ಪತಿ ಸಂಬಳ ತಿಳಿದುಕೊಳ್ಳುವ ಹಕ್ಕು ಪತ್ನಿಗಿದೆ: ಹೈಕೋರ್ಟ್

ಭೋಪಾಲ್: ಗೌಪ್ಯತೆಯ ಹಕ್ಕಿಗೆ ಸಂಬಂಧಿಸಿದಂತೆ ಮಹತ್ವದ ತೀರ್ಪು ನೀಡಿರುವ ಭೋಪಾಲ್ ನ್ಯಾಯಾಲಯ ಪತಿಯ ಸಂಬಳ ಎಷ್ಟೆಂದು ತಿಳಿದುಕೊಳ್ಳುವ ಹಕ್ಕು ಪತ್ನಿಗಿದೆ ಎಂದು ಹೇಳಿದೆ.

ಪತಿ ಇಂದ ದೂರವಾಗಿರುವ ಪತ್ನಿಯೊಬ್ಬರು ಸಲ್ಲಿಸಿದ ಅರ್ಜಿಯೊಂದರ ವಿಚಾರಣೆ ನಡೆಸಿದ ಕೋರ್ಟ್ ಈ ತೀರ್ಮಾನಕ್ಕೆ ಬಂದಿದೆ. ಜಿಲ್ಲಾ ನ್ಯಾಯಾಲಯ ಮತ್ತು ಹೈಕೋರ್ಟ್‌ನ ಏಕಸದಸ್ಯ ಪೀಠ ಗೌಪತ್ಯೆಯ ಹಕ್ಕನ್ನು ಮುಂದಿಟ್ಟುಕೊಂಡು ಅರ್ಜಿದಾರ ಮಹಿಳೆ ವಿರುದ್ಧ ತೀರ್ಪು ನೀಡಿತ್ತು. ಆದರೆ ಅದನ್ನು ರದ್ದು ಪಡಿಸಿದ ಹೈಕೋರ್ಟ್ ದ್ವಿಸದಸ್ಯ ಪೀಠ ಆಕೆಯ ಪರವಾಗಿ ಆದೇಶ ನೀಡಿದೆ.

ಪ್ರಕರಣದ ವಿವರ: ಸುನೀತಾ ಜೈನ್ ಎಂಬ ಮಹಿಳೆ ತಮ್ಮ ಪರಿತ್ಯಕ್ತ ಪತಿ ಪವನ್ ಜೈನ್ ಅವರಿಂದ ಕುಟುಂಬ ನಿರ್ವಹಣಾ ವೆಚ್ಚವಾಗಿ ತಿಂಗಳಿಗೆ 7000 ರೂಪಾಯಿಗಳನ್ನು ಪಡೆಯುತ್ತಿದ್ದರು. ಬಿಎಸ್ಸೆನ್ನೆಲ್‌ನಲ್ಲಿ ಉನ್ನತ ಹುದ್ದೆಯಲ್ಲಿರುವ ತಮ್ಮ ಪತಿಯಿಂದ ಸಂಬಳ 2 ಲಕ್ಷಕ್ಕಿಂತ ಹೆಚ್ಚಿರಬಹುದೆಂದು ಅಂದಾಜಿಸಿದ್ದ ಅವರು ನಿರ್ವಹಣಾ ವೆಚ್ಚವಾಗಿ ಹೆಚ್ಚಿನ ಹಣವನ್ನು ಬಯಸಿದ್ದರು. ಹೀಗಾಗಿ ಪತಿಯ ನಿಖರ ಸಂಬಳವೆಷ್ಟೆಂದು ತಿಳಿಯಲು ಕೋರ್ಟ್ ಮೆಟ್ಟಿಲೇರಿದ್ದರು.

ಪತಿಯ ಪೇ ಸ್ಲಿಪ್ ಒದಗಿಸುವಂತೆ ಕೋರಿ ಜಿಲ್ಲಾ ನ್ಯಾಯಾಲಯದಲ್ಲಿ ಅವರು ಸಲ್ಲಿಸಿದ್ದ ಅರ್ಜಿ ತಿರಸ್ಕೃತವಾಗಿತ್ತು. ಬಳಿಕ ಅವರು ಬಿಎಸ್ಸೆನ್ನೆಎಲ್‌ಗೆ ಆರ್‌ಟಿಐ ಸಲ್ಲಿಸಿ ಪೇ ಸ್ಲಿಪ್ ಪಡೆಯಲು ಯತ್ನಿಸಿ ವಿಫಲರಾದರು. ಅಂತಿಮವಾಗಿ ಕೇಂದ್ರ ಮಾಹಿತಿ ಆಯೋಗ( ಸಿಐಸಿ) ಅವರ ಅರ್ಜಿಯನ್ನು ಸ್ವೀಕರಿಸಿತು ಮತ್ತು ಪೇ ಸ್ಲಿಪ್ ಒದಗಿಸುವಂತೆ ಬಿಎಸ್ಸೆನ್ನೆಲ್‌ಗೆ ಆದೇಶಿಸಿತ್ತು.

ಈ ಆದೇಶವನ್ನು ಪ್ರಶ್ನಿಸಿ ಪವನ್ ಹೈಕೋರ್ಟ್ ಮೊರೆ ಹೋಗಿದ್ದ. ಏಕ ಸದಸ್ಯ ಪೀಠ ಸಿಐಸಿ ಆದೇಶವನ್ನು ರದ್ದುಗೊಳಿಸಿತ್ತು. ಆದರೆ ನ್ಯಾಯಮೂರ್ತಿ ಎಸ್.ಕೆ. ಸೇತ್ ಮತ್ತು ನಂದಿತಾ ದುಬೆ ಅವರನ್ನೊಳಗೊಂಡ ವಿಭಾಗೀಯ ಪೀಠ ಏಕ ನ್ಯಾಯಾಧೀಶ ಪೀಠದ ನಿರ್ಣಯವನ್ನು ರದ್ದುಗೊಳಿಸಿ ಸುನೀತಾ ಪರ ಆದೇಶವನ್ನು ಎತ್ತಿ ಹಿಡಿಯಿತು.

ಗಿರೀಶ್ ರಾಮಚಂದ್ರ ದೇಶಪಾಂಡೆ V/S ಸಿಐಸಿ ಪ್ರಕರಣವನ್ನಾಧರಿಸಿ ಏಕ ಸದಸ್ಯ ಪೀಠ ಈ ಪವನ್ ಪರ ನಿರ್ಣಯ ಪ್ರಕಟಿಸಿತ್ತು. ಆದರೆ ಈ ಪ್ರಕರಣ ಸಂಪೂರ್ಣ ಭಿನ್ನವಾಗಿದ್ದು. ಇಲ್ಲಿ ಪತಿಯ ಸಂಬಳವನ್ನು ತಿಳಿದುಕೊಳ್ಳಲು ಬಯಸಿರುವುದು ಪತ್ನಿ. ಆಕೆಗೆ ಪತಿಯ ನಿಖರ ಸಂಬಳ ತಿಳಿದುಕೊಳ್ಳುವ ಸಂಪೂರ್ಣ ಹಕ್ಕಿದೆ ಎಂದು ದ್ವಿಸದಸ್ಯ ಪೀಠ ತೀರ್ಪು ನೀಡಿತು.