ಮುಂಬಯಿಗೆ ಹೋಗು ಕನಸು ಈಡೇರಿಸಿಕೊಳ್ಳಲು ಹಣಕ್ಕಾಗಿ ಮಗುವನ್ನ ಮಾರಿದ ತಾಯಿ!

ಹೈದರಾಬಾದ್‌: ಮಕ್ಕಳು ಇಲ್ಲದವರು ಮಗು ಹುಟ್ಟಲಿ ಎಂದು ಮುಕ್ಕೋಟಿ ದೇವರಿಗೆ ಪ್ರಾರ್ಥನೆ ಮಾಡುತ್ತಾರೆ. ಇದ್ದ ಬದ್ದ ದೇವಸ್ಥಾನಗಳಿಗೆ ಹರಕೆ ಹೇಳುತ್ತಾರೆ. ಆದರೆ ಮಕ್ಕಳು ಇದ್ದವರ ಸ್ಥಿತಿ ಇಲ್ಲಿ ಕೊಂಚ ವಿಭಿನ್ನವಾಗಿದೆ. ಹೌದು ತಾಯಿಯೊಬ್ಬಳು ತನ್ನ ಮುಂಬಯಿಗೆ ಹೋಗುವ ಕನಸನ್ನ ನನಸು ಮಾಡಿಕೊಳ್ಳಲು ತನ್ನ ಮಗುವನ್ನ ಮಾರಾಟ ಮಾಡಿರುವ ಘಟನೆ ಹೈದರಾಬಾದ್‌ನ ಹಬೀಬಾ ನಗರದಲ್ಲಿ ನಡೆದಿದೆ.

ಆದರೆ ಪೊಲೀಸರು ಕೇಸ್‌ ದಾಖಲಾದ 24 ಗಂಟೆಯೊಳಗೆ ಮಗುವನ್ನ ವಶಕ್ಕೆ ಪಡೆದಿದ್ದು, ತಾಯಿ ಹಾಗೂ ಮಗುವನ್ನ ಖರೀದಿಸಲು ಬಂದವರನ್ನ ಬಂಧಿಸುವ ಮೂಲಕ ಪ್ರಕರಣವನ್ನ ಬೇಧಿಸಿದ್ದಾರೆ.

ಘಟನೆ ನಡೆದಿದ್ದು ಹೇಗೆ?
ಪೊಲೀಸ್‌ ಮೂಲಗಳ ಪ್ರಕಾರ, 22 ವರ್ಷದ ಶೇಖ್‌ ಝೋಯಾ ಖಾನ್‌ ಎಂಬಾಕೆ ಗಂಡನ ಜೊತೆ ಜಗಳ ಮಾಡಿಕೊಂಡು ಒಂಟಿ ಜೀವನ ನಡೆಸುತ್ತಿದ್ದಳು. ಮಗುವನ್ನ ಸಾಕಲು ಈಕೆಗೆ ಸಮಸ್ಯೆಯಾಗುತ್ತಿತ್ತಂತೆ. ಮಗು, ಊರು ಎಲ್ಲಾ ಬಿಟ್ಟು ಮುಂಬಯಿಗೆ ಹೋಗುವ ಕನಸು ಕೂಡ ಹೊಂದಿದ್ದಳಂತೆ.

ಹೀಗಾಗಿ ಮಗುವನ್ನ ಮಾರಾಟ ಮಾಡಿದರೆ ಮಾಯಾ ನಗರಿಗೆ ತೆರಳಲು ಹಣ ಸಿಕ್ಕಿದಂತೆ ಆಗುತ್ತದೆ. ಅಲ್ಲದೆ ಮಗುವು ತೊಲಗಲಿದೆ ಎನ್ನುವ ದುರಾಲೋಚನೆ ಮಾಡಿದ್ದಾಳೆ. ನಂತರ ಯಾವುದೋ ಒಬ್ಬ ದಲ್ಲಾಳಿಯನ್ನ ಸಂಪರ್ಕಿಸಿ ಮಗುವನ್ನ ಮಾರಾಟ ಮಾಡಿದ್ದಾಳೆ.

ಆದರೆ ಈ ವಿಷಯ ತಿಳಿದ ಪತಿ ಅಬ್ದುಲ್‌ ಮೊಹಮ್ಮದ್‌, ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಕೂಡಲೇ ಎಚ್ಚೆತ್ತುಕೊಂಡ ಪೊಲೀಸರು ಪ್ರಕರಣವನ್ನ ಯಶಸ್ವಿಯಾಗಿ ಬೇಧಿಸಿದ್ದಾರೆ. ಮಗುವಿನ ತಾಯಿ ಹಾಗೂ ಮಗುವನ್ನ ಕೊಂಡುಕೊಳ್ಳಲು ಬಂದ ಐವರನ್ನ ಬಂಧಿಸಿದ್ದಾರೆ. ನಂತರ ಮಗುವನ್ನ ಆತನ ತಂದೆಗೆ ಪೊಲೀಸರು ಹಸ್ತಾಂತರಿಸಿದ್ದಾರೆ.