ದ.ಕ.: ಕಡಲ್ಕೊರೆತ ಜಿಲ್ಲೆಯಲ್ಲಿ 2 ಮನೆಗಳಿಗೆ ಭಾಗಶಃ ಹಾನಿ

ಮಂಗಳೂರು: ಕಳೆದ ಎರಡು ದಿನಗಳಿಂದ ಅವ್ಯಾಹತವಾಗಿ ಸುರಿಯುತ್ತಿದ್ದ ಭಾರಿ ಮಳೆ ಶನಿವಾರ ಕ್ಷೀಣಗೊಂಡಿದ್ದು, ಮರ ಬಿದ್ದು ಜಿಲ್ಲೆಯಲ್ಲಿ ಎರಡು ಮನೆಗಳು ಹಾನಿಗೀಡಾಗಿವೆ. ಚಿತ್ರಾಪುರದಲ್ಲಿ ಸಮುದ್ರ ಕೊರೆತ ಕಾಣಿಸಿಕೊಂಡಿದೆ.

ಶನಿವಾರ ಬೆಳಗ್ಗಿನಿಂದಲೇ ನಗರದಲ್ಲಿ ಮೋಡ ಕವಿದ ವಾತಾವರಣ ನೆಲೆಸಿದ್ದರೂ ಮಳೆ ಪ್ರಮಾಣ ತೀರಾ ಇಳಿಮುಖವಾಗಿದೆ. ಇಡೀ ದಿನ ಒಂದೆಡರಡು ಮಳೆ ಕೆಲವು ನಿಮಿಷ ಸುರಿದು ಮಾಯವಾಗಿದೆ. ಈ ಮಧ್ಯೆ ಚಿತ್ರಾಪುರ ಪ್ರದೇಶದಲ್ಲಿ ಕಡಲ್ಕೊರೆತ ಕಾಣಿಸಿಕೊಂಡಿದೆ.

ಜಿಲ್ಲೆಯ ಬಂಟ್ವಾಳ ತಾಲೂಕಿನ ಸಜೀಪನಡು ಗ್ರಾಮದಲ್ಲಿ ಶುಕ್ರವಾರ ತಡರಾತ್ರಿ ಶಶಿಕಲಾ ಎಂಬವರ ಕಚ್ಚಾ ಮನೆ ಭಾಗಶಃ ಹಾನಿಗೀಡಾಗಿದೆ. ವಿಟ್ಲ ಸಮೀಪದ ಕೊಪ್ಪಳ ಎಂಬಲ್ಲಿ ಸರೋಜಿನಿ ಎಂಬವರ ಮನೆ ಮೇಲೆ ತೆಂಗಿನ ಮರ ಬಿದ್ದು ಭಾಗಶಃ ಹಾನಿಗೀಡಾಗಿದೆ.

ಶುಕ್ರವಾರ ಬೆಳಗ್ಗೆ 8.30ರಿಂದ ಶನಿವಾರ ಬೆಳಗ್ಗೆ 8.30ರ ವರೆಗೆ ಜಿಲ್ಲೆಯಲ್ಲಿ ಒಟ್ಟು 79.4 ಮಿಮೀ. ಮಳೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಜಿಲ್ಲೆಯಲ್ಲಿ 84.2 ಮಿಮೀ. ಮಳೆಯಾಗಿದೆ. ಜಿಲ್ಲೆಯ ಬಂಟ್ವಾಳ ತಾಲೂಕಿನಲ್ಲಿ 108.7 ಮಿಮೀ., ಬೆಳ್ತಂಗಡಿ 63.0 ಮಿಮೀ., ಮಂಗಳೂರು 96.8 ಮಿಮೀ., ಪುತ್ತೂರು 43.3 ಮಿಮೀ. ಹಾಗೂ ಸುಳ್ಯ ತಾಲೂಕಿನಲ್ಲಿ 85.0 ಮಿಮೀ. ಮಳೆ ಸುರಿದಿದೆ.

ನದಿ ನೀರಿನ ಮಟ್ಟ

ನೇತ್ರಾವತಿ(ಬಂಟ್ವಾಳ)-5.5 ಮೀಟರ್‌

ನೇತ್ರಾವತಿ(ಉಪ್ಪಿನಂಗಡಿ)-15 ಮೀಟರ್‌

ಕುಮಾರಧಾರ(ಉಪ್ಪಿನಂಗಡಿ)-13 ಮೀಟರ್‌