ಮಂಗಳೂರು: ವೃದ್ಧ ತಂದೆಯನ್ನು ರಸ್ತೆಯಲ್ಲಿ ಎಳೆದೊಯ್ದ ಪುತ್ರ ಪರಾರಿ!

ತೊಕ್ಕೊಟ್ಟು: ಪುತ್ರನೊಬ್ಬ ತಂದೆಯನ್ನು ತಾನು ತಂಗಿದ್ದ ಲಾಡ್ಜ್‌ನಿಂದ ಎರಡು ಕಾಲಲ್ಲಿ ಹಿಡಿದು ಎಳೆದುಕೊಂಡು ಬಂದು ರಸ್ತೆ ಬದಿಯಲ್ಲಿ ಬಿಟ್ಟು ಪರಾರಿಯಾದ ಅಮಾನವೀಯ ಘಟನೆ ಮಂಗಳೂರು ಹೊರವಲಯದ ದೇರಳಕಟ್ಟೆಯಲ್ಲಿ ನಡೆದಿದ್ದು, ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.

ಪುತ್ರ ಕಳೆದ 15 ದಿನಗಳಿಂದ ತಂದೆಗೆ ಚಿಕಿತ್ಸೆ ಕೊಡಿಸಲಾಗುತ್ತಿದ್ದ ಆಸ್ಪತ್ರೆಯ ಎದುರಿನ ಲಾಡ್ಜ್‌ನಲ್ಲಿ ತಂಗಿದ್ದ. ಸೋಮವಾರ ಲಾಡ್ಜ್‌ನಿಂದ ತಂದೆಯನ್ನು ಎಳೆದುಕೊಂಡು ಬಂದು ರಸ್ತೆಯಲ್ಲಿ ಬಿಟ್ಟು ಪರಾರಿಯಾಗಿದ್ದಾನೆ. ಹಿರಿ ವಯಸ್ಸಿನ ವ್ಯಕ್ತಿಯನ್ನು ಸ್ಥಳೀಯರು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಅವರು ಮುಂಬಯಿಯಲ್ಲಿ ವಾಸವಾಗಿದ್ದರು ಎನ್ನಲಾಗಿದೆ.

ಜು.5ರವರೆಗೆ ಲೆಡಿಗೋಷನ್‌ ಸೇವೆ ಸ್ಥಗಿತ
ಮಂಗಳೂರು:ನಗರದ ಲೇಡಿಗೋಶನ್‌ ಆಸ್ಪತ್ರೆಯಲ್ಲಿ ವೈದ್ಯರ ಕೊರತೆ ಹಿನ್ನೆಲೆಯಲ್ಲಿ ಜೂ.30ರಿಂದ ಜು.5ರವರೆಗೆ ಹೊರರೋಗಿ ಹಾಗೂ ಒಳರೋಗಿಗಳ ದಾಖಲಾತಿ ಸೇವೆ ಸ್ಥಗಿತಗೊಳ್ಳಲಿದೆ.

ಆಸ್ಪತ್ರೆಯ ಹೆಚ್ಚಿನ ವೈದ್ಯರು-ಸಿಬ್ಬಂದಿ ಕ್ವಾರಂಟೈನ್‌ನಲ್ಲಿರುವುದರಿಂದ ಹಾಗೂ ಆಸ್ಪತ್ರೆಯ ಎಲ್ಲ ವಿಭಾಗಗಳನ್ನು ಫ್ಯೂಮಿಗೇಶನ್‌ ಹಾಗೂ ಸ್ಯಾನಿಟೈಸೇಶನ್‌ ಮಾಡುವ ಅಗತ್ಯವಿದೆ. ರೋಗಿಗಳ ಮುಂದಿನ ಚಿಕಿತ್ಸೆಗೆ 'ಎಕೆ-ಎಆರ್‌ಕೆ' ಯೋಜನೆಯಡಿ ಖಾಸಗಿ ವೈದ್ಯಕೀಯ ಕಾಲೇಜು ಆಸ್ಪತ್ರೆಗಳಿಗೆ ಕಳುಹಿಸಲು ಶಿಫಾರಸು ಪತ್ರ ನೀಡಲು ನಿರ್ಧರಿಸಲಾಗಿದೆ.

ಜು.6ರಿಂದ ಆಸ್ಪತ್ರೆಯು ಎಂದಿನಂತೆಯೇ ಕಾರ್ಯನಿರ್ವಹಿಸಲಿದೆ. ಸಾರ್ವಜನಿಕರು ಸಹಕರಿಸಬೇಕು. ಈ ಬಗ್ಗೆ ಡಾ. ಶಕುಂತಲಾ ಎಂ. ಅವರನ್ನು ಸಂಪರ್ಕಿಸಬಹುದು. ಮಾಹಿತಿಗಾಗಿ ಹೆಲ್ಪ್ ಡೆಸ್ಕ್‌ ದೂ.ಸಂ.: 0824-2424001 ಸಂಪರ್ಕಿಸಲು ಲೇಡಿಗೋಶನ್‌ ಆಸ್ಪತ್ರೆಯ ಮೆಡಿಕಲ್‌ ಸೂಪರಿಂಟೆಂಡೆಂಟ್‌ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.