ಹಕ್ಕು ಚಲಾಯಿಸಿದ 111 ವರ್ಷದ ಹಾಡಿ ಮಹಿಳೆ

ಮೈಸೂರು: ಎಚ್‌.ಡಿ.ಕೋಟೆ ತಾಲೂಕಿನಲ್ಲಿ ಅತಿ ಹಿರಿಯ ವಯಸ್ಸಿನ ಮಹಿಳೆರೊಬ್ಬರು ಮತದಾನ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ.

ತಾಲೂಕಿನ ಹುಣಸೇಕುಪ್ಪೆ ಹಾಡಿಯ ನಿವಾಸಿ 111 ವರ್ಷದ ಕೆಂಚಮ್ಮ ಅವರು ಹುಣಸೇಕುಪ್ಪೆ ಗ್ರಾಮದ ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆಯ ಮತಗಟ್ಟೆಯಲ್ಲಿ ತಮ್ಮ ಮತದಾನ ಹಕ್ಕು ಚಲಾಯಿಸಿದರು. 1976ರಲ್ಲಿ ಕಾಡಿನಿಂದ ನಗರದ ಹಾಡಿ ಪ್ರದೇಶಕ್ಕೆ ಇವರನ್ನು ಕರೆತರಲಾಯಿತು. ಅಂದಿನಿಂದ ಮತದಾನ ಮಾಡುತ್ತಿದ್ದಾರೆ. ಬುಡಕಟ್ಟು ಸಂಸ್ಕೃತಿ ಉಳಿವಿಗಾಗಿನ ಹೋರಾಟಗಾರ ಪ್ರಸನ್ನ ಅವರ ಸಹಾಯದಿಂದ ಮತದಾನ ಮಾಡಿದ ಅವರು, ''ಪ್ರತಿ ಬಾರಿ ಒಂದು ನಂಬಿಕೆ ಇಟ್ಟುಕೊಂಡು ಮತದಾನ ಮಾಡುತ್ತೇವೆ. ಆದರೂ ಪ್ರತಿ ಬಾರಿ ರಚನೆ ಆಗುವ ಸರಕಾರಗಳು ನಮ್ಮ ಹಾಡಿ ಜನರ ಸಹಾಯಕ್ಕೆ ಧಾವಿಸುವುದಿಲ್ಲ. ಇನ್ನಾದರೂ ನಮ್ಮ ಹಾಡಿ ಜನಾಂಗದವರಿಗೆ ಸೌಲಭ್ಯ ಕಲ್ಪಿಸುತ್ತಾರೆ ಎಂಬ ನಂಬಿಕೆ ಇದೆ'' ಎಂದು ತಮ್ಮ ಅಭಿಪ್ರಾಯ ಹಂಚಿಕೊಂಡರು.