ಹಿರಿಯ ಧಾರ್ಮಿಕ ವಿದ್ವಾಂಸ ಅಲ್‌ಹಾಜ್‌ ಪಿ.ಎಂ. ಅಬ್ಬಾಸ್‌ ಮುಸ್ಲಿಯಾರ್‌ ನಿಧನ

ಕೊಣಾಜೆ: ಮಂಜನಾಡಿ ಅಲ್‌- ಮದೀನಾ ಇಸ್ಲಾಮಿಕ್‌ ಕಾಂಪ್ಲೆಕ್ಸ್‌ನ ಸ್ಥಾಪಕ, ಹಿರಿಯ ಧಾರ್ಮಿಕ ವಿದ್ವಾಂಸ ಅಲ್‌ ಹಾಜ್‌ ಪಿ.ಎಂ. ಅಬ್ಬಾಸ್‌ ಮುಸ್ಲಿಯಾರ್‌ (73) ಅಲ್ಪಕಾಲದ ಅಸೌಖ್ಯದಿಂದ ಸೋಮವಾರ ನಿಧನರಾದರು.

ಕೊಡಗು ಜಿಲ್ಲೆಯ ಮಡಿಕೇರಿ ತಾಲೂಕಿನ ಹಾಕತ್ತೂರು ಎಂಬಲ್ಲಿ 1946ರ ಜನವರಿ 1ರಂದು ಮುಹಮ್ಮದ್‌ ಕುಂಞಿ-ಬೀಫಾತಿಮಾ ಹಜ್ಜುಮ್ಮ ದಂಪತಿಯ ಪುತ್ರನಾಗಿ ಜನಿಸಿದ ಅವರು, ಹಾಕತ್ತೂರಿನಲ್ಲಿ ಅಹ್ಮದ್‌ ಮುಸ್ಲಿಯಾರ್‌ ಅವರಿಂದ ಮದ್ರಸ ಕಲಿಕೆ ಆರಂಭಿಸಿದ್ದರು. ದೇಲಂಪಾಡಿ ಮಸೀದಿಯಲ್ಲಿ 5 ವರ್ಷ ಖತೀಬ್‌, ಮುದರ್ರಿಸ್‌ ಆಗಿದ್ದರು. ಬಳಿಕ ಉಜಿರೆ ಹಾಗೂ ಮಂಜನಾಡಿ ಮಸೀದಿಯಲ್ಲಿ ಖತೀಬ್‌ ಮತ್ತು ಮುದರ್ರಿಸ್‌ ಆಗಿ ಸೇವೆ ಸಲ್ಲಿಸಿದ್ದರು. ಮಂಜನಾಡಿ ಉಸ್ತಾದ್‌ರ ಸುಪುತ್ರಿ ಆಸಿಯಾರನ್ನು ವಿವಾಹವಾಗಿದ್ದು, ಅವರಿಗೆ ಐವರು ಪುತ್ರರು ಮತ್ತು ಮೂವರು ಪುತ್ರಿಯರಿದ್ದಾರೆ. ಉಸ್ತಾದರ ನಿಧನ ಪ್ರಯುಕ್ತ ಉಳ್ಳಾಲ ದರ್ಗಾ ಅಧೀನದ ಸಯ್ಯಿದ್‌ ಮದನಿ ಅರಬಿಕ್‌ ಟ್ರಸ್ಟ್‌ನ ಎಲ್ಲ ಮದ್ರಸಗಳಿಗೆ ರಜೆ ಘೋಷಿಸಲಾಗಿತ್ತು.

ಇಂದು ಅಂತ್ಯ ಸಂಸ್ಕಾರ: ಹಾಜಿ ಪಿ.ಎಂ. ಅಬ್ಬಾಸ್‌ ಮುಸ್ಲಿಯಾರ್‌ ಅಂತ್ಯಸಂಸ್ಕಾರ ಮಂಗಳವಾರ ಬೆಳಗ್ಗೆ 9 ಗಂಟೆಗೆ ಅಲ್‌ ಮದೀನಾದಲ್ಲಿ ನಡೆಯಲಿದೆ. ಪಿ.ಎಂ. ಅಬ್ಬಾಸ್‌ ಉಸ್ತಾದ್‌ ಅವರ ಮೃತದೇಹ ಅಲ್‌ ಮದೀನಾ ಮಸೀದಿಯಲ್ಲಿ ರಾತ್ರಿ ಸಾರ್ವಜನಿಕ ಸಂದರ್ಶನಕ್ಕೆ ಇಡಲಾಗಿತ್ತು. ತಾಜ್ಯು ಶರೀಯ ಆಲಿಕುಂಞಿ ಉಸ್ತಾದ್‌, ಕೊಂಬೋಲ್‌ ಸೆಯ್ಯದ್‌ ಮುಕ್ತಾರ್‌ ತಂಙಳ್‌, ವಿಧಾನ ಪರಿಷತ್‌ ಸದಸ್ಯ ಬಿ.ಎಂ. ಫಾರೂಕ್‌, ಎಸ್‌ವೈಎಸ್‌ ಕರ್ನಾಟಕ ರಾಜ್ಯ ಪ್ರಧಾನ ಕಾರ್ಯದರ್ಶಿ ಅಬ್ದುಲ್‌ ರಶೀದ್‌ ಝೈನಿ, ಉಡುಪಿ ಸಂಯುಕ್ತ ಖಾಝಿ ಬೇಕಲ ಇಬ್ರಾಹಿಂ ಮುಸ್ಲಿಯಾರ್‌, ಕರ್ನಾಟಕ ಜಂಇಯತುಲ್‌ ಉಲಮಾ ಪ್ರಧಾನ ಕಾರ್ಯದರ್ಶಿ ಮಾಣಿ ಅಬ್ದುಲ್‌ ಹಮೀದ್‌ ಉಸ್ತಾದ್‌ ಮತ್ತಿತರರು ಆಗಮಿಸಿ ಪ್ರಾರ್ಥನೆ ಸಲ್ಲಿಸಿ ಸಂತಾಪ ಸೂಚಿಸಿದರು.

ಸಂತಾಪ: ಮುಸ್ಲಿಯಾರ್‌ ಅವರ ನಿಧನಕ್ಕೆ ಶಾಸಕ ಯು.ಟಿ. ಖಾದರ್‌, ವಕ್ಪ್‌ ಜಿಲ್ಲಾಧ್ಯಕ್ಷ ಯು.ಕೆ.ಮೋನು, ಜಿಲ್ಲಾ ಪಂಚಾಯಿತಿ ಮಾಜಿ ಸದಸ್ಯ ಎನ್‌, ಎಸ್‌. ಕರೀಂ, ಉಳ್ಳಾಲ ದರ್ಗಾ ಸಮಿತಿ ಅಧ್ಯಕ್ಷ ಹಾಜಿ ಅಬ್ದುಲ್‌ ರಶೀದ್‌, ದರ್ಗಾ ಸಮಿತಿ ಪದಾಧಿಕಾರಿಗಳು ಸಂತಾಪ ಸೂಚಿಸಿದ್ದಾರೆ.