ವಿವಾಹೇತರ ಸಂಬಂಧ: ಜೋಡಿ ಆತ್ಮಹತ್ಯೆ

ಹುಣಸೂರು: ವಿವಾಹೇತರ ಸಂಬಂಧ ಹಾದಿ-ಬೀದಿ ರಂಪವಾಗಿ ಬಯಲಾದ ಹಿನ್ನೆಲೆಯಲ್ಲಿ ಪ್ರೇಮಿಗಳಿಬ್ಬರು ಪ್ರತ್ಯೇಕವಾಗಿ ನೇಣುಬಿಗಿದು ಆತ್ಮಹತ್ಯೆ ಮಾಡಿಕೊಂಡ ಘಟನೆ ಹುಣಸೂರು ತಾಲೂಕು ಬಿಳಿಕೆರೆ ಹೋಬಳಿ ಚಲ್ಲಳ್ಳಿಯಲ್ಲಿ ನಡೆದಿದೆ.

ಗ್ರಾಮದ ರಾಜು ಅವರ ಪತ್ನಿ ಶಾಂತಿ(37) ಹಾಗೂ ಅದೇ ಗ್ರಾಮದ ವಿವಾಹಿತ ಶಾಂತರಾಜು (38) ಮೃತರು.

ಮೂಲತಃ ಮೈಸೂರು ತಾಲೂಕು ಆಲನಹಳ್ಳಿಯವರಾದ ಶಾಂತಿ 15 ವರ್ಷಗಳ ಹಿಂದೆ ಚಲ್ಲಳ್ಳಿಯ ರಾಜುವನ್ನು ವಿವಾಹವಾಗಿದ್ದು, ಇವರಿಗೆ ಇಬ್ಬರು ಮಕ್ಕಳಿದ್ದಾರೆ. ಅದೇ ಗ್ರಾಮದ ಶಾಂತರಾಜು ಸಹ 13 ವರ್ಷಗಳ ಹಿಂದೆ ಮದುವೆಯಾಗಿದ್ದು, ಈ ದಂಪತಿಗೂ ಒಂದು ಮಗುವಿದೆ.

ಹಲವು ವರ್ಷಗಳ ಹಿಂದೆಯೇ ಶಾಂತರಾಜು-ಶಾಂತಿ ನಡುವೆ ಪ್ರೇಮಾಂಕುರವಾಗಿ ಸಂಬಂಧ ಬೆಳೆದಿತ್ತು. ಇಬ್ಬರ ಮನೆಯಲ್ಲೂ ಈ ವಿಚಾರವಾಗಿ ಗಲಾಟೆ ನಡೆಯುತ್ತಲೇ ಇತ್ತು. ಹಲವು ಬಾರಿ ರಾಜಿ ಪಂಚಾಯ್ತಿಯೂ ನಡೆದಿತ್ತು. ಪೊಲೀಸ್‌ ಠಾಣೆ ಮೆಟ್ಟಿಲೂ ಹತ್ತಿದ್ದರು. ಆದರೂ ಇವರಿಬ್ಬರ ಸಂಬಂಧ ಮುಂದುವರೆದಿತ್ತು ಎನ್ನಲಾಗಿದೆ.

ಈ ನಡುವೆ ಗುರುವಾರ ಇದೇ ವಿಚಾರವಾಗಿ ಗ್ರಾಮದಲ್ಲಿ ನ್ಯಾಯ ಪಂಚಾಯ್ತಿ ಇತ್ತು. ಈ ಹಿನ್ನೆಲೆಯಲ್ಲಿ ಬೇಸರಗೊಂಡ ಶಾಂತಿ ತನ್ನ ಮನೆ ಹಿಂಭಾಗದಲ್ಲಿರುವ ಮರಕ್ಕೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಈ ಘಟನೆ ಹಿನ್ನೆಲೆಯಲ್ಲಿ ಶಾಂತಿಯ ಪತಿ ರಾಜು ಅವರು ಶಾಂತರಾಜು ಮತ್ತು ಕುಟುಂಬದವರ ವಿರುದ್ಧ ಬಿಳಿಕೆರೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು. ಒಂದೆಡೆ ಶಾಂತಿಯ ಸಾವು ಮತ್ತೊಂದೆಡೆ ತನ್ನ ವಿರುದ್ಧ ಪ್ರಕರಣ ದಾಖಲಾಗಿದ್ದರಿಂದ ಬೇಸತ್ತ ಶಾಂತರಾಜು ಸಹ ಶುಕ್ರವಾರ ಮನೆಯಲ್ಲೇ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಘಟನೆಯಿಂದ ಎರಡೂ ಕುಟುಂಬಗಳು ಹಾಗೂ ಮೃತರ ಮಕ್ಕಳು ತೀವ್ರ ದುಃಖತಪ್ತರಾಗಿದ್ದಾರೆ. ಈ ಸಂಬಂಧ ಎರಡೂ ಕಡೆಯವರು ಬಿಳಿಕೆರೆ ಠಾಣೆಗೆ ದೂರು ನೀಡಿದ್ದು, ಪ್ರಕರಣ ದಾಖಲಾಗಿದೆ ಎಂದು ವೃತ್ತ ನಿರೀಕ್ಷ ಕ ಕೆ.ಸಿ.ಪೂವಯ್ಯ ತಿಳಿಸಿದ್ದಾರೆ.