ದಿಬ್ಬಣದ ಬಸ್‌ ಅಪಘಾತ: 3 ಸಾವು

ತಿ.ನರಸೀಪುರ: ನಿಂತಿದ್ದ ಲಾರಿಗೆ ದಿಬ್ಬಣದ ಬಸ್‌ ಡಿಕ್ಕಿಯಾಗಿ 9 ವರ್ಷದ ಬಾಲಕ ಸೇರಿ ಮೂವರು ಮೃತಪಟ್ಟಿದ್ದು, 7 ಮಂದಿ ಗಾಯಗೊಂಡಿದ್ದಾರೆ.

ತಿ.ನರಸೀಪುರ -ಮೈಸೂರು ರಸ್ತೆಯ ಎಡದೊರೆ -ಇಂಡುವಾಳು ಮಧ್ಯೆ ಇರುವ ಟೋಲ್‌ಗೇಟ್‌ ಸಮೀಪ ಮಂಗಳವಾರ ರಾತ್ರಿ ಈ ಅಪಘಾತ ಸಂಭವಿಸಿದೆ.

ಬಸ್‌ನಲ್ಲಿದ್ದ ಮೈಸೂರು ತಾಲೂಕು ಚೋರನಹಳ್ಳಿ ಗ್ರಾಮದ ರಾಜೇಶ್‌ (30), ಪ್ರಜ್ವಲ್‌ (22), ಬಾಲಕ ವಿನಯ್‌ (9) ಮೃತರು. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ತಿ.ನರಸೀಪುರದ ಕಲ್ಯಾಣಮಂಟಪದಲ್ಲಿ ಆಯೋಜಿಸಿದ್ದ ಮದುವೆ ಸಮಾರಂಭ ಮುಗಿಸಿಕೊಂಡು ಸ್ವಗ್ರಾಮಕ್ಕೆ ವಾಪಸಾಗುತ್ತಿದ್ದಾಗ ತಾಲೂಕಿನ ಎಡದೊರೆ ಸಮೀಪದ ಟೋಲ್‌ಗೇಟ್‌ ಬಳಿ ಬಸ್‌ ಚಾಲಕನ ನಿಯಂತ್ರಣ ತಪ್ಪಿ ರಸ್ತೆ ಬದಿ ನಿಂತಿದ್ದ ಲಾರಿಯ ಹಿಂಭಾಗಕ್ಕೆ ಡಿಕ್ಕಿಹೊಡೆದು ಅಪಘಡ ಸಂಭವಿಸಿದೆ. ಪೊಲೀಸ್‌ ಇನ್ಸ್‌ಪೆಕ್ಟರ್‌ ಎಂ.ಪಿ.ಲವ ಮತ್ತು ಪೊಲೀಸರು ಸ್ಥಳಕ್ಕೆ ಧಾವಿಸಿ ಗಾಯಾಳುಗಳನ್ನು ಆಸ್ಪತ್ರೆಗೆ ಸಾಗಿಸುವಲ್ಲಿ ನೆರವಾದರು. ತಿ.ನರಸೀಪುರ ಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.