ಶ್ವೇತಾ ಸುವರ್ಣಗೆ ಮಿಸೆಸ್‌ ಇಂಡಿಯಾ ಮಂಗಳೂರು ಕಿರೀಟ

ಮಂಗಳೂರು : ಮಿಸೆಸ್‌ ಇಂಡಿಯಾ ಕರ್ನಾಟಕ ಮಂಗಳೂರು ಕಿರೀಟವನ್ನು ಶ್ವೇತಾ ಸುವರ್ಣ ಮುಡಿಗೇರಿಸಿಕೊಂಡಿದ್ದಾರೆ.

ಕ್ಲಾಸಿಕ್‌ ವಿಭಾಗದಲ್ಲಿ ವಿಕ್ಟೋರಿಯಾ ಸೆರಾವೊ ಹಾಗೂ ಸೂಪರ್‌ ಕ್ಲಾಸಿಕ್‌ ವಿಭಾಗದಲ್ಲಿ ಇಂದಿರಾ ಮೆನನ್‌ ವಿಜೇತರಾಗಿದ್ದಾರೆ.

ಪ್ರತಿಭಾ ಸಾನ್ಶಿಮಠ್‌ ನೇತೃತ್ವದಲ್ಲಿ ಪಾಥ್‌ವೇ ಮತ್ತು ಮೆರ್ಸಿ ಲೇಡಿಸ್‌ ಸೆಲೂನ್‌ ಸಹಯೋಗದೊಂದಿಗೆ 'ಮಿಸಸ್‌ ಇಂಡಿಯಾ ಕರ್ನಾಟಕ' ಮಂಗಳೂರು ವಿಭಾಗದ ಸೌಂದರ್ಯ ಸ್ಪರ್ಧೆಯ ಜಿಲ್ಲಾ ಮಟ್ಟದ ಅಂತಿಮ ಸುತ್ತಿನ ಆಯ್ಕೆ ಭಾನುವಾರ ನಗರದ ಮೋತಿಮಹಲ್‌ ಹೋಟೆಲ್‌ ಸಭಾಂಗಣದಲ್ಲಿ ನಡೆಯಿತು.

22-40, 40-60, 60ರಿಂದ ಮೇಲ್ಪಟ್ಟವರು ಹೀಗೆ 3ವಿಭಾಗದಲ್ಲಿ ನಡೆದ ಸ್ಪರ್ಧೆಗಳಲ್ಲಿ ಒಟ್ಟು 36 ಮಂದಿ ಸ್ಪರ್ಧಿಗಳು ಭಾಗವಹಿಸಿದ್ದರು.

ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಸಂಘಟಕಿ 2015ರ ಮಿಸೆಸ್‌ ಇಂಡಿಯಾ ಪ್ರತಿಭಾ ಸಾನ್ಶಿಮಠ್‌ ಮಾತನಾಡಿ, ಈ ಹಿಂದೆ ರಾಜ್ಯಮಟ್ಟದಲ್ಲಿ ಮಾತ್ರ ನಡೆಯುತ್ತಿದ್ದ ಸೌಂದರ್ಯ ಸ್ಪರ್ಧೆಯನ್ನು ಮಂಗಳೂರು ಮತ್ತು ಮೈಸೂರು ವಿಭಾಗದಲ್ಲೂ ಆರಂಭಿಸಿದ್ದೇವೆ. ಆಯ್ಕೆಯಾದ ಸ್ಪರ್ಧಿಗಳು ಜೂನ್‌ನಲ್ಲಿ ನಡೆಯುವ ರಾಜ್ಯಮಟ್ಟದ ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಲಿದ್ದಾರೆ. ಇಲ್ಲಿ ಗೆದ್ದವರು ಮಿಸೆಸ್‌ ಇಂಡಿಯಾ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದರು.

ವಿವಿಧ ಸೌಂದರ್ಯ ಸ್ಪರ್ಧೆಗಳಲ್ಲಿ ವಿಜೇತ ಸೋನಿಯಾ ಡಿಲಿಮಾ, ಕಾಜೊಲ್‌ ಭಾಟಿಯಾ, ವೈಷ್ಣವಿ ಪ್ರದೀಪ್‌ ರಾಜ್‌ ಅತಿಥಿಗಳಾಗಿದ್ದರು. ಪಾಥ್‌ವೇ ಸ್ಥಾಪಕ ದೀಪಕ್‌ ಗಂಗೂಲಿ ಮತ್ತು ಮೆರ್ಸಿ ಲೇಡಿಸ್‌ ಸೆಲೂನ್‌ನ ಮೆರ್ಸಿ ವೀಣಾ ಡಿಸೋಜ ಅತಿಥಿಗಳನ್ನು ಸ್ವಾಗತಿಸಿದರು.