300 ಸ್ಥಾನಗಳು ಬಿಜೆಪಿಗೆ: ಬಿಎಸ್‌ವೈ

ಮೈಸೂರು: ಈ ಬಾರಿಯ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ 300 ಕ್ಷೇತ್ರಗಳಲ್ಲಿ ಜಯಭೇರಿ ಬಾರಿಸಲಿದ್ದು, ಇದನ್ನು ಯಾರಿಂದಲೂ ತಡೆಯಲು ಸಾಧ್ಯವಿಲ್ಲ ಎಂದು ಮಾಜಿ ಮುಖ್ಯಮಂತ್ರಿ ಹಾಗೂ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌.ಯಡಿಯೂರಪ್ಪ ಹೇಳಿದರು.

ಹಾಸನಕ್ಕೆ ತೆರಳುವ ಮುನ್ನ ಸುದ್ದಿಗಾರರೊಂದಿಗೆ ಮಾತನಾಡಿದರು. ''ರಾಜ್ಯದಲ್ಲಿ 22 ಸ್ಥಾನಗಳನ್ನು ಬಿಜೆಪಿಗೆ ಗೆಲ್ಲುತ್ತದೆ ಎಂದು ಹೇಳುತ್ತಲೇ ಬಂದಿದ್ದೇನೆ. ಈ ಸಂಖ್ಯೆಗೆ ಇನ್ನೆರಡು ಸಂಖ್ಯೆ ಸೇರಬಹುದೇ ಹೊರತು ಕಡಿಮೆಯಾಗುವುದಿಲ್ಲ. ಮೈತ್ರಿಯಿಂದ ಯಾವುದೇ ತೊಂದರೆಯಾಗುವುದಿಲ್ಲ. ಅವರು ಮೈತ್ರಿ ಮಾಡಿಕೊಂಡಿರುವುದೇ ನಮಗೆ ಅನುಕೂಲ. ಅವರ ಕಚ್ಚಾಟ, ಬಡಿದಾಟ ಹೇಗೆ ನಡೆಯುತ್ತದೆ ಎನ್ನುವುದನ್ನು ನೋಡಿ. ಮೇಲ್ನೋಟಕ್ಕೆ ನಾಯಕರು ಒಂದಾಗಿಬಹುದು. ಆದರೆ, ಕಾರ್ಯಕರ್ತರು ಹೊಡೆದಾಡುತ್ತಿದ್ದಾರೆ'' ಎಂದರು.

ನರೇಂದ್ರ ಮೋದಿ ಸುಮಲತಾ ಅವರಿಗೆ ಮತ ಕೇಳಿ ಮೈಸೂರು ಹಾಗೂ ಚಾಮರಾಜನಗರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿಗಳ ಪರ ಮತ ಕೇಳಲಿಲ್ಲ ಎಂಬ ಕೆಲವರ ಟೀಕೆಗೆ ಪ್ರತಿಕ್ರಿಯಿಸಿದ ಅವರು, ''ಮೋದಿ ಅವರು ಆಗಮಿಸಿದ್ದೇ ಮತ ಕೇಳಲು. ಇದು ಎಲ್ಲಿಗೂ ತಿಳಿದಿದೆ. ಅಂಬರೀಷ್‌ ಅವರಿಗೆ ಕೆಲವರು ಹೇಗೆ ಅಪಮಾನ ಮಾಡಿದ್ದಾರೆ ಎನ್ನುವುದನ್ನು ತಿಳಿಸಿದ್ದಾರೆ. ಮೋದಿ ಅವರು ಪ್ರಸ್ತಾಪ ಮಾಡಿರುವುದರಿಂದ ಸುಮಲತಾ ಅವರಿಗೆ ಹೊಸ ಶಕ್ತಿ ಬಂದಂತಾಗಿದ್ದು, ಅವರ ಗೆಲುವನ್ನು ಸುಲಭ ಮಾಡಲಿದೆ'' ಎಂದು ಹೇಳಿದರು.