಭೇದಗಳ ಬಗ್ಗೆ ಮೀಸಲಾಗಿರುವ ವಿಜ್ಞಾನ ಪ್ರಕಟಣೆ ಪೀಕಾಮಿಯದಲ್ಲಿ ಈ ಸಂಶೋಧನೆ ಪ್ರಕಟವಾಗಿದೆ. ಸಂಶೋಧನೆಯನ್ನು ವಿಶ್ವದಲ್ಲಿ ಜೇಡ ಪ್ರಭೇದಗಳ ಬಗ್ಗೆ ತಜ್ಞರಾಗಿರುವ ಡಾ. ಡೇವಿಡ್‌ ಇ. ಹಿಲ್‌ ಮತ್ತು ಬ್ರಿಟನ್‌ನ ಜೇಡ ಸಂಶೋಧಕ ಡಾ. ರಿಚರ್ಡ್‌ ಜೆ. ಪಿಯರ್ಸ್‌ ಅನುಮೋದಿಸಿದ್ದಾರೆ. ಸಂಶೋಧನಾ ಲೇಖನ ಪ್ರಧಾನ ಲೇಖಕ ಮತ್ತು ಸಂಶೋಧಕ ಜಾವೆದ್‌ ಆಹ್ಮದ್‌, ಸಹಸಂಶೋಧಕರಾದ ರಾಜಶ್ರೀ ಖಲಾಪ್‌ ಮತ್ತು ಡಾ. ಕೃಷ್ಣಮೋಹನ್‌ ರಾವ್‌ ಹೆಸರಿನಲ್ಲಿ ಪ್ರಕಟವಾಗಿದೆ.

ವನ್ಯಜೀವಿ ಛಾಯಾಗ್ರಾಹಕ ಇಂದ್ರಾಣಿಲ್‌ ಬ್ಯಾನರ್ಜಿ ಈ ಚಿಕ್ಕದಾದ ಜೇಡ ಹುಳುವನ್ನು ಪಶ್ಚಿಮ ಬಂಗಾಳದ ಹಣ್ಣಿನ ತೋಟಗಳಲ್ಲಿ ಸೆರೆಹಿಡಿದಿದ್ದರು. ಒಣಗಿದ ಬಾಳೆ ಎಲೆಗಳ ಮರೆಯಲ್ಲಿ ಇವುಗಳ ವಾಸವಾಗಿತ್ತು. ನೊಬೆರೆಟಸ್‌ ಪ್ರಭೇದವು ಸ್ಪರ್ಟೆನಿಯ ಉಪ ಪಂಗಡಕ್ಕೆ ಸೇರಿದಾಗಿದ್ದು, ವಿಶಿಷ್ಟವಾದ ಜಿಗಿಯುವ ಜೇಡ ಹುಳುಗಳಾಗಿವೆ. ಇದೇ ತಂಡವು ಈ ಉಪಪಂಗಡಕ್ಕೆ ಸೇರಿದ ಇನ್ನೆರಡು ಜೇಡ ಪ್ರಭೇದಗಳನ್ನು ಮಹಾರಾಷ್ಟ್ರ ಮತ್ತು ಇತರ ರಾಜ್ಯಗಳಲ್ಲಿ ಪತ್ತೆ ಮಾಡಿತ್ತು ಎಂದು ಕೃಷ್ಣಮೋಹನ್‌ ತಿಳಿಸಿದ್ದಾರೆ.