ಬಿಎಂಸಿ ಚುನಾವಣೆಯಲ್ಲಿ ಏಕಾಂಗಿ ಸ್ಪರ್ಧೆಗೆ ಕಾಂಗ್ರೆಸ್‌ ನಿರ್ಧಾರ..? ಹಾಗಾದ್ರೆ ಮಹಾ ವಿಕಾಸ್‌ ಅಘಾಡಿ ಕಥೆ ಏನು..?

ಮುಂಬಯಿ: ಬೃಹನ್ಮುಂಬಯಿ ಮಹಾನಗರ ಪಾಲಿಕೆ (ಬಿಎಂಸಿ)ಗೆ 2022ರಲ್ಲಿ ನಡೆಯುವ ಚುನಾವಣೆಯಲ್ಲಿ ಏಕಾಂಗಿಯಾಗಿ ಸ್ಪರ್ಧೆ ನಡೆಸುವ ಕುರಿತು ಕಾಂಗ್ರೆಸ್‌ ಚಿಂತನೆ ನಡೆಸುತ್ತಿದೆ. ಎಐಸಿಸಿಯಲ್ಲಿ ಮಹಾರಾಷ್ಟ್ರ ಉಸ್ತುವಾರಿಯಾಗಿರುವ ಎಚ್‌.ಕೆ.ಪಾಟೀಲ್‌ ಅಧ್ಯಕ್ಷತೆಯಲ್ಲಿ ನಡೆದ ರಾಜ್ಯ ಕಾಂಗ್ರೆಸ್‌ ನಾಯಕರ ಸಭೆಯಲ್ಲಿ ಈ ಕುರಿತು ಚರ್ಚೆಯಾಗಿದೆ.

ಚುನಾವಣೆಗೆ ಮುನ್ನ ಮುಂಬಯಿ ಕಾಂಗ್ರೆಸ್‌ ಘಟಕದ ಅಧ್ಯಕ್ಷರನ್ನು ಬದಲಿಸುವ ಇರಾದೆಯನ್ನು ಎಚ್‌.ಕೆ.ಪಾಟೀಲ್‌ ವ್ಯಕ್ತಪಡಿಸಿದ್ದು, ಹಾಲಿ ಅಧ್ಯಕ್ಷ ಏಕನಾಥ್‌ ಗಾಯಕ್‌ವಾಡ್‌ ಅವರ ಉತ್ತರಾಧಿಕಾರಿಯ ಹೆಸರು ಸೂಚಿಸುವಂತೆಯೂ ಪಕ್ಷದ ಮುಖಂಡರನ್ನು ಕೋರಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಬಿಎಂಸಿಯು ದೇಶದ ಅತಿದೊಡ್ಡ ಮತ್ತು ಶ್ರೀಮಂತ ಮಹಾನಗರ ಪಾಲಿಕೆಯಾಗಿದೆ. ಪಾಲಿಕೆಯ ಸದಸ್ಯ ಬಲ 227. ಮೂರು ದಶಕಗಳಿಂದಲೂ ಇಲ್ಲಿ ಶಿವಸೇನೆಯೇ ಆಡಳಿತ ನಡೆಸುತ್ತಿದೆ. ಕೆಲ ಚುನಾವಣೆಗಳನ್ನು ಬಿಜೆಪಿ ಜತೆಗೂಡಿ ಶಿವಸೇನೆ ಎದುರಿಸಿದೆ.

ಕಾಂಗ್ರೆಸ್‌ನಲ್ಲಿ ಒಡಕು ಸೃಷ್ಟಿಸಿದ ಬಿಹಾರ ಸೋಲು..! ಅತೃಪ್ತರು ಪಕ್ಷ ತೊರೆಯಬಹುದು ಎಂದ ಚೌಧರಿ

ಕಳೆದ ಚುನಾವಣೆಯನ್ನು ಶಿವಸೇನೆ, ಬಿಜೆಪಿ ಪ್ರತ್ಯೇಕವಾಗಿ ಎದುರಿಸಿದ್ದರೂ ಶಿವಸೇನೆ ಹೆಚ್ಚು ಸ್ಥಾನ ಗಳಿಸಿ ಅಧಿಕಾರ ಉಳಿಸಿಕೊಂಡಿದೆ. ಮಹಾರಾಷ್ಟ್ರದಲ್ಲಿಈಗ ಶಿವಸೇನೆ, ಎನ್‌ಸಿಪಿ, ಕಾಂಗ್ರೆಸ್‌ ಮೈತ್ರಿಕೂಟ ಸರಕಾರ ಇದ್ದರೂ, ಕಾಂಗ್ರೆಸ್‌ ಏಕಾಂಗಿಯಾಗಿ ಚುನಾವಣೆ ಎದುರಿಸುವ ಬಗ್ಗೆ ಚಿಂತಿಸುತ್ತಿದೆ.