ಮಂಗಳೂರು ತಲುಪಿದ ಮುಂಬಯಿ ಎಕ್ಸ್‌ಪ್ರೆಸ್‌ ರಿಕ್ಷಾ ಚಾಲೆಂಜ್‌

ಮಂಗಳೂರು: ಜಾಗತಿಕ ಸ್ಪರ್ಧಿಗಳಿರುವ ಮುಂಬಯಿ ಎಕ್ಸ್‌ಪ್ರೆಸ್‌ ರಿಕ್ಷಾ ಚಾಲೆಂಜ್‌ 2017 ಮಂಗಳೂರು ತಲುಪಿದೆ. ಇದೊಂದು ಆಟೊದಲ್ಲಿ ನಡೆಸುವ ವಿಶಿಷ್ಟ ಸಾಹಸ ಸ್ಪರ್ಧೆಯಾಗಿದ್ದು, ಮುಂಬಯಿನಿಂದ ಚೆನ್ನೈವರೆಗೆ ರೈಡ್‌ ಸಾಗಲಿದೆ. ಮೂವತ್ತು ಮಂದಿ ಅಂತಾರಾಷ್ಟ್ರೀಯ ಸ್ಪರ್ಧಿಗಳು ಭಾಗವಹಿಸಿದ್ದು, 14 ರಿಕ್ಷಾಗಳಿವೆ

ಈ ಸ್ಪರ್ಧೆಯ ಆಯೋಜಕರೊಂದಿಗೆ ಮಂಗಳೂರು ರೌಂಡ್‌ ಟೇಬಲ್‌, ಮಂಗಳೂರು ಲೇಡಿಸ್‌ ಸರ್ಕಲ್‌ ಕೂಡ ಕೈ ಜೋಡಿಸಿದ್ದು, ಪಂಜಿಮೊಗರು ಸರಕಾರಿ ಶಾಲೆಯಲ್ಲಿ ಈ ಸ್ಪರ್ಧೆಗೆ ಹಸಿರು ನಿಶಾನೆ ತೋರಿಸಲಾಯಿತು. ಇದಕ್ಕೂ ಮೊದಲು ಬ್ರಿಟನ್‌, ಅಮೆರಿಕ, ಆಸ್ಟ್ರೇಲಿಯಾ, ನ್ಯೂಜಿಲೆಂಡ್‌, ಫ್ರಾನ್ಸ್‌, ಐಲ್ಯಾಂಡ್‌, ಕೆನಡಾ, ಇಟಲಿ, ಸ್ಪೇನ್‌, ಸ್ವಿಜರ್ಲೆಂಡ್‌ ಸ್ಪರ್ಧಿಗಳು ವಿದ್ಯಾರ್ಥಿಗಳ ಜತೆ ಸೇರಿ ಸ್ವಾತಂತ್ರ್ಯ ದಿನ ಆಚರಿಸಿದರು.

ಸ್ಪರ್ಧಿಗಳು ಸ್ಥಳೀಯ ಭಾಷೆ, ಸಂಸ್ಕೃತಿ , ಜನರ ಬಗ್ಗೆ ತಿಳಿದುಕೊಳ್ಳುವ ಜತೆಗೆ ನಿಸರ್ಗ ಸೌಂದರ್ಯವನ್ನುಆಸ್ವಾದಿಸುವ ಅವಕಾಶ ಪಡೆದುಕೊಳ್ಳುತ್ತಾರೆ. ಅದೇ ರೀತಿ ನಾನಾ ಪ್ರದೇಶಗಳ ಆಹಾರದ ರುಚಿ ಕೂಡ ನೋಡುವ ಅವಕಾಶ ಇವರದಾಗಲಿದೆ.

ಸಂಚಾರದುದ್ದಕ್ಕೂ ನಿಧಿ ಸಂಗ್ರಹಿಸಿ ಅದನ್ನು ಬಡವರ ಅಭಿವೃದ್ಧಿ ಯೋಜನೆಗಳಿಗೆ ನೀಡಲಿದ್ದಾರೆ. ಮದ್ರಾಸ್‌ ಮಿಡ್‌ ಟೌನ್‌ ರೌಂಡ್‌ ಟೇಬಲ್‌ 42 ಕೂಡ ಈ ಸ್ಪರ್ಧೆ ಆಯೋಜನೆಯ ಪ್ರಮುಖ ಸಹಭಾಗಿ. ಸ್ಪರ್ಧಿಗಳು ಆಟೊದಲ್ಲಿ ಮಹಾರಾಷ್ಟ್ರ. ಗೋವಾ, ಕರ್ನಾಟಕ, ತಮಿಳುನಾಡುಗಳಲ್ಲಿ ಸಂಚರಿಸಲಿದ್ದಾರೆ ಎಂದು ಮಂಗಳೂರು ರೌಂಡ್‌ ಟೇಬಲ್‌ 115ರ ಅಧ್ಯಕ್ಷ ವರದರಾಜ್‌ ಶೆಣೈ ಹೇಳಿದ್ದಾರೆ.