ಮಳೆಗೆ ನಲುಗಿದ ಮುಂಬಯಿ, 5 ವರ್ಷಗಳಲ್ಲೇ 2ನೇ ಅತಿಹೆಚ್ಚು ಮಳೆಯ ಪ್ರಮಾಣ!

ಮುಂಬಯಿ: ಸತತ ಮೂರು ದಿನಗಳಿಂದ ಮುಂಬಯಿ ನಗರ ಮತ್ತು ಸುತ್ತಲಿನ ಪ್ರದೇಶಗಳಲ್ಲಿ ಸುರಿಯುತ್ತಿರುವ ಮಳೆಯ ಪ್ರಮಾಣ ಕಳೆದ ಐದು ವರ್ಷಗಳಲ್ಲೇ 2ನೇ ಅತಿಹೆಚ್ಚು ಎಂದು ಹವಾಮಾನ ಇಲಾಖೆ ವರದಿ ಮಾಡಿದೆ.

ಭಾನುವಾರ ಬೆಳಗ್ಗೆ 8.30 ರಿಂದ 11.30ರವರೆಗೆ ನಗರದ ವಿವಿಧೆಡೆ 95.44 ಮಿ.ಮೀ ಮಳೆ ಬಿದ್ದಿದೆ. ಬಹುತೇಕ ಕಡೆ ರಸ್ತೆಗಳಲ್ಲಿ ನೀರು ನಿಂತಿದ್ದು ಮ್ಯಾನ್‌ಹೋಲ್‌ ತೆರೆದು ನೀರಿನ ಹರಿದು ಹೋಗಲು ವ್ಯವಸ್ಥೆ ಮಾಡಲಾಗಿದೆ. 20ಕ್ಕೂ ಹೆಚ್ಚು ಕಡೆ ಮರಗಳು ಉರುಳಿವೆ. ಬಿಎಂಸಿ ಕೇಂದ್ರ ಕಚೇರಿಯಿಂದ 27 ಕಿ.ಮೀ ದೂರವಿರುವ ಜನಪ್ರಿಯ ಪೊವಾಯಿ ಕೆರೆ ಭಾನುವಾರ ಮುಂಜಾನೆ ಮಳೆಯಿಂದಾಗಿ ಉಕ್ಕಿ ಹರಿದಿದೆ.

ಸಿಯೊನ್‌, ದಾದರ್‌, ಮಿಲಾನ್‌ ಸಬ್‌ವೇ ನಿವಾಸಿಗಳಿಗೆ ಎತ್ತರದ ಪ್ರದೇಶಗಳಿಗೆ ತೆರಳಲು ಬೃಹನ್‌ಮುಂಬಯಿ ಮಹಾನಗರ ಪಾಲಿಕೆ (ಬಿಎಂಸಿ)ಈಗಾಗಲೇ ಸೂಚನೆ ನೀಡಿದ್ದು, ಸಂಚಾರ ವ್ಯವಸ್ಥೆ ಕಲ್ಪಿಸುತ್ತಿದೆ. ಅಂಧೇರಿ ಪೂರ್ವ ಮತ್ತು ವೆಸ್ಟರ್ನ್‌ ಎಕ್ಸ್‌ಪ್ರೆಸ್‌ವೇ ಮೆಟ್ರೋ ಕೇಂದ್ರಗಳಿಗೆ ಮಳೆನೀರು ನುಗ್ಗಿರುವುದು ವರದಿಯಾಗಿದೆ.

ಕೊಲಾಬಾದಲ್ಲಿ ಪ್ರದೇಶದಲ್ಲಿವಾಸಿಸುತ್ತಿರುವ ಮೀನುಗಾರರು ನಗರಪಾಲಿಕೆಗೆ ರಕ್ಷಣೆಗಾಗಿ ಕೋರಿಕೆ ಸಲ್ಲಿಸಿದ್ದು, ಮನೆಗಳಿಗೆ ನೀರು ನುಗ್ಗುವ ಅಪಾಯದಿಂದ ಕುಟುಂಬಸ್ಥರನ್ನು ಪಾರುಮಾಡಲು ಮನವಿ ಮಾಡಿದೆ. ಈಗಾಗಲೇ ಯೆಲ್ಲೋ ಅಲರ್ಟ್‌ ಘೋಷಿಸಿರುವ ಹವಾಮಾನ ಇಲಾಖೆಯು ಮುಂಬಯಿ ನಗರ, ರಾಯಗಢ, ಠಾಣೆಯಲ್ಲಿ ಮುಂದಿನ 24 ಗಂಟೆಯಲ್ಲಿ ಭಾರಿ ಮಳೆ ಸುರಿಯಲಿದೆ ಎಂದು ಎಚ್ಚರಿಸಿದೆ.