ಮೈಸೂರು ಮೃಗಾಲಯದ ಹೋಟೆಲ್‌ನಲ್ಲಿ 3 ಪೂರಿಗೆ 100 ರೂ.!

ಮೈಸೂರು: ಮೈಸೂರಿನ ಚಾಮರಾಜೇಂದ್ರ ಮೃಗಾಲಯದ ಹೋಟೆಲ್‌ನಲ್ಲಿ ಎರಡು ಇಡ್ಲಿಗೆ 45 ರೂ., ಎರಡು ಚಪಾತಿಗೆ 50 ರೂ., ಮೂರು ಪೂರಿಗೆ 100 ರೂ...!

ಪ್ರವಾಸೋದ್ಯಮ ಸಚಿವ ಸಾ.ರಾ. ಮಹೇಶ್‌ ಭಾನುವಾರ ಮೃಗಾಲಯಕ್ಕೆ ಭೇಟಿ ನೀಡಿದಾಗ ಹೋಟೆಲ್‌ನಲ್ಲಿ ನಿಗದಿಪಡಿಸಿರುವ ದರ ಕಂದು ದಂಗಾದರು.

ಈ ಹೋಟೆಲ್‌ನಲ್ಲಿ ಎರಡು ಮಸಾಲೆ ವಡೆಗೆ 55 ರೂ., ಒಂದು ಕಾಫಿ/ ಟೀಗೆ 25 ರೂ., ಚೌ ಚೌ ಬಾತ್‌ಗೆ 100 ರೂ., ಸೆಟ್‌ ದೋಸೆಗೆ 70 ರೂ. ನೀಡಬೇಕು. ಪಾನಿ ಪುರಿಗೆ 60 ರೂ- ಹೀಗೆ ಯಾವುದೇ ಆಹಾರ ತೆಗೆದುಕೊಂಡರೂ ಅದರ ಬೆಲೆ ದುಬಾರಿ. ಹೋಟೆಲ್‌ನಲ್ಲಿ ನೇತುಹಾಕಿದ್ದ ತಿಂಡಿಗಳ ದರಪಟ್ಟಿಯನ್ನು ನೋಡಿದ ಸಚಿವರು, ಹೋಟೆಲ್‌ನವರೊಂದಿಗೆ ಆಗಿರುವ ಕರಾರು ದಾಖಲೆ ಪರಿಶೀಲಿಸಿದರು. ಮೃಗಾಲಯದ ಪಕ್ಕದಲ್ಲಿರುವ ಖಾಸಗಿ ಹೋಟೆಲ್‌ವೊಂದರ ದರಪಟ್ಟಿ ತರಿಸಿ ತುಲನೆ ಮಾಡಿದರು. ಬಡವರು ಇಷ್ಟು ಬೆಲೆ ನೀಡಿ ಊಟ ತಿಂಡಿ ಮಾಡಲು ಸಾಧ್ಯವೆ ಎಂದು ಹುಬ್ಬೇರಿಸಿದರು.

ಬಡವರು ಬರಲ್ಲ ಬಿಡಿ: ಸಾಮಾನ್ಯವಾಗಿ ಮೃಗಾಲಯಕ್ಕೆ ಭೇಟಿ ನೀಡುವ ಕೆಲವರು ಆಹಾರವನ್ನು ತಮ್ಮ ಜತೆಯಲ್ಲಿಯೆ ತರುತ್ತಾರೆ. ಆಹಾರ ಸೇವನೆಗೆಂದೇ ಮೃಗಾಲಯದ ಪ್ರವೇಶದ್ವಾರದಲ್ಲಿ ಸ್ಥಳಾವಕಾಶ ಮಾಡಲಾಗಿದೆ. ಹಾಗಾಗಿ ಬಡವರು ಈ ಹೋಟೆಲ್‌ಗೆ ಭೇಟಿ ನೀಡುವುದಿಲ್ಲ ಎಂದು ಅಧಿಕಾರಿಗಳು ಸಮುಜಾಯಿಷಿ ನೀಡಿದರು.

ರೇಟ್‌ ಇಳಿಸಿ, ಇಲ್ಲವೇ ಖಾಲಿ ಮಾಡಿಸಿ

‘‘ ಇಷ್ಟು ದುಬಾರಿ ಬೆಲೆ ಕೊಟ್ಟು ತಿನ್ನಲು ಸಾಧ್ಯವಿಲ್ಲ. ಕೂಡಲೆ ದರ ಪರಿಷ್ಕರಣೆ ಮಾಡಿ,’’ ಎಂದು ಸಚಿವ ಸಾರಾ ಮಹೇಶ್‌ ಸೂಚನೆ ನೀಡಿದರು. ‘‘ದರ ನಿಗದಿ ಮಾಡುವಾಗ ಹೊರಗಿನ ದರಕ್ಕಿಂತ ಕೇವಲ 5 ರೂ. ಹೆಚ್ಚಳ ಮಾಡಬೇಕು. ಒಂದು ವೇಳೆ ಹೋಟೆಲ್‌ನವರು ಈ ಆದೇಶ ಪಾಲನೆ ಮಾಡದಿದ್ದರೆ ಅವರನ್ನು ತೆರವುಗೊಳಿಸಿ,’’ ಎಂದು ಅಧಿಕಾರಿಗಳಿಗೆ ಸೂಚನೆ ನೀಡಿದರು. ಅಧಿಕಾರಿಗಳು ದರ ಪರಿಷ್ಕರಣೆ ಮಾಡಲು ಸಮ್ಮತಿಸಿದರು.