5 ಪೈಸೆ ಬಾಕಿ ಪಾವತಿಗೆ ಚೆಕ್‌

ಮೈಸೂರು: ಕೃಷಿಕ ಎಸ್‌. ಸತೀಶ್‌ ಎಂಬವರು ತಮ್ಮ ಕ್ರೆಡಿಟ್‌ ಕಾರ್ಡ್‌ ಸೇವೆ ಸ್ಥಗಿತಗೊಳಿಸಲು ಬಾಕಿ ಇದ್ದ 5 ಪೈಸೆಯನ್ನು ಬ್ಯಾಂಕ್‌ಗೆ ಚೆಕ್‌ ಮೂಲಕ ತೀರಿಸಿರುವ ವಿಚಿತ್ರ ಘಟನೆ ನಡೆದಿದೆ.

ಎಸ್‌ಬಿಐನ ವಿಜಯನಗರ ಶಾಖೆಯಲ್ಲಿ ಸತೀಶ್‌ ಖಾತೆ ಹೊಂದಿದ್ದು, ಐದು ವರ್ಷದ ಹಿಂದೆ ಬ್ಯಾಂಕಿನಲ್ಲಿ 25 ಸಾವಿರ ರೂ. ಠೇವಣಿ ಇರಿಸಿ ಕ್ರೆಡಿಟ್‌ ಕಾರ್ಡ್‌ ಪಡೆದಿದ್ದರು. ಹಲವು ವರ್ಷಗಳ ಕಾಲ ಕ್ರೆಡಿಟ್‌ ಕಾರ್ಡ್‌ ಬಳಸಿದ ಸತೀಶ್‌, ಠೇವಣಿ ಇಟ್ಟಿದ್ದ 25 ಸಾವಿರ ರೂ. ಹಿಂಪಡೆಯುವುದಕ್ಕೆ ಕಾರ್ಡ್‌ ಸೇವೆ ಸ್ಥಗಿತಗೊಳಿಸುವಂತೆ ಕಸ್ಟಮರ್‌ ಕೇರ್‌ ನಂಬರ್‌ಗೆ ಕರೆ ಮಾಡಿದ್ದಾರೆ.

ಕರೆ ಸ್ವೀಕರಿಸಿದ ಸಿಬ್ಬಂದಿ, ತಾವು ಐದು ಪೈಸೆ ಬಾಕಿ ಉಳಿಸಿಕೊಂಡಿದ್ದು, ಅದನ್ನು ಜಮಾ ಮಾಡಿದರೆ ಖಾತೆ ಸ್ಥಗಿತಗೊಳಿಸುವುದಾಗಿ ಹೇಳಿದ್ದಾರೆ. ‘‘ಐದು ಪೈಸೆ ಚಾಲನೆಯಲ್ಲೇ ಇಲ್ಲದಿರುವುದರಿಂದ ಅದನ್ನು ಪಾವತಿ ಮಾಡುವುದು ಹೇಗೆ,’’ ಎಂದು ಕೇಳಿದ್ದಕ್ಕೆ ಬ್ಯಾಂಕಿನ ಸಿಬ್ಬಂದಿ ಚೆಕ್‌ ಮೂಲಕ ಪಾವತಿಸುವಂತೆ ಸಲಹೆ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಮಾರ್ಚ್‌ 18ರಂದು ಬ್ಯಾಂಕಿಗೆ ತೆರಳಿದ ಸತೀಶ್‌ ಐದು ಪೈಸೆಗೆ ಚೆಕ್‌ ನೀಡಿದ್ದಾರೆ. ಬಳಿಕ ಕ್ರೆಡಿಟ್‌ ಕಾರ್ಡ್‌
ಖಾತೆಯನ್ನು ಬ್ಯಾಂಕ್‌ ಸ್ಥಗಿತಗೊಳಿಸಿದೆ.